मराठा आरक्षणाच्या प्रश्नावरून राज्यात पुन्हा एकदा राजकीय तापमान चढले आहे. महसूलमंत्री चंद्रशेखर बावनकुळे यांनी काँग्रेस आणि मनोज जरांगे पाटील यांच्यावर जोरदार पलटवार करत देवेंद्र फडणवीसांच्या बाजूने ठाम भूमिका मांडली.
महसूलमंत्री चंद्रशेखर बावनकुळे यांनी मराठा आरक्षणाच्या संदर्भात काँग्रेस आणि मनोज जरांगे पाटील यांच्यावर जोरदार प्रहार केला. मराठा आरक्षणाचा प्रश्न हा केवळ आंदोलनापुरता मर्यादित नसून, त्यामागे काही नेत्यांचा राजकीय हेतू दडलेला असल्याचा गंभीर आरोप करत त्यांनी काँग्रेस पक्षाच्या दुटप्पी भूमिकेवर बोट ठेवले. फडणवीस यांच्या नेतृत्वाखालील सरकारने मराठा समाजाला दिलेल्या आरक्षणाचा निर्णय आठवण करून देत बावनकुळे यांनी स्पष्ट केले की, आरक्षणाबाबतची खरी प्रामाणिक भूमिका केवळ भाजपनेच दाखवली आहे.
बावनकुळे म्हणाले की, शरद पवारांसह काँग्रेसचे अनेक मराठा मुख्यमंत्री सत्ता सांभाळून गेले. मात्र त्यांनी मराठा समाजाच्या हितासाठी कोणताही ठोस निर्णय घेतला नाही. उलटपक्षी, देवेंद्र फडणवीस यांनी सत्तेत आल्यानंतरच आरक्षणाबाबतचा क्रांतिकारी निर्णय घेतला. तो उच्च न्यायालय तसेच सर्वोच्च न्यायालयात टिकून राहिला. त्यामुळे काँग्रेस पक्षाने केवळ आरोप-प्रत्यारोपांच्या राजकारणावर भर देऊन समाजाला दिशाभूल करण्याचे काम केले आहे, असे ते म्हणाले.
Sudhir Mungantiwar : विघ्नहर्त्याच्या भक्तीत आमदार झाले विलीन
आरक्षणाच्या प्रश्नावरून लक्ष्य
बावनकुळे यांनी पुढे नमूद केले की, एकनाथ शिंदे यांनीही या विषयावर पुढाकार घेतला आहे. आज पुन्हा देवेंद्र फडणवीस आरक्षणाच्या प्रश्नावर ठामपणे उभे आहेत. तरीही समाजातील काही घटक आणि विरोधी पक्ष नेते फडणवीस यांनाच लक्ष्य करतात. केवळ ते मराठा नसल्यामुळे त्यांच्यावर प्रहार केला जात असल्याचा सूर त्यांनी उमटवला. हा प्रकार अन्यायकारक असून समाजाला दिशाभूल करण्याचा प्रयत्न असल्याचे त्यांनी म्हटले.
बावनकुळे यांच्या मते, काँग्रेसने अजूनही आपली खरी भूमिका स्पष्ट केलेली नाही. मनोज जरांगे पाटील यांच्या आंदोलनाला पाठिंबा देत असताना काँग्रेस मराठा समाजाला स्वतंत्र आरक्षण द्यायचे समर्थक आहे की ओबीसींच्या कोट्यातून आरक्षण द्यायचे याबाबत ती गोंधळलेली आहे. हा गोंधळ समाजात संभ्रम निर्माण करणारा आहे. काँग्रेसने जर ओबीसींचे आरक्षण कमी करून मराठा समाजाला देण्याचा समर्थनार्थ पवित्रा घेतला, तर तो थेटपणे मागासवर्गीयांच्या विरोधात जाईल, असे बावनकुळे यांनी स्पष्ट केले.
ओबीसींच्या हक्कावर गदा
बावनकुळे यांनी निदर्शनास आणले की, मागासवर्गीय समाजातील तब्बल 353 जाती आणि 18 पगार जातींचा आरक्षण हक्क कमी करून इतरांना देणे हे घटनाविरोधी पाऊल ठरेल. अशा संवेदनशील विषयावर काँग्रेसने भूमिका लपवून ठेवणे हा केवळ राजकीय स्वार्थासाठीचा खेळ आहे. राहुल गांधी एका बाजूने ओबीसींच्या समर्थनाचे बोल बोलतात, जातीय जनगणनेची मागणी करतात. तर दुसऱ्या बाजूला त्यांच्या पक्षाची या विषयावर ठोस भूमिका समोर आणण्यास टाळाटाळ करतात. हा दुटप्पीपणा समाजासाठी धोकादायक असल्याचे बावनकुळे म्हणाले.
बावनकुळे यांनी स्पष्ट केले की, कोणत्याही समाजाचे आरक्षण कमी करून दुसऱ्याला देणे हा अन्याय असेल. मराठा समाजाला आरक्षण मिळायलाच हवे, मात्र ते स्वतंत्र स्वरूपात द्यावे, ओबीसींचे हक्क अबाधित ठेवूनच हा निर्णय व्हावा, हा आमचा ठाम विश्वास आहे. मुख्यमंत्री देवेंद्र फडणवीस आणि उपमुख्यमंत्री एकनाथ शिंदेही ह्याच भूमिकेवर ठाम आहेत. आंदोलनकर्त्यांशी संवाद साधणे आवश्यक आहे, परंतु अंतिम निर्णय हा सर्व समाजांच्या हक्कांचा सन्मान राखूनच घेतला पाहिजे.
