राज्यात मराठा ओबीसी आरक्षणावर सुरू असलेल्या वादामध्ये राष्ट्रवादी काँग्रेसचे अजित पवार गटाचे नेते छगन भुजबळ यांनी तीव्र नाराजी व्यक्त केली आहे.
महाराष्ट्राच्या राजकीय रंगमंचावर सध्या मराठा-ओबीसी आरक्षणाचा वाद टिपेला पोहोचला आहे. मराठा आरक्षणाच्या मुद्द्यावरून सुरू झालेली ही आग आता ओबीसी कोट्यापर्यंत पसरली आहे. या वादाला तोंड फोडलं ते मनोज जरांगे पाटील यांनी. जरांगेंनी ओबीसी कोट्यातून मराठ्यांना आरक्षणाची मागणी केली. पण ही मागणी ओबीसी नेत्यांना आणि संघटनांना खटकली. सरकारने मराठा समाजाच्या काही मागण्या मान्य करत एक जीआर काढला, पण हा जीआर ओबीसी समाजाच्या जखमेवर मीठ चोळणारा ठरला. यातूनच राष्ट्रवादी काँग्रेस अजित पवार गटाचे ज्येष्ठ नेते छगन भुजबळ यांनी तीव्र नाराजी व्यक्त केली. भुजबळांनी मंत्रिमंडळ बैठकींना दांडी मारल्याच्या चर्चाही रंगल्या. पण या सगळ्या नाट्याला आता नवा ट्विस्ट आला आहे.
राज्याच्या राजकारणात आगामी स्थानिक स्वराज्य संस्थांच्या निवडणुकीच्या पार्श्वभूमीवर हा वाद पक्षासाठी डोकेदुखी ठरू शकतो. अजित पवार यांनी याच पार्श्वभूमीवर मुंबईतील हॉटेल ट्रायडंट येथे रात्री उशिरा राष्ट्रवादीच्या आमदारांची बैठक बोलावली. या बैठकीत अजितदादांनी थेट छगन भुजबळांना खडसावल्याची खमंग बातमी समोर आली आहे. मराठा आरक्षणाच्या जीआरवर भुजबळांनी घेतलेली आक्रमक भूमिका पक्षाची प्रतिमा डागाळत असल्याचा ठपका अजितदादांनी ठेवला. काही नेत्यांच्या टोकाच्या भूमिकांमुळे पक्षाला नाहक त्रास सहन करावा लागतो, असा टोला त्यांनी लगावला. हा टोला अर्थातच भुजबळांना उद्देशून होता, यात शंका नाही. छगन भुजबळांनी मराठा आरक्षणाच्या जीआरवर सातत्याने टीकास्त्र सोडलं आहे.
Maharashtra : 31 हजार कोटींची ‘मेजवानी’ विरोधकांना पचली नाही
आगामी घटनांचा अंदाज
आझाद मैदानावर त्यांनी या जीआरवर आक्षेप घेताना, हा जीआर दबावाखाली काढला गेला, हरकती-सूचना विचारात घेतल्या गेल्या नाहीत, असा गंभीर आरोप केला. जीआरमध्ये ‘कुणबी मराठा’, ‘मराठा कुणबी’ ऐवजी ‘मराठा समाज’ असा उल्लेख चुकीचा आहे, असंही ते म्हणाले. मराठा समाजाला आधीच SEBC कायद्याअंतर्गत 10 टक्के आरक्षण मिळालं आहे. त्यामुळे ओबीसी कोट्यावर अतिक्रमण करणं चुकीचं असल्याचं त्यांचं ठाम मत आहे. भुजबळांच्या या आक्रमक पवित्र्यामुळे मराठा आंदोलक मनोज जरांगे यांच्याशी त्यांचा शाब्दिक वादही तापला आहे. पण अजित पवारांनी या बैठकीत भुजबळांना स्पष्ट शब्दांत सुनावलं. एखाद्या जातीवर टोकाची भूमिका घेणं पक्षाला महागात पडतं, असं म्हणत त्यांनी भुजबळांना खडेबोल सुनावले. पक्षाची एकजूट आणि प्रतिमा जपण्यासाठी नेत्यांनी संयमाने वागावं, असा सूर त्यांनी लावला. यामुळे बैठकीत उपस्थित असलेल्या आमदारांमध्येही खळबळ उडाली.
भुजबळ आणि जरांगे यांच्यातील शाब्दिक चकमकी आता पक्षांतर्गत नाराजीत रूपांतरित होताना दिसत आहेत. या बैठकीत अजित पवारांनी आगामी स्थानिक स्वराज्य संस्थांच्या निवडणुकीसाठी आमदारांना आणि पदाधिकाऱ्यांना खास सूचना दिल्या. राज्याची आर्थिक परिस्थिती बिकट असतानाही शेतकऱ्यांना दिलासा देण्यासाठी पॅकेज जाहीर केलं आहे. विरोधक टीका करत असले तरी आपलं सरकार काम करत आहे, हे जनतेपर्यंत पोहोचवा, असं त्यांनी सांगितलं. युतीबाबत स्थानिक पातळीवर निर्णय घेण्याचं स्वातंत्र्यही त्यांनी दिलं. पुढील आठवड्यात जिल्हाध्यक्षांची बैठक घेऊन निवडणूक रणनीतीवर आणखी चर्चा होणार आहे. या सगळ्या घडामोडींमुळे राष्ट्रवादी काँग्रेसच्या गोटात खळबळ उडाली आहे. भुजबळांच्या नाराजीमुळे पक्षात फूट पडण्याची शक्यता आहे का? की अजितदादांचा हा दणका भुजबळांना शांत करेल? येत्या काही दिवसांत या नाराजीनाट्याचा पुढचा अंक काय असेल, हे पाहणं औत्सुक्याचं ठरेल.
Arvind Sawant : पुस्तक व बूट फेकणाऱ्यांच्या संस्कृतीहीन प्रवृत्तीला तिखट टीका
