राज्यात शेतकरी कर्जमाफीचा मुद्दा आधीच गाजत असताना, आता अतिवृष्टीमुळे शेतकऱ्यांच्या पिकांना झालेल्या नुकसानामुळे त्यांना हमीभाव देखील मिळत नसल्याचे स्पष्ट होत आहे.
महाराष्ट्राच्या मातीतील बळीराजा आजही कर्जाच्या ओझ्याखाली दबलेला आहे. शेतकरी कर्जमाफीचा मुद्दा गेल्या काही महिन्यांपासून राज्यात गाजत आहे. पण सरकारकडून अद्याप कोणताही ठोस निर्णय घेण्यात आलेला नाही. ऑगस्ट आणि सप्टेंबर महिन्यांत मुसळधार पावसाने राज्यात हाहाकार माजवला. तब्बल 30 जिल्ह्यांतील शेतकऱ्यांना या पावसाचा जबर फटका बसला आहे. सुमारे 17 लाख 85 हजार 714 हेक्टर क्षेत्र या निसर्गाच्या प्रकोपाने बाधित झाले. आधीच कर्जमाफी मिळाली नाही, त्यात पीक हातातून निसटले. या दुहेरी संकटात शेतकरी पुरता हतबल झाला आहे. जणू काही निसर्ग आणि सरकार दोघेही मिळून बळीराजावर अन्याय करत आहेत.
अशातच जळगावमध्ये शेतकऱ्यांच्या दुखण्याला वाचा फोडण्यासाठी एक भव्य जन आक्रोश मोर्चा काढण्यात आला. प्रहार संघटनेचे प्रमुख बच्चू कडू यांच्या नेतृत्वात हा मोर्चा निघाला. हजारोंच्या संख्येने शेतकरी रस्त्यावर उतरले. त्यांच्या हातात प्लेकार्ड्स, डोळ्यात रोष आणि मनात न्यायाची आस. मोर्चेकरांनी जिल्हाधिकारी कार्यालयावर धडक दिली, निवेदन सादर करण्याचा प्रयत्न केला. पण जिल्हाधिकारी बाहेर येण्यास तयार नव्हते. यामुळे बच्चू कडूंचा पारा चढला. पोलिसांनी गेटवर रोखण्याचा प्रयत्न केला, पण कडूंच्या धाडसी वृत्तीने ते गेटच तोडून आत घुसले. या घटनेने जिल्हाधिकारी कार्यालयात काही काळ गोंधळाचे वातावरण निर्माण झाले.
IPS Archit Chandak : सौहार्दाचा धागा मजबूत करणारे एसपी चांडक
सरकारच्या समितीवर सवाल
बच्चू कडूंसह विविध पक्षांचे नेते, पदाधिकारी आणि शेतकरी आत शिरले. त्यांनी प्रशासन विरोधात जोरदार घोषणाबाजी केली. जिल्हाधिकारी निवेदन घेण्यासाठी बाहेर का येऊ शकत नाहीत? असा थेट आणि धारदार सवाल बच्चू कडू यांनी उपस्थित केला. हा सवाल फक्त जिल्हाधिकाऱ्यांसाठी नव्हता, तर संपूर्ण सरकारी यंत्रणेला उद्देशून होता. शेतकरी पिकांना हमीभाव, कर्जमाफी आणि ओला दुष्काळ जाहीर करण्याच्या मागण्या घेऊन आले होते. पण उत्तर काय? फक्त शांतता आणि विलंब. 16 सप्टेंबर 2025 रोजी झालेल्या मंत्रिमंडळ बैठकीत शेतकऱ्यांना तातडीने मदतीची अपेक्षा होती. राज्यातील शेतकरी वर्ग कर्जमाफीच्या घोषणेची वाट पाहत आहेत. पण बैठकीत कुठलाही ठोस निर्णय न घेतल्याने पुन्हा एकदा निराशा पदरी पडली.
सरकार समितीचे कारण दाखवून वेळ कशाला दवडते? राज्यात गेल्या आठ महिन्यात 1 हजार 183 शेतकऱ्यांनी आत्महत्या केल्या आहेत. हे आकडे फक्त आकडे नाहीत. तर प्रत्येक आकड्यामागे एक कुटुंब उद्ध्वस्त झाले आहे. शेतकऱ्यांना सरसकट मदत जाहीर करावी, ही मागणी आता केवळ मागणी राहिलेली नाही, तर ती एक क्रांतीची ठिणगी बनली आहे.या मोर्चाच्या माध्यमातून शेतकऱ्यांनी आपल्या दुखण्याला वाचा फोडली. महाराष्ट्रातील शेती हा राज्याच्या अर्थव्यवस्थेचा कणा आहे. पण हा कणा आता कमकुवत होत चालला आहे. पावसाने पीक उद्ध्वस्त केले, कर्जाने जीव घेतला. अशा परिस्थितीत सरकार काय करत आहे? फक्त अभ्यास समित्या नेमत आहे? हे पुरेसे नाही. बच्चू कडूंनी या मुद्द्याला उचलून धरले आहे, ज्यामुळे शेतकरी एकत्र येत आहेत. जळगावच्या या मोर्चाने राज्यभरातील शेतकऱ्यांना प्रेरणा दिली आहे.
