मनोज जरांगे पाटील यांच्या नेतृत्वाखाली मराठा आरक्षणासाठी मुंबईत सुरू असलेले उपोषण सरकारच्या मागण्या मान्य केल्यावर संपले आहे.
मुंबईच्या आझाद मैदानावर गेले अनेक दिवस मराठा समाजाच्या हक्कासाठी उभारलेला लढा अखेर यशस्वी ठरला आहे. मराठा समाजाच्या मागण्यांसाठी अहोरात्र उपोषणाला बसलेले नेते मनोज जरांगे पाटील यांनी अखेर आपले उपोषण मागे घेतले आहे. महायुती सरकारने त्यांच्या काही महत्त्वाच्या मागण्या मान्य केल्याने हा वाद संपुष्टात आला आहे. मराठा समाजाच्या लाखो कार्यकर्त्यांनी या आंदोलनाला पाठिंबा देत मुंबईच्या रस्त्यांवर एकजुटीचे दर्शन घडवले होते. आता सरकारच्या सकारात्मक निर्णयामुळे मराठा समाजात आनंदाचे वातावरण आहे. हैदराबाद गॅझेट, सातारा आणि औंध गॅझेटच्या अंमलबजावणीचा मार्ग मोकळा झाला आहे.
मराठा समाजाला ओबीसी प्रवर्गातून आरक्षण मिळावे, यासाठी जरांगे पाटील यांनी सुरू केलेल्या या आंदोलनाने इतिहास रचला आहे. आंदोलनादरम्यान लाखो मराठ्यांनी एकत्र येत आपली ताकद दाखवली. सरकारने आता मराठा समाजाच्या सामाजिक, शैक्षणिक आणि आर्थिक उन्नतीसाठी ठोस पावले उचलण्याचे आश्वासन दिले आहे. मनोज जरांगे यांनीही सरकारच्या या निर्णयाचे स्वागत केले असून, मराठा समाजाच्या भविष्यासाठी हा एक महत्त्वाचा टप्पा असल्याले म्हटले आहे. राज्य सरकारने या आंदोलनाला सकारात्मक प्रतिसाद देत अनेक मागण्या मान्य केल्या आहेत.
Parinay Fuke : दिला शब्द खरा ठरला, संविधानातच राहून निर्णय झाला
सातारा औंध गॅझेट
हैदराबाद गॅझेटची अंमलबजावणी, मराठा आंदोलकांवरील गुन्हे मागे घेणे, आंदोलनात बळी गेलेल्या कुटुंबीयांच्या वारसांना नोकरी, मराठा-कुणबी एक असल्याचा जीआर दोन महिन्यांत काढणे, सातारा आणि औंध गॅझेट 15 दिवसांत लागू करणे, तसेच 58 लाख कुणबी नोंदी ग्रामपंचायतीत लावण्याचा निर्णय यांचा समावेश आहे. याशिवाय, वंशवळ समिती गठित करून सगेसोयऱ्यांची छाननी करण्याचाही महत्त्वाचा निर्णय घेण्यात आला आहे. या निर्णयांमुळे मराठा समाजाला त्यांच्या हक्काची खात्री पटली आहे. राज्याचे उपमुख्यमंत्री अजित पवार यांनी या निर्णयाबाबत सविस्तर प्रतिक्रिया दिली आहे. मराठा समाजाच्या मागण्यांबाबत सरकारने पहिल्यापासून संवेदनशील भूमिका घेतली.
मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि मी स्वतः याबाबत सतत चर्चा करत होतो. मंत्रिमंडळ उपसमितीच्या शिफारशींवर तातडीने निर्णय घेण्यात आले. मराठा समाजाच्या प्रगतीसाठी आणि संपूर्ण महाराष्ट्राच्या विकासासाठी सरकार कटिबद्ध आहे, असे अजित पवार यांनी सांगितले. त्यांनी मराठा समाजाचे अभिनंदन करत समाजहितासाठी संवाद आणि ठोस निर्णयाची गरज असल्याचे स्पष्ट केले आहे. मनोज जरांगे पाटील यांच्या नेतृत्वाखालील या आंदोलनाने मराठा समाजाला नवे बळ दिले आहे. सरकारच्या या निर्णयामुळे मराठा समाजाला आपल्या हक्कासाठी लढण्याची प्रेरणा मिळाली आहे. आता या निर्णयांची अंमलबजावणी कशा पद्धतीने होते, याकडे साऱ्या महाराष्ट्राचे लक्ष लागले आहे.
Sudhakar Kohale : माजी आमदारांसह प्रवाशांनी घेतला इंडिगोचा थरारक अनुभव
मराठा समाजाच्या सामाजिक आणि आर्थिक उन्नतीसाठी हा निर्णय एक मैलाचा दगड ठरेल, असा विश्वास व्यक्त होत आहे. जरांगे यांनीही मराठा समाजाला एकजुटीने पुढे जाण्याचे आवाहन केले आहे. हा विजय मराठा समाजाचा आहे. आपण एकत्र राहिलो, तर कोणतीही लढाई जिंकू शकतो, असे त्यांनी ठामपणे सांगितले. मराठा आरक्षणाचा हा लढा आता एका नव्या वळणावर आला आहे. सरकार आणि समाज यांच्यातील संवादाने हा प्रश्न मार्गी लागला आहे.
