गडचिरोली जिल्ह्यात माओवादी घातपात रोखण्यासाठी पोलिस व सिआरपीएफने संयुक्त कारवाई करत भामरागड परिसरात रेकी करणाऱ्या कट्टर नक्षल समर्थकाला अटक केली. या कारवाईमुळे परिसरातील माओवादविरोधी अभियानाला नवे बळ मिळाले आहे.
गडचिरोलीच्या घनदाट जंगलात, जिथे माओवाद्यांचा अंधार पसरलेला आहे. तिथे कायदा आणि सुव्यवस्थेची मशाल तेवत ठेवणाऱ्या गडचिरोली पोलीस दलाने आणि सीआरपीएफच्या जवानांनी पुन्हा एकदा आपली चमक दाखवली. भामरागडच्या दुर्गम परिसरात 30 सप्टेंबरला एका कट्टर माओवाद समर्थकाला जेरबंद करण्यात यश मिळाले. ही कारवाई म्हणजे माओवादाच्या काळ्या सावलीविरुद्धच्या लढ्याचा एक नवा अध्याय आहे. जिथे धैर्य, शौर्य आणि गुप्त माहितीच्या बळावर देशद्रोह्यांना खणखणीत प्रत्युत्तर देण्यात आले. गडचिरोली पोलीस दलाने जानेवारी 2022 पासून आतापर्यंत 110 माओवाद्यांना गजाआड करत आपली अजेयता सिद्ध केली आहे.
या थरारक कारवाईने माओवाद्यांच्या मनात धडकी भरवली आहे. भामरागडच्या जंगलातून मिळालेल्या गुप्त माहितीच्या आधारे, पोलीस आणि सीआरपीएफच्या जवानांनी एका संशयिताला ताब्यात घेतले. या व्यक्तीची चौकशी केली असता, त्याची खरी ओळख उघड झाली, त्याचे नाव सैनु ऊर्फ सन्नु अमलु मट्टामी, वय 38, भामरागडचा रहिवासी आणि माओवाद्यांचा कट्टर समर्थक होता. हा इसम घातपाताच्या कारवायांसाठी रेकी करत होता. ज्यामुळे देशाच्या सुरक्षेला गंभीर धोका निर्माण होऊ शकला असता.
Harshwardhan Sapkal : ये सरकार हमसे डरती है, पुलिसको आगे करती है
माओवादी समर्थक गजाआड
भामरागड पोलीस ठाण्याच्या हद्दीत 29 सप्टेंबरला सीआरपीएफच्या 37 बटालियनच्या जवानांनी आणि इंट सेल प्राणहिताच्या अधिकाऱ्यांनी मिळालेल्या गुप्त माहितीच्या आधारे कारवाईला वेग दिला. संशयित सैनु मट्टामी हा सुरक्षा दलाच्या हालचालींवर नजर ठेवत असल्याची खबर मिळाली. त्याला ताब्यात घेतल्यानंतर चौकशीतून धक्कादायक खुलासे झाले. हा इसम 27 ऑगस्टला कोपर्शी-फुलनार जंगलात झालेल्या चकमकीत सक्रिय सहभागी होता. जिथे माओवाद्यांनी पोलिसांवर हल्ला केला होता.
सैनु मट्टामीच्या अटकेने माओवाद्यांचे कंबरडे मोडले आहे. पोलीस उपविभागीय अधिकारी अमर मोहिते यांच्या नेतृत्वाखाली तपास सुरू असून, या इसमाच्या इतर देशविघातक कारवायांमधील सहभागाची पडताळणी होत आहे. विशेष पोलीस महानिरीक्षक संदीप पाटील, पोलीस अधीक्षक नीलोत्पल यांच्या मार्गदर्शनाखाली ही कारवाई यशस्वी झाली. नीलोत्पल यांनी माओवाद्यांना हिंसेचा मार्ग सोडून आत्मसमर्पण करण्याचे आवाहन केले आहे. गडचिरोली पोलीस आणि सीआरपीएफच्या या धडाकेबाज कारवाईने माओवाद्यांना पुन्हा एकदा इशारा दिला आहे की, कायद्याच्या कठोर हातापुढे त्यांचा टिकाव लागणार नाही.
