काँग्रेसच्या नेत्या यशोमती ठाकूर आणि खासदार बळवंत वानखडे यांनी किरीट सोमय्यांच्या अमरावती दौऱ्यावर टीका करत, जातीय तेढ निर्माण करून प्रशासनावर दबाव आणल्याचा आरोप केला.
महाराष्ट्राच्या राजकीय आकाशात पुन्हा एकदा वादळ उठलं आहे. यावेळी केंद्रस्थानी आहेत भाजपचे माजी खासदार किरीट सोमय्या. रोहिंग्या आणि बांगलादेशी घुसखोरांच्या मुद्द्यावरून देशभर गाजणारे सोमय्या सध्या महाराष्ट्राच्या दौऱ्यावर आहेत. पण त्यांच्या या दौऱ्याने विरोधकांचा राग अनावर झाला आहे. विशेषतः अमरावतीत त्यांच्या कृतींमुळे जातीय सलोख्याचे वातावरण धोक्यात येत असल्याचा आरोप काँग्रेसच्या नेत्या यशोमती ठाकूर आणि खासदार बळवंत वानखडे यांनी केला आहे. सोमय्यांच्या प्रत्येक पावलावर प्रश्नचिन्ह उपस्थित करत काँग्रेसने त्यांना चांगलेच घेरले आहे.
सोमय्या, जे नेहमीच भ्रष्टाचाराविरोधी लढ्यामुळे चर्चेत राहिले, आता अमरावतीत नव्या वादात सापडले आहेत. त्यांनी रोहिंग्या घुसखोरांना खोटे जन्मदाखले दिल्याचा आरोप करत स्थानिक प्रशासनावर दबाव टाकल्याचा दावा विरोधकांनी केला आहे. यशोमती ठाकूर यांनी संतप्तपणे विचारले, किरीट सोमय्या कोण आहेत? प्रत्येक निवडणुकीच्या तोंडावर यांना जाती-धर्मात तेढ निर्माण करण्याचं वेड का लागतं? त्यांनी पुढे सांगितले की, सोमय्यांच्या या कृतींमुळे अमरावतीच्या शांततामय वातावरणाला तडा जात आहे. जिल्ह्यात एकही रोहिंग्या सापडलेला नाही, तरीही हा गोंधळ का? हे सौहार्द बिघडवण्याचा डाव आहे, असा गंभीर आरोप ठाकूर यांनी केला.
सौहार्द राखणे गरजेचे
सोमय्यांच्या या आरोपांमुळे प्रशासनाने सर्व धर्मीयांच्या मुलांचे जन्मदाखले वितरण थांबवले आहे. यामुळे सर्वसामान्य नागरिकांना मोठ्या अडचणींचा सामना करावा लागत आहे. जन्म-मृत्यू नोंदी वेळेवर न झाल्याने अनेक गंभीर प्रश्न निर्माण होण्याची भीती आहे. खासदार बळवंत वानखडे यांनी यावर तीव्र आक्षेप नोंदवत म्हटले, सोमय्या वारंवार अमरावतीत येऊन प्रशासनाला धमकावत आहेत. खोटे गुन्हे दाखल करण्यासाठी दबाव टाकत आहेत. पण प्रशासनाने स्पष्ट केलंय की, जिल्ह्यात एकही रोहिंग्या नाही. मग हा सगळा खटाटोप कशासाठी? वानखडे पुढे म्हणाले, अमरावती ही शांततेची भूमी आहे. इथल्या सौहार्दाला तडा देण्याचा हा प्रयत्न आहे.
सोमय्यांच्या कृतींमुळे प्रशासन अडचणीत आले आहे. त्याचा फटका सामान्य माणसाला बसतोय. त्यांनी सरकारवरही निशाणा साधला. गेल्या दहा वर्षांपासून भाजपची सत्ता आहे. त्यांची यंत्रणा काय करतेय? घुसखोरांचा प्रश्न सोडवण्याऐवजी सामान्य नागरिकांना त्रास का दिला जातोय? असा सवाल त्यांनी उपस्थित केला. या सगळ्या गोंधळात अमरावतीच्या सामाजिक वातावरणावर परिणाम होत असल्याची चिंता व्यक्त होत आहे. यशोमती ठाकूर यांनी इशारा देताना म्हटले, जातीय तेढ निर्माण करण्याचे प्रयत्न खपवून घेतले जाणार नाहीत. महाराष्ट्रात आणि देशात सौहार्द राखली पाहिजे.
Akola : चार जिल्हाप्रमुख असलेली शिवसेना लागली कुत्र्यांच्या मागे
सोमय्यांच्या नाटकांना आता पूर्णविराम द्यावा लागेल. त्यांनी सरकारवरही प्रश्नचिन्ह उपस्थित केले की, सोमय्यांना प्रत्येक जिल्ह्यात जाऊन गोंधळ घालण्याचा अधिकार कोणी दिला? ते कुठल्या पदावर आहेत? माजी खासदार असणे म्हणजे कायदा हातात घ्यायचा परवाना नाही, असे ठाकूर यांनी ठणकावले.
