महाराष्ट्राच्या राजकीय वर्तुळात सध्या स्थानिक स्वराज्य संस्थेच्या निवडणुकीची रणधुमाळी रंगली आहे. आता नागपूर जिल्हा परिषदेच्या आरक्षण सोडतीनंतर अनेकांच्या भुवया उंचावल्या आहेत.
नागपूरच्या राजकीय मैदानात सध्या जिल्हा परिषदेच्या आरक्षण सोडतीने खळबळ माजली आहे. स्थानिक स्वराज्य संस्थांच्या निवडणुकींच्या रणधुमाळीत सर्वांचे डोळे नगर परिषदेनंतर जिल्हा परिषदेच्या आरक्षणाकडे लागले होते. नागपूर जिल्हा परिषदेचे आरक्षण सोडत जाहीर झाल्याने मात्र भाजपच्या अनेक दिग्गज नेत्यांना मोठा धक्का बसला आहे. ओबीसी सर्वसाधारण गटासाठी अध्यक्षपद राखीव झाल्याने पुरुष नेत्यांच्या अध्यक्षपदाच्या आशांना पूर्णविराम लागला आहे. गेल्या तेरा वर्षांत पहिल्यांदाच पुरुष नेत्याला ही संधी मिळण्याची चान्स होती. पण आरक्षणाने सर्वांचे पत्ते कापले. या सोडतीने राजकीय वर्तुळात चर्चेचा विषय ठरला असून, नेत्यांच्या घरी बसण्याची वेळ आली आहे.
भाजपचे जिल्हाध्यक्ष मनोहर कुंभारे हे अध्यक्षपदाचे प्रबळ दावेदार मानले जात होते. मात्र, त्यांचे सर्कल महिलांसाठी राखीव झाल्याने त्यांना धक्का बसला. आनंदराव राऊत, अनिल निधान, आतीष उमरे यांचे क्षेत्रही महिलांसाठी किंवा इतर राखीव गटांसाठी ठरल्याने त्यांचेही स्वप्न भंगले. मनोहर कुंभारे यांनी माजी मंत्री सुनील केदारांना मागे टाकून भाजपमध्ये प्रवेश केला होता. विधानसभा निवडणुकीत उमेदवारीची चर्चा असतानाही आशीष देशमुख यांना संधी मिळाली. बंडखोरी टाळण्यासाठी त्यांना काटोलचे जिल्हाध्यक्षपद देऊन शांत केले गेले. आता अध्यक्षपद ओबीसीसाठी राखीव झाल्याने त्यांचा डोळा तिथेच होता.
नेत्यांची आशा धुळीस
तेलकामठी आणि केळवद हे गट महिलांसाठी राखीव ठरले. मात्र, केळवदमधून त्यांच्या पत्नी सुमित्रा कुंभारे यांना संधी मिळण्याची शक्यता आहे. ज्यांनी यापूर्वी उपाध्यक्षपद भूषवले होते.रामटेकचे जिल्हाध्यक्ष आनंदराव राऊत यांचे नांद सर्कल अनुसूचित जमातीसाठी राखीव झाले, तर तास आणि मालेवाडा महिलांसाठी. भिवापूर तालुक्यात गट वाढला तरी त्यांना फायदा झाला नाही. विरोधी गट नेते आतीष उमरे यांचा टाकळघाट गट अनुसूचित जाती महिलांसाठी राखीव झाल्याने, अनुसूचित जाती असूनही त्यांना घरी बसावे लागेल. कदाचित त्यांच्या पत्नी रिंगणात उतरतील. अनिल निधान यांचा गटही महिलांसाठी राखीव ठरला.
माजी जिल्हा परिषद सदस्य सतीश डोंगरे, दुधराम सव्वालाखे यांचे क्षेत्रही राखीव झाले. आरक्षण सोडतीत सर्वत्र निराशा असली तरी काही नेते वाचले. पारशिवनी तालुक्यातील गोंडेगाव गटातील माजी सदस्य वेंकट कारेमोरे यांचा गट सर्वसाधारणसाठी राखीव आहे. ज्येष्ठ नेते म्हणून ते यापूर्वी निवडून आले आहेत. खात गटातील राधा मुकेश अग्रवाल आणि कैलाश बरबटे, कुही तालुक्यातील सिल्ली गटातील प्रमिला दंडारे, नागपूर ग्रामीणमधील कापसी खुर्द गटातील चंद्रशेखर राऊत यांना संधी मिळू शकते. उज्ज्वला बोढारे यांना जुन्या रायपूर गटात जावे लागेल. ही सोडत भाजपसाठी आव्हानात्मक असली तरी महिलांच्या उमेदवारींमुळे नव्या चेहर्‍यांना संधी मिळेल. राजकीय रणनीती आता आरक्षणाच्या चौकटीत बदलावी लागेल, ज्यामुळे निवडणुकीचा काँबॅट अधिक रोमांचक होईल.
