भंडारा-गोंदिया जिल्ह्यात महायुती सरकारच्या सहकार क्षेत्रातील यशामागे माजी मंत्री आमदार डॉ. परिणय फुके यांचे कुशल नेतृत्व आणि समन्वय कौशल्य ठरले.
पूर्व विदर्भातील वैनगंगेच्या तीरी आता राजकारणाची नवी प्रतिमा उभी झाली आहे. जिथे शिवसेना, राष्ट्रवादी काँग्रेस आणि भाजप ही महायुती सरकार एकत्र काम करत आहे. जसे राज्यात देवेंद्र फडणवीस आणि अजित पवार यांची जोडी ‘देवा भाऊ आणि अजित दादा’ म्हणून ओळखली जाते. तशीच दादा-भाईजीची एक खास जोडी आता पूर्व विदर्भातही चर्चेचा विषय बनली आहे. पूर्व विदर्भाच्या राजकीय रंगमंचावर एक नवा अध्याय लिहिला गेला आहे. या कथेचे नायक आहेत, भाजपचे माजी मंत्री आमदार डॉ. परिणय फुके. बुद्धिबळाच्या पटावर ज्याप्रमाणे प्यादे सावधपणे पुढे सरकवले जातात, तसेच राजकीय रणनीतीत डॉ. परिणय फुके यांनी आपल्या चतुरस्र खेळाने महायुतीचा झेंडा भंडारा-गोंदिया जिल्ह्यात फडकवला. पण यशाचे हे वैभव त्यांनी स्वतःच्या खिशात न ठेवता, उदार मनाने महायुतीच्या खात्यात जमा केले.
डॉ. फुके यांच्या या कृतीने एकच संदेश गेला दादा आणि भाईजी यांची जोडी अजेय आहे. सहकार क्षेत्रात महायुतीने मिळवलेले यश हे केवळ संख्यांचा खेळ नाही, तर डॉ. परिणय फुके यांच्या रणनीती आणि कार्यकर्त्यांच्या मेहनतीचे फलित आहे. भंडारा-गोंदिया जिल्ह्यातील शेतकरी संघटना, दुग्ध संघ आणि जिल्हा मध्यवर्ती बँकेच्या निवडणुकीत महायुतीने निर्विवाद वर्चस्व गाजवले. या यशाचा पाया रचला तो डॉ. परिणय फुके यांनी. ज्यांनी प्रत्येक पाऊल विचारपूर्वक टाकले. पण विशेष म्हणजे, त्यांनी या विजयाचे श्रेय स्वतः घेण्याऐवजी सर्व कार्यकर्त्यांना आणि महायुतीला समर्पित केले. हे यश माझ्या एकट्याचे नाही, तर प्रत्येक कार्यकर्त्याच्या कष्टाचे आहे, असं म्हणत त्यांनी आपल्या नेतृत्वाची उदारता दाखवून दिली. नुकत्याच पार पडलेल्या सहकार क्षेत्रातील निवडणुकीनंतर गोंदिया जिल्ह्यात नवनिर्वाचित संचालक मंडळाचा सत्कार समारंभ आयोजित करण्यात आला.
संस्कारांनी घडलेले नेतृत्व
सोहळ्यात डॉ. परिणय फुके यांनी सर्वांचे लक्ष वेधले. त्यांनी केवळ यशाचे सेलिब्रेशन केले नाही, तर महायुतीच्या एकजुटीचा संदेशही दिला. आम्ही निवडणुकीत एकमेकांविरुद्ध लढलो असलो, तरी निवडणुकीनंतर आम्ही सर्वसामान्य जनतेचे सेवक आहोत, असं म्हणत त्यांनी राजकारणात संस्कार आणि मूल्यांचे महत्त्व स्पष्ट केले. या यशामागे प्रफुल पटेल यांचे वडील मनोहरभाई पटेल यांचे संस्कार आणि मार्गदर्शन असल्याचेही डॉ. फुके यांनी नमूद केले. डॉ. परिणय फुके यांनी आपल्या भाषणात एक किस्सा सांगितला. काँग्रेसचे प्रदेशाध्यक्ष नाना पटोले यांच्यावर टीका करताना डॉ. फुके म्हणाले, नाना पटोले ज्या काँग्रेस कार्यालयात बसून प्रफुल पटेल यांच्यावर टीकेचे बाण सोडत होते, ती जागा खुद्द प्रफुल पटेल यांच्या वडिलांनी मोफत दिली होती. या वाक्याने उपस्थितांमध्ये हशा पिकला, पण त्याचवेळी डॉ. फुके यांनी आपल्या तिखट शैलीत विरोधकांना टोमणा मारला.
डॉ. परिणय फुके यांनी प्रफुल पटेल यांचेही मनापासून कौतुक केले. प्रफुल पटेल हे महायुतीच्या तिन्ही पक्षांना एकत्र ठेवणारे फेविकॉल आहेत, असं म्हणत त्यांनी पटेल यांच्या समन्वयक कौशल्याला सलाम केला. मागील साडेतीन वर्षांपासून प्रफुल पटेल यांनी भाजप, शिवसेना आणि राष्ट्रवादी काँग्रेस यांना एका धाग्यात बांधले आहे. भंडारा-गोंदियाचे भूमिपुत्र म्हणून पटेल यांच्याकडे बघितल्या जाते. त्यांनी नेहमीच स्थानिक प्रश्नांना राज्य आणि केंद्र स्तरावर वाचा फोडली आहे. लोकसभा निवडणुकीत महायुतीला समन्वयाच्या अभावामुळे काही अडथळे आले. पण विधानसभा निवडणुकीत डॉ. परिणय फुके आणि प्रफुल पटेल यांनी कार्यकर्त्यांचे मन जुळवले. आम्ही एकत्र बसलो, एकत्र लढलो आणि एकत्र जिंकलो, असे डॉ. फुके म्हणाले. त्यांच्या या शब्दांनी कार्यकर्त्यांमध्ये नवचैतन्य निर्माण झाले.
एकजुटीचा यशस्वी मंत्र
डॉ. फुके यांनी हेही स्पष्ट केले की, इतर जिल्ह्यांमध्ये पक्षांमध्ये अंतर्गत वाद असले, तरी भंडारा-गोंदियात महायुती एकसंध आहे. याचे श्रेय मनोहर पटेल यांच्या संस्कारांना आणि प्रफुल पटेल यांच्या नेतृत्वाला जाते. डॉ. परिणय फुके यांनी आपल्या भाषणातून एक गोष्ट स्पष्ट केली की, राजकारणात यश मिळवायचे असेल, तर एकजूट हाच मंत्र आहे. त्यांनी कार्यकर्त्यांना आवाहन केले की, निवडणूक संपल्यानंतर पक्षांचे रंग बाजूला ठेवून सर्वांनी जनतेच्या सेवेसाठी एकत्र यावे. त्यांच्या या शब्दांनी उपस्थित कार्यकर्त्यांमध्ये उत्साह संचारला. आम्ही नेहमीच लोकांचे प्रश्न घेऊन शासन दरबारी जातो. मात्र जे आम्हाला जमले नाही, ते प्रफुल पटेल पूर्ण करतात, असं म्हणत डॉ. फुके यांनी आपल्या आणि पटेल यांच्या जोडीचे महत्त्व स्पष्ट केले. त्यांनी महायुतीच्या यशाला नवी उभारी दिली आहे. ‘दादा-भाईजी’च्या जोडीने पूर्व विदर्भात एक नवा इतिहास रचला आहे.
