महाराष्ट्रात 27 ऑगस्ट 2025 पासून गणेशोत्सव उत्साहात साजरा होत आहे. आमदार सुधीर मुनगंटीवार यांनी देखील आपल्या निवासस्थानी संपूर्ण कुटुंबासह गणपती बाप्पाचे स्वागत भक्तिभावाने केले.
महाराष्ट्रात गणेशोत्सवाची धूम पुन्हा एकदा अवतरली आहे. 27 ऑगस्ट 2025 पासून विघ्नहर्ता गणपती बाप्पाच्या स्वागतासाठी संपूर्ण राज्य भक्तिमय झाले आहे. रस्त्यांवर ढोल-ताशांचा गजर, मोदकांचा मधुर सुगंध आणि मिरवणुकींचा जल्लोष यांनी वातावरणात चैतन्य पसरले आहे. प्रत्येक घर सजले आहे. तर मनात भक्तीचा उल्हास दाटला आहे. गणरायाच्या आगमनाने केवळ भक्तच नव्हे, तर राजकीय नेतेही या उत्सवात रंगलेले दिसताहेत. प्रत्येकजण बाप्पाच्या चरणी आपल्या मनोकामना घेऊन हजर आहे. राज्याचे माजी वने, सांस्कृतिक कार्य व मत्स्यव्यवसाय मंत्री आमदार सुधीर मुनगंटीवार हे देखील गणरायाच्या भक्तीत रंगले आहेत.
सुधीर मुनगंटीवार यांनी आपल्या चंद्रपूर येथील निवासस्थानी गणरायाचे भक्तिभावाने स्वागत केले. संपूर्ण कुटुंबासह त्यांनी गणपती बाप्पाची विधीवत प्राणप्रतिष्ठा केली. मंत्रोच्चार, भक्तीगीते आणि मंगलमय वातावरणाने त्यांचे घर न्हाऊन निघाले. मुनगंटीवार, जे स्वतः महादेवाचे परम भक्त आहेत. ज्यांचे कुलदैवत राजेश्वर आहे, ते दरवर्षी गणेशोत्सव मोठ्या थाटामाटात साजरा करतात. त्यांच्या घरी धार्मिक कार्यक्रमांचा उत्साह आणि भक्तीचा रंग पाहण्यासारखा असतो. यंदाही त्यांनी बाप्पाच्या स्वागतात कोणतीही कसर सोडली नाही. मुनगंटीवार यांनी सांस्कृतिक मंत्री असताना महाराष्ट्राच्या सांस्कृतिक वारशाला नवी उंची दिली आहे. त्यांच्या कार्यकाळात शिवराज्याभिषेक सोहळा शासकीय खर्चाने साजरा होऊ लागला.
सामाजिक कार्यासाठी प्रार्थना
अनेक गड-किल्ल्यांचा कायापालट झाला. त्यांच्या या कार्यामुळे महाराष्ट्राच्या सांस्कृतिक वैभवाला खऱ्या अर्थाने समृद्धी प्राप्त झाली आहे. यंदाच्या गणेशोत्सवातही त्यांनी बाप्पाच्या चरणी प्रार्थना केली की, माझ्या हातून असेच कल्याणकारी कार्य होऊ दे आणि त्यासाठी मला शक्ती लाभो. चंद्रपूर येथील त्यांच्या निवासस्थानी गणरायाच्या आगमनाने घरात आनंदाचा लहर उठली आहे. गणपती बाप्पाचे आगमन म्हणजे फक्त सण नव्हे, तर एक नव्या प्रवासाची सुरुवात आहे, जी विघ्ने दूर करून यशाचा मार्ग मोकळा करते, असे मुनगंटीवार यांनी भावपूर्णपणे सांगितले. त्यांनी सर्वांसाठी सुख, शांती आणि आरोग्याची प्रार्थना केली.
विशेषतः महाराष्ट्रातील शेतकरी, शेतमजूर आणि दीन-दुर्बलांसाठी अखंड सेवेची शक्ती मागितली. त्यांच्या या शब्दांमधून त्यांची सामाजिक बांधिलकी आणि भक्ती यांचा सुंदर संगम दिसून येतो. गणेशोत्सव हा केवळ धार्मिक उत्सव नसून, महाराष्ट्राच्या सांस्कृतिक एकतेचे प्रतीक आहे. मुनगंटीवार यांनी आपल्या शुभेच्छा संदेशात म्हटले, गणपती बाप्पा सर्वांचे अडथळे दूर करो आणि प्रत्येकाच्या जीवनात आनंद, समृद्धी आणि सुख घेऊन येवो. त्यांनी सर्वांना कुटुंब आणि मित्रांसह हा उत्सव आनंदाने साजरा करण्याचे आणि आपल्या समृद्ध परंपरेचे जतन करण्याचे आवाहन केले. त्यांच्या घरी गणरायाच्या स्वागतातून निर्माण झालेले भक्तिमय वातावरण आणि त्यांची सामाजिक कार्याची तळमळ यंदाच्या गणेशोत्सवाला आणखी रंगत आणणारी ठरली आहे.
