भंडारा जिल्ह्यातील 48 पर्यटक काश्मीरमध्ये अडकले होते.मात्र सर्वजण सुरक्षित आहेत. राज्य सरकारने त्यांच्या सुरक्षित परतीसाठी तातडीने व्यवस्था केली आहे.
काश्मीरमधील पहलगाम येथे घडलेल्या दहशतवादी हल्ल्याने देशभरात भीतीचं वातावरण निर्माण झालं आहे. भंडारा जिल्ह्यातील 48 पर्यटक त्या भागात अडकले होते. मात्र सुदैवाने हे सर्व पर्यटक हल्ला घडलेल्या भागात उपस्थित नव्हते. सध्या ते सर्वजण महाराष्ट्रात परत येण्यासाठी प्रवास करत आहेत, अशी अधिकृत माहिती जिल्हा आपत्ती व्यवस्थापन अधिकारी यांनी दिली आहे.
महाराष्ट्र शासनाने या परिस्थितीत तात्काळ हालचाली करत या पर्यटकांना सुरक्षित परत आणण्यासाठी महत्त्वाचे पाऊल उचलले आहे. राज्याचे आपत्ती व्यवस्थापन मंत्री गिरीश महाजन स्वतः श्रीनगरला पोहोचत आहेत. तेथे जाऊन अडकलेल्या पर्यटकांशी समन्वय साधणार आहेत. आपत्कालीन परिस्थितीत मुख्यमंत्री देवेंद्र फडणवीस यांच्या नेतृत्वाखाली राज्य प्रशासनाने त्वरित सक्रिय होऊन संपूर्ण नियंत्रण आपल्या हाती घेतले आहे.
Devendra Fadnavis : पहलगामच्या हल्लेखोरांना सरकारकडून माफी नाही
प्रशासनाची धावपळ
हल्ल्याच्या घटनेनंतर महाराष्ट्र सरकारने जिल्हा पातळीवरून ते श्रीनगरपर्यंत यंत्रणा सज्ज केल्या आहेत. भंडाऱ्यातून गेलेले हे पर्यटक विविध वयोगटांतील आहेत. त्यांच्याशी संपर्क करून सरकारने त्यांच्या परतीच्या वाटेचा सुस्पष्ट आराखडा तयार केला आहे. कोणतीही गडबड न होता, प्रत्येक कुटुंब सुरक्षितपणे त्यांच्या गावी पोहोचवले जाईल यासाठी प्रशासकीय अधिकाऱ्यांपासून मंत्रीस्तरावरील यंत्रणा दक्ष झाली आहे.
इंडिगोच्या विशेष विमानाद्वारे काही पर्यटकांना परत आणण्याची प्रक्रिया सुरू आहे. सरकारकडून प्रवास, आरोग्य तपासणी आणि तातडीच्या उपचारांची सुविधाही पुरवली जात आहे. भंडाऱ्यातील पालक आणि नातेवाईकांमध्ये एक प्रकारचा दिलासा निर्माण झाला आहे.
तातडीची मदत
महाराष्ट्र शासनाने यापूर्वीच अशा आपत्तींच्या वेळी तातडीने मदत पुरवण्याचे धोरण अंगीकारले आहे. गिरीश महाजन यांनी प्रत्यक्ष श्रीनगरमध्ये उपस्थित राहून परिस्थितीचा आढावा घेत आपले कर्तव्य निभावले आहे. स्थानिक प्रशासनाच्या मदतीने, भंडाऱ्यातील हे पर्यटक व्यवस्थित आणि सुरक्षितपणे राज्यात परत येणार याची खात्री दिली जात आहे.
भविष्यात अशा घटना टाळण्यासाठी पर्यटकांच्या सुरक्षेचा विचार करून विशेष नियमावली तयार केली जाणार आहे. या घटनेने सरकारला जाग आणली आहे. केंद्र व राज्य सरकार एकत्रितपणे अशा परिस्थितीत लवकर प्रतिसाद देण्यासाठी नव्या उपाययोजना आखत आहेत.
दहशतवादी हल्ल्याच्या पार्श्वभूमीवर सरकारने घेतलेल्या निर्णयांनी जनतेत विश्वासाचं वातावरण निर्माण झालं आहे. भंडाऱ्यातील नागरिक सध्या आपल्या प्रियजनांच्या सुखरूप परतीची वाट पाहत आहेत. शासन त्यांच्यासोबत खंबीरपणे उभं आहे. आपत्तीच्या काळात ही तत्परता आणि समर्पण भविष्यातील संकटांवर मात करण्यास राज्याला नवी ऊर्जा देणार आहे.
