महाराष्ट्रात सध्या स्थानिक स्वराज्य संस्थांच्या निवडणुकीची तयारी जोरात सुरू आहे. अशातच काळ्या सोन्याच्या शहरातही निवडणुकीचे रंग उधळताना दिसत आहेत.
महाराष्ट्राच्या राजकीय पटलावर सध्या स्थानिक स्वराज्य संस्थांच्या निवडणुकीची धामधूम सुरू आहे. यात चंद्रपूर जिल्हा हा एक असा भाग आहे, जिथे राजकीय समीकरणे वेगाने बदलत आहेत. ‘चांदा ते बांदा’ असा उल्लेख होणाऱ्या महाराष्ट्रातील ‘चांदा’ म्हणजे चंद्रपूर. हा जिल्हा राज्याचे ऊर्जा केंद्र म्हणून ओळखला जातो. इथे राज्यातील सर्वाधिक वीज उत्पादन होते. कोळसा खाणींची भरभराट आहे. मोठे सिमेंट कारखाने आणि पहिला कागद कारखाना यामुळे चंद्रपूरची ओळख अधिक दृढ होते. याशिवाय, राज्यातील सर्वाधिक वाघ आणि जंगले असलेला हा जिल्हा आहे.
दुसरीकडे, देशातील सर्वाधिक तापमान आणि प्रदूषणाची समस्या असलेला हा जिल्हा परस्पर विरोधी ओळखींनी भरलेला आहे. आता या चंद्रपूरमध्ये स्थानिक निवडणुकींमुळे राजकीय वातावरण चांगलेच तापले आहे. जिथे भाजप आणि काँग्रेसमध्ये जोरदार टक्कर दिसत आहे. गेल्या निवडणुकींची पार्श्वभूमी पाहता, लोकसभा निवडणुकीत भाजपचे सुधीर मुनगंटीवार आणि काँग्रेसच्या प्रतिभा धानोरकर यांच्यात चुरस होती. पण मुनगंटीवारांना मोठा धक्का बसला आणि धानोरकरांनी चंद्रपूरवर कब्जा केला. मात्र, विधानसभा निवडणुकीत भाजपने जोरदार कमबॅक केले. सहा विधानसभा मतदारसंघांपैकी पाच जागा भाजपने पटकावल्या.
Parinay Fuke : लाखांदूरच्या शेतकऱ्यांना आमदाराने मिळवून दिला न्याय
मुनगंटीवारांचे सक्रिय नेतृत्व
फक्त ब्रह्मपुरीत काँग्रेसचे विजय वडेट्टीवार यांनी विजय मिळवला. यामुळे चंद्रपूरमध्ये भाजपची पकड मजबूत झाली. आता स्थानिक स्वराज्य संस्थांच्या निवडणुकीत महानगरपालिकेची लढाई आहे. जिथे राजकीय डावपेच वेगाने बदलत आहेत. चंद्रपूर महानगरपालिकेत प्रभाग रचना ही 2017 प्रमाणेच ठेवण्यात आली आहे. जी भाजपसाठी अनुकूल आहे. गेल्या आठ वर्षांत शहराची लोकसंख्या आणि मतदार वाढले तरी प्रभाग ‘जैसे थे वैसे’ राहिली आहे. यामुळे भाजपला सत्ता कायम ठेवणे सोपे जाईल, असा विश्वास आहे. गेल्या काळात महापालिकेवर भाजपची सत्ता होती. आता ते नव्याने रणनीती आखण्यात व्यस्त आहे.
भाजपचे जेष्ठ नेते तथा आमदार सुधीर मुनगंटीवार बाळापूर विधानसभा मतदारसंघात सक्रियपणे काम करत आहेत. त्यांच्या अनुभवामुळे पक्षाला फायदा होईल असेही बोलल्या जात आहे. चंद्रपूरमध्ये भाजपची सत्ता असल्याने, या निवडणुकीत त्यांना सत्ता काबीज करणे अवघड नाही. मुनगंटीवारांसारख्या नेत्यांच्या नेतृत्वात पक्षाने मतदारांना विकासाच्या मुद्द्यांवर आकर्षित करण्याचे प्रयत्न सुरू केले आहेत. दुसरीकडे, महाविकास आघाडीचे समीकरण पाहता, काँग्रेसमध्ये अंतर्गत गटबाजी स्पष्ट दिसते. खासदार प्रतिभा धानोरकर आणि आमदार विजय वडेट्टीवार यांच्यातील कलह वारंवार उघड झाला आहे. यामुळे पक्षाला एकजूट राहणे कठीण जात आहे. या वादामुळे स्थानिक निवडणुकीत काँग्रेसला मोठी मेहनत करावी लागेल.
NDA vs INDIA : बिहार निवडणुकीच्या रणांगणात कोणाचा डंका वाजणार?
पक्षाने हे कलह सोडवण्याचे प्रयत्न केले तरी ते यशस्वी झाले नाहीत. जर धानोरकर आणि वडेट्टीवार यांनी वैयक्तिक वाद बाजूला ठेवून निवडणुकीवर फोकस केला नाही, तर काँग्रेसला सत्ता मिळवणे अशक्य होईल.
