गणेशोत्सवाच्या उत्साहात महाराष्ट्रात राजकारणाचाही रंग चांगलाच उधळला जात आहे. नागरिकांना मोदकांसोबत आश्वासनांचे मोदक वाटले जात आहेत.
महाराष्ट्रात गणरायाच्या आगमनाने सगळीकडे उत्साहाची लाट उसळली आहे. 27 ऑगस्ट 2025 पासून गणेशोत्सवाला सुरुवात झाली आहे. विघ्नहर्ता गणपती बाप्पाच्या स्वागतासाठी प्रत्येक घर सजले आहे. रस्त्यावर मिरवणूक, ढोल-ताशांचा नाद आणि मोदकांचा सुगंध यांनी वातावरण चैतन्यमय झाले आहे. पण या उत्सवात फक्त भक्तच नाही, तर राजकारणीही रंगलेले दिसताहेत. गणरायाच्या चरणी प्रार्थना करताना, राजकीय नेतेही आपल्या घरी बाप्पाला आणून ‘रिद्धी-सिद्धी’ मागताना दिसताहेत. पण त्यांच्या मनात निवडणुकीचे गणितही तितकेच रंगतंय. राज्यात लवकरच स्थानिक स्वराज्य संस्थांच्या निवडणूक होणार आहे.
सुप्रीम कोर्टाच्या आदेशाने महापालिका निवडणुकीचा बिगुल वाजला आहे. येत्या काही महिन्यांत मतदानाचा मुहूर्त लागणार आहे. अशा वेळी बाप्पाचे नाव घेऊन प्रत्येक राजकीय पक्षाने आपली कंबर कसली आहे. प्रभाग रचनाही जाहीर झाली आहे. त्यामुळे राजकीय पक्षांचा उत्साह शिगेला पोहोचलाय. निवडणूक आयोगही आपले काम वेगाने करत आहे. पण या सगळ्या धामधुमीत, राजकीय पक्षांनी आश्वासनांचे मोदक वाटायला सुरुवात केली आहे. प्रत्येक मिरवणुकीत शक्तिप्रदर्शन आणि आश्वासनांचा वर्षाव पाहायला मिळतोय. पण प्रश्न असा आहे, की हे मोदक फक्त उत्सवापुरते आहेत की खरंच नागरिकांना त्याची चव चाखायला मिळणार?
Anup Dhotre : बडेजाव न करता खासदारांनी गणरायाला घातला सादगीचा हार
शेतकरी कर्जमाफीचा प्रश्न
गणेशोत्सवाचा रंग हा फक्त मिरवणुकीपुरता मर्यादित नाही. राजकीय पक्षांनी आपल्या आश्वासनांच्या पेटाऱ्या उघडल्या आहेत. पण या आश्वासनांचा गोडवा किती खरा आहे, हा प्रश्न नागरिकांच्या मनात घोळतोय. गेल्या काही महिन्यांपासून शेतकरी कर्जमाफी, अतिवृष्टीमुळे झालेल्या नुकसानीचा प्रश्न आणि मराठा आरक्षणाचा मुद्दा यांनी राज्याचे राजकारण ढवळून निघाले आहे. शेतकरी कर्जमाफीच्या प्रतीक्षेत असताना, अनेक शेतकरी आर्थिक संकटात सापडले आहेत. आत्महत्यांचे सत्र थांबलेले नाही. शेतकऱ्यांना खरंच कर्जमाफीचा मोदक मिळणार का, हा प्रश्न कायम आहे. महायुती सरकारने 2024 विधानसभा निवडणुकीपूर्वी लाडकी बहीण योजनेची घोषणा करून सर्वांचे लक्ष वेधले होते.
दरमहा 1 हजार 500 रुपये देण्याचे आश्वासन दिले गेले. नंतर ते 2 हजार 100 रुपये करण्याची घोषणाही झाली. पण लाडक्या बहिणींच्या खात्यात हे पैसे अद्याप जमा झालेले नाहीत. त्यामुळे यंदाच्या गणेशोत्सवात तरी हा आश्वासनांचा मोदक त्यांना चाखायला मिळणार का, की हा फक्त निवडणुकीचा गोडवा ठरेल? नागरिकांच्या मनात हा प्रश्न सतावतोय. गणेशोत्सव हा महाराष्ट्राचा सांस्कृतिक आत्मा आहे. यंदा त्यात राजकीय रंगही चांगलाच मिसळलाय. प्रत्येक मिरवणुकीत राजकीय पक्षांचे शक्तिप्रदर्शन, कार्यकर्त्यांचा उत्साह आणि आश्वासनांचा माहोल यामुळे गणेशोत्सवाला वेगळीच रंगत आली आहे. पण बाप्पाच्या प्रसादात मोदकांबरोबर आश्वासनंही वाटली जात असली, तरी ती प्रत्यक्षात उतरतील का, हा खरा प्रश्न आहे.
