राज्यातील शेतकरी, बेरोजगार आणि महिलांच्या प्रश्नांकडे महायुती सरकारने दुर्लक्ष केल्याने जनतेत असंतोष वाढला आहे. काँग्रेस पक्षाने या मुद्द्यांवर सरकारला जाब विचारण्यासाठी राज्यव्यापी संघर्षाची तयारी सुरू केली आहे.
राज्यातील शेतकरी, बेरोजगार आणि महिलांच्या अपेक्षांचा भंग करत महायुती सरकारने पुन्हा एकदा जनतेच्या विश्वासाला तडा दिला आहे. निवडणुकीत दिलेली मोठमोठी आश्वासने आता फक्त घोषणांपुरतीच राहिली आहेत. शेतकऱ्यांच्या मदतीसाठी फसवे पॅकेज. महिलांसाठी कागदावरच अडकलेली योजना आणि बेरोजगारीवर मौन असा या सरकारचा कारभार ठरला आहे. राज्यातील असंतोष वाढत असताना काँग्रेस पक्षाने आगामी काळात मोठ्या प्रमाणात आंदोलनाची दिशा घेतली आहे.
राज्याच्या राजकारणात पुन्हा एकदा तापमान वाढवणारी घटना म्हणजे टिळक भवन येथे पार पडलेली महाराष्ट्र प्रदेश काँग्रेस कमिटीच्या पॉलिटिकल अफेअर्स कमिटीची बैठक. या बैठकीत प्रभारी रमेश चेन्नीथला यांच्या नेतृत्वाखाली राज्यातील राजकीय समीकरणांचा सखोल आढावा घेण्यात आला. या बैठकीला ज्येष्ठ नेते विजय वडेट्टीवार, बाळासाहेब थोरात, नाना पटोले, माणिकराव ठाकरे, सुशीलकुमार शिंदे, नसीम खान, वर्षाताई गायकवाड आदी मान्यवर उपस्थित होते.
Voter Registration Drive : शंभर टक्के मतदार, शंभर टक्के मतदान
सरकारला घेरणार काँग्रेस
बैठकीनंतर झालेल्या पत्रकार परिषदेत सरकारच्या फसव्या योजनांचा पर्दाफाश करण्यात आला. लाडकी बहीण योजनेसाठी सरकारकडे निधी नाही. आदिवासी आणि मागासवर्गीय कल्याणासाठी असलेला निधी वळवून महिलांच्या मतांवर डोळा ठेवण्याचा प्रयत्न होत असल्याचे स्पष्ट करण्यात आले. 2 हजार 100 रुपयांची घोषणा केली. असे असले तरी 1 हजार 500 रुपयांचा भरणाही वेळेवर होत नाही. शेतकऱ्यांच्या हेक्टरी 50 हजार रुपयांच्या नुकसान भरपाईच्या मागणीवर सरकारने केवळ तुटपुंजी मदत दिल्याचा आरोप करण्यात आला.
कर्जमाफीसारख्या निर्णायक विषयावर सरकार मौन बाळगत असल्याने ग्रामीण भागात असंतोष वाढत आहे. राज्यातील बेरोजगारी आणि धार्मिक तेढ या दोन गंभीर मुद्द्यांवर सरकारचे मौन म्हणजे जबाबदारीपासून पलायन असल्याचे काँग्रेसने ठणकावले. काही सत्ताधारी नेत्यांकडून धार्मिक सौहार्द भंग करण्याचे षडयंत्र सुरू असून प्रशासनाने त्याकडे दुर्लक्ष केले आहे.
Bihar Election : प्रशांत किशोर यांनी फेकला उमेदवारीचा दुसरा डाव
निवडणुकीतील घोटाळा
निवडणुकीतील घोटाळ्याबाबत काँग्रेसने सखोल तपासाची मागणी करत उद्या निवडणूक आयोगाला शिष्टमंडळ भेटणार असल्याची घोषणा करण्यात आली. राहुल गांधी यांनी सादर केलेल्या पुराव्यांनंतरही आयोगाकडून समाधानकारक प्रतिसाद न मिळाल्याने काँग्रेससह इतर विरोधी पक्ष आता एकत्र येऊन सरकारविरुद्ध पावले उचलणार आहेत. या शिष्टमंडळात बाळासाहेब थोरात, वर्षा गायकवाड, तसेच राष्ट्रवादी काँग्रेस (शरद पवार गट) व शिवसेना (उद्धव बाळासाहेब ठाकरे) यांचे नेते सहभागी होणार आहेत.
राज्याच्या राजकारणात नव्या समीकरणांची चाहूल देत राष्ट्रवादी काँग्रेसचे जालना जिल्हाध्यक्ष अब्दुल रशिद अब्दुल अजिज यांनी आपल्या शेकडो कार्यकर्त्यांसह काँग्रेसमध्ये प्रवेश केला. या प्रसंगी प्रभारी रमेश चेन्नीथला आणि प्रदेशाध्यक्ष हर्षवर्धन सपकाळ यांच्या उपस्थितीत पक्षात नव्या उर्जेची लाट निर्माण झाली. काँग्रेस पुन्हा एकदा संघर्षाच्या मैदानात उतरून राज्यातील दुर्लक्षित वर्गाच्या न्यायासाठी सज्ज झाली आहे.
