राज्यातील विविध पूरग्रस्त भागांत तातडीची मदत व पुनर्वसन कार्य गतीमान सुरु आहे. पालकमंत्री चंद्रशेखर बावनकुळे यांच्या नेतृत्वाखाली सरकारच्या सर्व यंत्रणा सतत नागरिकांच्या सुरक्षिततेसाठी सज्ज आहेत.
राज्याच्या विविध भागांत निर्माण झालेल्या पूरस्थितीवर सरकारने सर्वतोपरी लक्ष केंद्रीत केले आहे. तातडीची मदत, बचावकार्य आणि पुनर्वसनाची प्रक्रिया युद्धपातळीवर राबवली जात आहे. मुख्यमंत्री देवेंद्र फडणवीस आणि आपत्ती व्यवस्थापन मंत्री गिरीश महाजन यांच्या सूचनेनुसार पूरग्रस्तांना आवश्यक मदत तत्काळ पोहोचवली जात आहे, अशी माहिती महसूल मंत्री व नागपूर-अमरावती जिल्ह्याचे पालकमंत्री चंद्रशेखर बावनकुळे यांनी दिली.
नियोजन भवन येथे प्रसार माध्यमांशी बोलताना बावनकुळे यांनी स्पष्ट केले की, सरकारच्या सर्व यंत्रणा सतर्कतेने कार्यरत आहेत. ज्या जिल्ह्यांमध्ये रेड अलर्ट घोषित केला आहे, त्या भागांत प्रशासनाकडून नागरिकांच्या सुरक्षिततेसाठी विशेष उपाययोजना राबवण्यात येत आहेत. पंचनाम्यांची प्रक्रिया सुरू असून जिल्हाधिकाऱ्यांना नुकसानभरपाईबाबत आवश्यक सूचना देण्यात आल्या आहेत. शिवाय मुंबईतील वॉर रूममधून प्रत्यक्ष परिस्थितीवर लक्ष ठेवले जात आहे.
मदतकार्याची सर्वंकष दिशा
पूरग्रस्त नागरिकांचे तात्काळ पुनर्वसन, निवारा केंद्रांची उभारणी, आरोग्य सुविधा व पिण्याच्या पाण्याचा पुरवठा यावर सरकारचा विशेष भर आहे. आपत्ती व्यवस्थापन विभागासोबत महसूल व पुनर्वसन विभाग समन्वयाने कार्यरत असून, पूरग्रस्तांसाठी धान्य, औषधे आणि आवश्यक जीवनावश्यक वस्तूंचा पुरवठा सतत सुरू आहे. जिल्हा प्रशासनापासून ग्रामपातळीवरील यंत्रणा सतर्क राहून कार्यवाही करत आहे. राज्यातील काही ठिकाणी पिकांचे मोठे नुकसान झाले आहे. शेतकऱ्यांच्या झालेल्या हानीचा तातडीने पंचनामा करून त्यांना मदत देण्याचे आदेश महसूल मंत्री बावनकुळे यांनी दिले आहेत. सरकारकडून दिल्या जाणाऱ्या या मदतीमुळे शेतकरी व सर्वसामान्यांना दिलासा मिळणार आहे.
राजकीय संदर्भात बोलताना बावनकुळे यांनी काँग्रेस नेते राहुल गांधींवर टीका केली. त्यांनी नमूद केले की, मतदार यादीचे पुनर्निरीक्षण ही सातत्याने सुरू राहणारी प्रक्रिया आहे. निवडणूक आयोगाने आक्षेप नोंदविण्याची वेळ दिली असताना काँग्रेसकडून कोणतीही कारवाई झाली नाही. मात्र आठ महिन्यांनंतर मतदार यादीवर दोषारोप करणे गैरजबाबदारपणाचे आहे. बावनकुळे यांनी पुढे स्पष्ट केले की, काँग्रेस पक्ष दिवसेंदिवस अस्तित्व गमावत आहे. त्यामुळे पराभवानंतर निवडणूक आयोग आणि ईव्हीएमवर आरोप करण्याचा मार्ग काँग्रेसने स्वीकारला आहे. विजय मिळाला तेव्हा ईव्हीएम योग्य आणि पराभव झाला की मशीन दोषपूर्ण असे म्हणणे लोकशाही प्रक्रियेला हरताळ फासणारे आहे.
विकसित नागपूरचे स्वप्न
शिक्षण क्षेत्रात गाजलेल्या शालार्थ आयडी घोटाळ्यावर भाष्य करताना बावनकुळे यांनी शिक्षकांना दिलासा दिला. अनेक संचालकांनी शिक्षकांच्या नावावर कर्ज घेऊन मोठ्या प्रमाणावर गैरव्यवहार केला आहे. या प्रकरणात शिक्षकांचा कोणताही दोष नाही. उलट संचालकांची संपत्ती जप्त करण्याची वेळ आली आहे. या संदर्भात मुख्यमंत्री, उपमुख्यमंत्री व शिक्षणमंत्री यांच्यासोबत चर्चा करून ठोस निर्णय घेण्यात येईल, असे त्यांनी स्पष्ट केले.
नागपूरच्या विकासाच्या संदर्भात बोलताना पालकमंत्री बावनकुळे यांनी 2019 पर्यंत विकसित नागपूर साकार करण्याचे ध्येय स्पष्ट केले. विकसित महाराष्ट्रासोबत विकसित नागपूर ही संकल्पना प्रत्यक्षात उतरवण्यासाठी तीन टप्प्यात नियोजन करण्यात येणार आहे. ग्रामीण भागात बचत गटांच्या माध्यमातून पशुधन विकास, महिलांसाठी रोजगारनिर्मिती, तसेच अधोसंरचनेच्या उभारणीसाठी अनेक योजना राबविण्यात येतील. जिल्हा नियोजन समितीमार्फत नागपूरसाठी मोठा निधी उपलब्ध करून देण्यात आला आहे. मुख्यमंत्री देवेंद्र फडणवीस यांच्या नेतृत्वाखाली नागपूरच्या सर्वांगीण प्रगतीला वेग मिळणार असल्याचे बावनकुळे यांनी सांगितले.
