उमेरड एमआयडीसीतील स्फोटानंतर पालकमंत्री चंद्रशेखर बावनकुळे यांनी तात्काळ मदतीची घोषणा केली. मृत व जखमी कामगारांच्या कुटुंबांना आर्थिक आणि रोजगाराच्या स्वरूपात आधार देण्यात आला आहे.
उमेरड एमआयडीसीतील एमएमपी कंपनीमध्ये घडलेल्या भीषण स्फोटात मृत पावलेल्या पाच कामगारांच्या कुटुंबांना 60 लाख रुपयांची मदत जाहीर करत पालकमंत्री चंद्रशेखर बावनकुळे यांनी राज्य शासनाच्या जबाबदारीची ठाम जाणीव करून दिली आहे. जखमी झालेल्या कामगारांवर मोफत उपचार आणि त्यांच्या कुटुंबातील एक व्यक्तीला कंपनीत नोकरी देण्याचा निर्णय घेत प्रशासनाने मानवतेचा आदर्श निर्माण केला आहे.
स्फोटाची दुर्घटना घडताच पालकमंत्री बावनकुळे यांनी स्वतः घटनास्थळी भेट दिली. त्यांच्यासोबत राज्यमंत्री ॲड. आशिष जयस्वाल, खासदार श्याम बर्वे, आमदार संजय मेश्राम, जिल्हाधिकारी डॉ. विपीन इटनकर यांच्यासह वरिष्ठ अधिकारी उपस्थित होते. त्यांनी परिस्थितीचा सखोल आढावा घेत औद्योगिक सुरक्षा यंत्रणांना जबाबदारीने काम करण्याचे स्पष्ट निर्देश दिले.
Akola : आमदार, खासदार सगळे चालते म्हणाला अन् कानाखाली आवाज आला
दोषींवर कारवाई अपरिहार्य
उमेरड एमआयडीसीतील एमएमपी कंपनीमध्ये घडलेल्या घटनेत पाच कामगारांचा मृत्यू झाला. सहा कामगार गंभीर जखमी झाले आहेत. यामध्ये पियुष दुर्गे, सचिन मसराम, निखिल शेंडे, अभिलाष जंजाळ व निखिल नेहारे या कामगारांचा समावेश आहे. त्यांच्या कुटुंबीयांना कंपनीमार्फत 55 लाख रुपये आणि शासनाकडून 5 लाख रुपये आर्थिक मदत दिली जाणार आहे. जखमी कामगारांना 30 लाख रुपयांची मदत तसेच मोफत वैद्यकीय उपचार करण्यात येत आहेत.
चंद्रशेखर बावनकुळे यांनी जिल्हा प्रशासनाला सर्वतोपरी मदतीचे निर्देश दिले आहेत. औद्योगिक सुरक्षेच्या नियमांची काटेकोर अंमलबजावणी केली जाईल, असेही स्पष्ट केले. या दुर्घटनेनंतर परिसरातील इतर कारखान्यांची सुरक्षा यंत्रणा तपासून पाहण्याच्या सूचनाही त्यांनी केल्या आहेत. औद्योगिक विकासासोबत कामगारांच्या सुरक्षेच्या दृष्टीने भविष्यातील धोरणे अधिक कठोर करण्याचा निर्धार त्यांनी व्यक्त केला आहे.
आधाराचा दृष्टिकोन
राज्य शासनाची भूमिका केवळ घटनांवर प्रतिक्रिया देणारी नाही. त्या संधींमध्ये बदलून पीडित कुटुंबांना सावरण्याची संधी देणारी ठरते, हे उमेरड दुर्घटनेच्या पार्श्वभूमीवर अधोरेखित होते. या अपघातातील मृत व जखमी कामगारांच्या कुटुंबातील एका सदस्याला कंपनीत थेट नोकरी दिली जाणार आहे. यामुळे केवळ आर्थिक मदतीपुरतीच जबाबदारी न ठेवता दीर्घकालीन पुनर्वसनाची प्रक्रिया सुरू केली गेली आहे.
चंद्रशेखर बावनकुळे यांच्या नेतृत्वात नागपूर जिल्ह्यात प्रशासनाची कार्यक्षम यंत्रणा सक्षम आहे. कोणतीही दुर्घटना घडल्यावर केवळ सांत्वन नव्हे तर ठोस मदतीचा हात देण्याचे उदाहरण या घटनेतून दिसून आले आहे. संकटाच्या वेळी सरकारची उपस्थिती ही जनतेसाठी विश्वास आणि आधार निर्माण करणारी ठरते, हे बावनकुळे यांच्या त्वरित कृतीतून पुन्हा सिद्ध झाले.
औद्योगिक विकासाच्या गतीसोबत कामगारांच्या सुरक्षेचा अजेंडा केंद्रस्थानी ठेवून प्रशासन अधिक जबाबदारीने पुढे येत आहे. पालकमंत्री चंद्रशेखर बावनकुळे यांच्या नेतृत्वात औद्योगिक नागपूरच्या सुरक्षित, समृद्ध आणि माणुसकीच्या मूल्यांवर उभ्या असलेल्या विकासदृष्टीकोनाला अधिक बळ मिळत आहे.
