बच्चू कडू यांनी शेतकऱ्यांच्या कर्जमाफीच्या मुद्द्यावर आणि अमेरिकेने भारतावर लादलेल्या करांवरून मोदी सरकारवर थेट आणि तिखट टीका केली आहे.
महाराष्ट्राच्या मातीत सध्या शेतकऱ्यांचा आक्रोश घुमतोय. पण सत्तेच्या गलियाऱ्यात त्याची दखल घ्यायला कोणीही तयार नसल्याचे दिसून येत आहे. शेतकरी कर्जमाफीची मागणी गेल्या अनेक महिन्यांपासून जोर धरतेय. पण सरकारच्या तिजोरीतून त्यासाठी एक पैसाही बाहेर पडलेला नाही. यवतमाळसारख्या कापूस उत्पादक जिल्ह्यात, जिथे ‘कॉटन किंग’ ही ओळख अभिमानाने मिरवली जाते, तिथे आज शेतकरी हताश झालेत. त्यांच्या स्वप्नांना कर्जाच्या ओझ्याखाली चिरडले जातंय. काहींनी तर निराशेने आत्महत्येसारखे टोकाचे पाऊल उचलले. या सगळ्या पार्श्वभूमीवर, शेतकऱ्यांचा आवाज बनलेले बच्चू कडू यांनी पंतप्रधान नरेंद्र मोदींवर थेट हल्ला चढवलाय.
2014 वर्षी दाभडी येथे नरेंद्र मोदींची सभा झाली. तेव्हा त्यांनी विदर्भात शेतीवर आधारित उद्योगांचे स्वप्न दाखवले होते. ‘जिथे कापूस, तिथे धागा, तिथे कापड आणि तिथूनच निर्यात’ असं आश्वासन देत त्यांनी शेतकर्याच्या मनात आशेची पेरणी केली होती. पण आज, ती आशा धुळीला मिळाली आहे. बच्चू कडू यांनी पंतप्रधान नरेंद्र मोदींवर चांगलेच शरसंधान साधले. ‘बोल रामासारखे, पण कृती रावणासारखी’ अशा जहरी शब्दांत त्यांनी पंतप्रधान मोदींवर टीका करत शेतकऱ्यांचा रोष उघड केला. यवतमाळ जिल्ह्यात 25 हजारहून अधिक शेतकऱ्यांनी आत्महत्या केल्या, पण तरीही त्या आश्वासनांचा पत्ता नाही. उलट, अमेरिकेने भारतावर लादलेल्या 50 टक्के आयात शुल्काने शेतकऱ्यांचे कंबरडे मोडले आहे.
शेतकऱ्यांसाठी नवीन मोर्चा
बच्चू कडू यांनी हा मुद्दा उचलून धरत सरकारला कोंडीत पकडले आहे. आमचा कापूस परदेशात पाठवला नाही, पण अमेरिकेचा कापूस मात्र स्वस्तात आयात होतोय, असा थेट आरोप त्यांनी केलाय. कापसाला भाव नाही, सोयाबीनला कवडीमोल, तुरीचंही तेच. संत्र्याच्या बागा मरताहेत आणि शेतकरी उपासमारीच्या खाईत लोटला जातोय. बच्चू कडू यांनी यवतमाळच्या शेतकऱ्यांचा हा आक्रोश सरकारच्या कानापर्यंत पोहोचवण्यासाठी आंदोलले, उपोषणे केली, पण परिणाम शून्य. त्यांनी सरकारवर प्रश्नांचा भडिमार केलायः महाराष्ट्राचे मुख्यमंत्री विदर्भाच, पण विदर्भातील शेतकऱ्यांचे काय? त्यांना भाव का मिळत नाही?
अमेरिकेचा कापूस 17 हजार रुपये किंटलने खरेदी केला जातो. पण स्थानिक शेतकऱ्यांचा कापूस हजार रुपये किंटलनेही विकला जात नाही. ही दरीच शेतकऱ्यांच्या जखमेवर मीठ चोळणारी आहे. बच्चू कडू यांनी सरकारच्या या नाकर्तेपणावर जोरदार टीका केलीय. मोदींनी शब्द दिले, पण कृतीत त्यांनी शेतकऱ्यांच्या गळ्याला फास लावला, असं ते म्हणाले. यवतमाळच्या मातीतून उठलेला हा आवाज आता संपूर्ण महाराष्ट्रात घुमणार आहे. बच्चू कडू यांनी 600 सभांचा संकल्प केलाय. 28 ऑक्टोबरला बुटीबोरी येथे दिव्यांग बांधवांचा महामेळावा घेण्याची घोषणाही केलीय. हा मेळावा शेतकऱ्यांच्या हक्कांसाठी एक नवं पर्व सुरू करणार आहे, असा त्यांचा दावा आहे.
Prakash Ambedkar : सरकारच्या चालढकलपणावर न्यायालयाचा जोरदार हल्ला
