लोकसभा आणि विधानसभा निवडणुकीत मिळालेल्या अपयशाला बाजूला ठेवून काँग्रेसने स्थानिक स्वराज्य संस्थेच्या निवडणुकीसाठी रणनीती आखण्यास सुरुवात केली आहे.
महाराष्ट्राच्या राजकीय पटांगणात नागपूरची भूमिका नेहमीच निर्णायक राहिलेली आहे. लोकसभा आणि विधानसभा निवडणुकीतील अपयशाच्या धक्क्यांनंतरही काँग्रेस पक्षाने आता स्थानिक स्वराज्य संस्थांच्या निवडणुकीसाठी आपले पाय रोवायला सुरुवात केली आहे. नागपुर महापालिका निवडणुकीची लढत चुरशीची अपेक्षित असताना, पक्षाने गेल्या पराभवाची धूळ झटकून नवीन रणनीती आखण्यास सुरुवात केली आहे. सहा विधानसभा मतदारसंघांमध्ये प्रभारी नेमून पक्षाने कार्यकर्त्यांना एकजुट करण्याचा प्रयत्न सुरू केला आहे. हा बदल फक्त संख्येचा नाही, तर पक्षाच्या आत्मचिंतनाचा आणि शहाणपणाचा पुरावा वाटतो.
मागील निवडणुकीतील अंतर्गत कलह आणि गोंधळाच्या आठवणींना आता काँग्रेसने धडा म्हणून घेतला असल्याचे दिसून येत आहे. नागपुरातील राजकीय वातावरणाने धुमाकूळ घातला असताना, काँग्रेसचे नेते रणजित कांबळे यांनी शहरातील सहा विधानसभा मतदारसंघांसाठी वेगवेगळे प्रभारी नेमले आहेत. ही नियुक्ती केवळ औपचारिक नाही, तर निवडणुकीपूर्वीच्या तयारीचा भाग आहे. शहर अध्यक्ष विकास ठाकरे यांच्या अध्यक्षतेखाली झालेल्या संयुक्त बैठकीत या प्रभार्‍यांनी आपापल्या क्षेत्रातील योजना मांडल्या. गेल्या विधानसभा निवडणुकीत सहा पैकी फक्त एकच जागा काँग्रेसला जिंकता आली होती.
Gadchiroli : मुख्यमंत्र्यांच्या पालक जिल्ह्यामध्ये महायुतीत उभी फूट?
चुकांपासून घेतला धडा
तर लोकसभा निवडणुकीतही मोठा धक्का बसला होता. अशा पार्श्वभूमीवर आता स्थानिक पातळीवर पक्षाने उत्साहपूर्ण पुनरागमनाची चित्रे काढायला सुरुवात केली आहे. कार्यकर्त्यांमध्ये उत्साह संचारला असून, प्रत्येकजण सक्रिय होण्यास तयार दिसतो. मागील नागपूर महापालिका निवडणुकीतील काँग्रेसचा अनुभव म्हणजे एक काळा अध्यायच होता. तिकीट वाटपातून उमटलेल्या वादांनी पक्षाला खूप नुकसान झाले होते. एका आमदाराच्या गाडीवर दगडफेक होण्यापासून ते एबी फॉर्म पळवून नेण्यापर्यंत गोंधळ माजला होता. या कलकलाटामुळे दीडशे पैकी केवळ 29 जागाच काँग्रेस जिंकू शकली. तर भाजपने १०८ जागा मिळवून विक्रम रचला.
मागील वेळी मुंबईतून शेवटच्या क्षणी उमेदवारीचे निर्णय होत असत, त्यामुळे स्थानिक नेत्यांमध्ये असंतोष वाढला होता. एका गटाला शंभर तिकिटे मिळाल्याने इतरांनी एकमेकांना पाडण्यातच वेळ घालवली. ज्यामुळे निवडणुकीत मोठा पराभव झाला. आता मात्र काँग्रेसने या चुकांपासून शिकण्याचा प्रयत्न केला आहे. प्रभारी नेमणुकीद्वारे प्रत्येक मतदारसंघात नियोजन होईल, अशी अपेक्षा आहे. हे पाऊल पक्षाच्या एकजुटीसाठी महत्त्वाचे ठरेल. या नवीन रणनीतीत प्रभारींची निवड अत्यंत विचारपूर्वक झाली आहे. दक्षिण-पश्चिम नागपूर मतदारसंघात प्रदेश सरचिटणीस शिवा शेट्टी, दक्षिण नागपूरमध्ये सरचिटणीस मोहम्मद नदीम, पूर्व नागपूरमध्ये सरचिटणीस सतीश वारजूरकर, मध्य आणि पश्चिम नागपूरमध्ये झिया पटेल, तर उत्तर नागपूरमध्ये सरचिटणीस किशोर बोरकर यांची नियुक्ती झाली आहे.
निवडणूक जवळ येताच कार्यकर्त्यांमध्ये उत्साहाची लहर उसळते. प्रत्येकजण लढायला उत्सुक असतो, पण यातून वादही निर्माण होतात. मागील अनुभवाने काँग्रेसला हे समजले आहे की, एकजूटच विजयाची गुरुकिल्ली आहे. आता प्रभारींच्या माध्यमातून प्रत्येक मतदारसंघात स्थानिक पातळीवर काम होईल, ज्यामुळे उमेदवारीचे वाद कमी होतील आणि नियोजन सुव्यवस्थित राहील.
