सिंहस्थ कुंभ 2027 साठी नाशिक-त्र्यंबकेश्वरमध्ये भव्य विकास योजना आखण्यात आली आहे. मुख्यमंत्री देवेंद्र फडणवीस यांच्या नेतृत्वाखाली 1हजार 100 कोटींची गुंतवणूक निश्चित करण्यात आली आहे.
नाशिक-त्र्यंबकेश्वर येथे 2027 मध्ये होणाऱ्या सिंहस्थ कुंभ मेळ्यासाठी महाराष्ट्र सरकारने व्यापक विकास आराखडा साकारण्याचा निर्धार केला आहे. मुख्यमंत्री देवेंद्र फडणवीस यांच्या नेतृत्वाखाली राज्य सरकारने 1 हजार 100 कोटी रुपयांची भव्य योजना जाहीर केली आहे. धार्मिक, आध्यात्मिक आणि पर्यटनाच्या दृष्टिकोनातून हा ऐतिहासिक प्रकल्प उभारला जाणार आहे.
योजनेंतर्गत त्र्यंबकेश्वर परिसराचा सर्वसमावेशक विकास करण्यात येणार आहे. कुंभमेळ्यात येणाऱ्या कोट्यवधी भाविकांसाठी जागतिक दर्जाच्या सुविधा उभारल्या जाणार आहे. महाराष्ट्राच्या सांस्कृतिक परंपरेचा एक नवा अध्याय लिहिला जाणार आहे.
पर्यटन केंद्राचा विकास
सिंहस्थ कुंभच्या तयारीअंतर्गत त्र्यंबकेश्वर मंदिर परिसरात विशेष दर्शनी मार्गिका उभारण्याचे नियोजन करण्यात आले आहे. भाविकांना सहज आणि सुव्यवस्थित दर्शन घेता यावे, यासाठी विस्तृत दर्शन मंडप, छायांकित मार्ग आणि अत्याधुनिक पार्किंग व्यवस्था तयार केली जाणार आहे. नाशिकच्या सांस्कृतिक वारशाला चालना देण्यासाठी आधुनिक आध्यात्मिक पर्यटन केंद्र उभारले जाणार आहे. जिथे भारतभरातील भक्तांसाठी वैविध्यपूर्ण धार्मिक आणि सांस्कृतिक उपक्रमांचे आयोजन होणार आहे.
पर्यावरणपूरक प्रकल्प
गंगा-गोदावरी संगम परिसरातील सर्व घाटांचे पुनरुज्जीवन करण्यात येणार आहे. नदीचे स्वच्छता अभियान हाती घेऊन जलशुद्धीकरणासाठी अत्याधुनिक STP (सीवेज ट्रीटमेंट प्लांट) उभारले जाणार आहेत. या माध्यमातून गोदावरी नदी प्रदूषणमुक्त करण्याचा संकल्प करण्यात आला आहे. यासोबतच, त्र्यंबकेश्वर आणि कुशावर्त तीर्थ याठिकाणी हिरवळ आणि पर्यावरणपूरक विकास प्रकल्प हाती घेण्यात येणार आहेत. ज्यामुळे भाविकांना शुद्ध आणि पवित्र वातावरणाचा अनुभव घेता येईल.
कुंभासाठी पायाभूत सुविधा
भाविकांच्या सोयीसाठी नाशिक आणि त्र्यंबकेश्वरमध्ये 11 नवीन पूल आणि विस्तृत रस्ते नेटवर्क तयार केले जाणार आहे. सिंहस्थ कुंभ दरम्यान होणारी प्रचंड गर्दी लक्षात घेऊन वाहतूक व्यवस्थापनासाठी अत्याधुनिक तंत्रज्ञानाचा वापर करण्यात येणार आहे. विशेषतः, साधुग्राम उभारणीसाठी आवश्यक जागा निश्चित करण्यात आली आहे. येथे अल्पकालीन तसेच दीर्घकालीन सुविधा उपलब्ध करून देण्यासाठी नियोजन सुरू आहे.
योजनांची पायाभरणी
भव्य योजनांच्या अंमलबजावणीसाठी मुख्यमंत्री देवेंद्र फडणवीस यांनी उच्चाधिकार समितीच्या बैठकीत तातडीने मंजुरी देण्याचे निर्देश दिले आहेत. नाशिकसाठी हे एक सुवर्णयुग ठरेल, कारण सिंहस्थ कुंभच्या निमित्ताने हा ऐतिहासिक शहराचा चौफेर विकास घडवला जाणार आहे. धार्मिक पर्यटनाच्या माध्यमातून महाराष्ट्राचा विकास हे सरकारचे ध्येय आहे. फडणवीस सरकारच्या दूरदृष्टीमुळे सिंहस्थ कुंभ 2027 हा एक जागतिक स्तरावर चर्चेचा विषय ठरणार आहे.
Sushant Singh Rajput Case : अनिल देशमुख यांच्या भूमिकेला समर्थनार्थ निवेदन
