पक्षाच्या अनेक कार्यक्रमांतून ‘तुम्ही येथे अपेक्षित नाही’ असं सांगत बाहेर काढलं गेलं. निवडणुकीत पक्षातून बाहेर काढलं. पक्षानं कदर केली नाही. पण अकोल्यातील हरीश अलीमचंदानी यांनी विचारधारेशी एकनिष्ठ असल्याचं दाखवून दिलं आहे.
राष्ट्रीय स्वयंसेवक संघाचा शताब्दी महोत्सव साजरा होत आहे. मनानं स्वयंसेवक असलेल्या नरेंद्र मोदींपासून मुख्यमंत्री देवेंद्र फडणवीस यांच्यापर्यंत सगळेच नेते संघाच्या या उत्सवात सहभागी झाले आहेत. अशात ज्या संघाच्या भरवश्यावर अकोल्यातील भाजप नेते गब्बर झाले, त्यांना संघाच्या पथसंचलनात गणवेश धारण करून सहभागी होण्याची लाज वाटली. परंतु या पथसंचलनात भाजपच्या एका माजी नेत्यानं सर्वांचं लक्ष वेधून घेतलं. हे व्यक्ती म्हणजे भाजपचे माजी पदाधिकारी तथा माजी नगराध्यक्ष हरीश अलीमचंदानी.
पैशांच्या जोरावर भाजपला आणि नेत्यांना आम्ही पायाशी लोळण घ्यायला लावतो, अशी फुशारकी अकोला जिल्ह्यातील दोन नेते आणि त्यांचे चट्टेबट्टे मारत असतात. या नेत्यांना राष्ट्रीय स्वयंसेवक संघाच्या जोरावर निवडणूक जिंकता आली. परंतु पथसंचलनात संघाचा गणवेश अंगावर घालण्याची त्यांना लाज वाटली. त्यामुळं ते संघाच्या वाट्यावर फिरकले नाहीत. मात्र हरीश अलीमचंदानी यांनी संघाच्या गणवेशात पथसंचलनात सहभाग घेत सर्वांचं लक्ष वेधून घेतलं.
विचारांशी एकनिष्ठच
अकोला पश्चिम विधानसभा निवडणुकीत राष्ट्रीय स्वयंसेवक संघानं हरीश अलीमचंदानी यांचं नाव पुढं केलं होतं. मात्र आमच्या ‘भाऊंनी’ अमित शहा यांना खोकेच्या खोके दिले. चंदूभाऊंना सेट केलं असा प्रचार दोन नेत्यांचे चेलेचपाटे करीत होते. ऐनवेळी अलीमचंदानी यांच्या नावाला कात्री लागल्यानं यात तथ्य असल्याचं लोकांना वाटू लागलं. त्यामुळं ऐन निवडणुकीत अकोला भाजमधील अनेक नेते विरोधात पक्षाच्या आणि नेत्यांच्या विरोधात गेले. त्यांनी हरीश अलीमचंदानी यांना पक्षातून बाहेर काढायला प्रदेश कार्यकारिणीला भाग पाडलं.
चंदूभाऊ काय अन् देवाभाऊ काय, आम्ही सांगू तेच करतात, असे हे नेते अकोल्यात सांगत असतात. या नेत्यांच्या कथनावर विश्वास ठेवत भाजपनं अलीमचंदानी यांना वनवासाची शिक्षा केली. मात्र अलीमचंदानी यांनी आपण विचारधारेशी एकनिष्ठ असल्याचं आपल्या कृतीतून दाखवून दिलं. जे लोक अकोल्यातील महापालिका सभागृहाला ‘शहिदे आजम टिपू सुलतान सभागृह’ असं नाव देतात, ते भाजपला चालतात. मग आपण तर अंतरात्म्यातून भाजपवासी आहोत, संघ स्वयंसेवक आहोत, हे अलीमचंदानी यांनी कृतीतून दाखवून दिलं.
Vidarbha Connectivity : अकोला मार्गे ‘अमृत भारत एक्सप्रेस’ची धाव
गणवेश अन् काठी
हरीश अलीमचंदानी यांनी संघाच्या अकोला येथील पथसंचलात सहभाग घेतला. माजी नगराध्यक्ष असल्यानं ते पुढे पुढे करू शकले असते. मात्र त्यांनी पथसंचलनात आपल्याला नेमून दिलेल्या स्थानावर राहणे पसंत केले. भाजपमध्ये पद नसतानाही पुढे पुढे करणाऱ्यांची कमी नाही. पाण्यासारखा पैसा खर्च केला, पण ‘विजय’ मिळाला नाही. मात्र आमदारासाखा आव आणण्याची सवय असलेले अनेक माजी महापौर भाजपमध्ये आहेत. त्यांच्या तुलनेत अलीमचंदानी यांनी खरा स्वयंसेवक कोण हे दाखवून दिल्याची चर्चा संघाच्या वर्तुळात आहे.
पक्षासाठी रक्ताचं पाणी केलेल्यांना भाजपनं अकोल्यात सडवत ठेवलं आहे. पण राष्ट्रीय स्वयंसेवक संघानं त्यांच्याशी एकनिष्ठ असलेल्या अशा स्वयंसेवकांना आपल्या परिश्रमाचं फळ देण्याची वेळ आता आली आहे. संघाच्या शताब्दी महोत्सवाच्या निमित्तानं मूर्तिजापूरचे आमदार हरीश पिंपळे, किशोर मांगटे पाटील, जयंत मसने, हरीश अलीमचंदानी, अनुप शर्मा, प्रतुल हातवळणे, गिरीश गोखले आदींनी विचारधारेशी एकरुपता आणि एकनिष्ठता काय असते हे कृतीतून दाखवून दिलं आहे. या सर्वांना आपापल्या निष्ठेचं फळ संघ नक्कीच देईल, अशी चर्चा सध्या आरएसएस वर्तुळात आहे.
