काँग्रेस नेते राहुल गांधींच्या मत चोरीच्या आरोपानंतर आता विरोधी पक्षनेते विजय वडेट्टीवार यांनीही भाजप महायुती सरकारवर भ्रष्टाचाराचा भडिमार केला आहे. राज्यात ४० टक्क्यांची वसुली सुरू असून हे लुटारू सरकार जनतेच्या घशात फास घालत असल्याचा त्यांचा स्फोटक आरोप आहे.
काँग्रेस नेते राहुल गांधी यांनी भाजपवर मत चोरीचे आरोप करून संपूर्ण देशाच्या राजकीय वातावरणात खळबळ उडवून दिली. महाराष्ट्रापुरते नव्हे तर देशभरातून भाजपविरोधी आक्रमक भूमिका घेतली जात असताना, राहुल गांधींनी पत्रकार परिषदेत निवडणूक आयोग आणि भाजपवर थेट बोट ठेवले. मात्र, आयोग आणि भाजपने ते आरोप फेटाळले. यावर काँग्रेसचे नेते, विधानसभेतील विरोधी पक्षनेते विजय वडेट्टीवार यांनी राहुल गांधींचे ठाम समर्थन करत, भाजपवर जोरदार निशाणा साधला.
वडेट्टीवारांनी आता पुन्हा एकदा सत्ताधाऱ्यांना थेट लक्ष्य केले आणि शब्दांच्या तोफेतून असे गोळे डागले की, राजकीय वर्तुळात चहाच्या टपऱ्यांपासून सोशल मीडियापर्यंत चर्चा पेटली. राज्यात भाजपा महायुतीचे लुटेरे सरकार बसले आहे. प्रचंड सत्ता, ईडी आणि सीबीआय ही हत्यारे आणि जनतेच्या घशात हात घालणारी 40 टक्क्यांची वसुली, हा तुमचा विकासाचा फॉर्म्युला का? असा रोखठोक सवाल त्यांनी केला.
Nitin Gadkari : टॅरिफचे गणित सोडवण्यासाठी केंद्रीय मंत्र्यांचे नवीन दृष्टीकोन
सत्ता सेठांची गुलामी
विजय वडेट्टीवार पुढे म्हणाले की, काँग्रेसने सत्ता कधीच सर्वोच्च मानली नाही. दलित, आदिवासी, अल्पसंख्याक, शेतकरी आणि कामगार यांचं कल्याण हेच आमचं ध्येय. पण भाजप फक्त दोन उद्योगपतींसाठी सरकार चालवत आहे. सत्ता सामान्य माणसासाठी असली पाहिजे, जनतेला जोडणारी असली पाहिजे. तुमची ओळख पदाने नाही, तर कर्तृत्वाने व्हायला हवी.
वडेट्टीवार यांनी पुढे छत्रपती शिवाजी महाराज, महात्मा गांधी, पंडित नेहरू आणि डॉ. बाबासाहेब आंबेडकर यांच्या कार्याचा दाखला देत विचारले की, हे महापुरुष जनतेसाठी लढले, प्राण पणाला लावले. पण तुम्ही कोणासाठी लढता? जनतेसाठी की काही उद्योगपतींच्या तिजोरीसाठी? वडेट्टीवारांनी सरकारच्या भ्रष्टाचारावर थेट घाव घालत सांगितले की, राज्यात प्रचंड लुट सुरू आहे. प्रत्येक प्रकल्पात, प्रत्येक करारात 40 टक्क्यांचे कमिशन लाटले जाते. हे सरकार जनतेचे नाही, तर कमिशनखोरांचे आहे.
Vijay Wadettiwar : व्हीव्हीपॅट शिवाय मतदान म्हणजे लोकशाहीवर कुऱ्हाड
हादरवणारा इशारा
भाषणाच्या शेवटी त्यांनी कार्यकर्त्यांना आणि जनतेला इशारा दिला. ही लूट थांबवायची असेल, तर घराघरात जा. लोकांच्या अडचणी, समस्या समजून घ्या. तुमच्या मुलांच्या भविष्यात हा भ्रष्टाचार घुसू देऊ नका. आज आवाज उठवला नाही, तर उद्या हा 40 टक्क्यांचा फास कायमचा बसेल. वडेट्टीवारांच्या या आक्रमक विधानांनी राजकीय पारा चढवला आहे. हा फक्त एक आरोप नाही, तर सत्तेच्या पाया हादरवणारा इशारा आहे आणि महाराष्ट्राच्या राजकारणात ही लढाई आता आणखी तापणार हे स्पष्ट आहे.
