देशाच्या राजकारणात सध्या तालिबान परराष्ट्र मंत्र्यांची पत्रकार परिषद चर्चेचा विषय ठरत आहे. काँग्रेसने भाजपवर मोठे आरोप केले आहे.
देशाच्या लोकशाहीच्या मुळाशी असलेल्या माहितीच्या अधिकाराला कमकुवत करून भारतीय जनता पक्ष (भाजप) भारताला तालिबानच्या दिशेने नेत आहे, असा गंभीर आरोप महाराष्ट्र प्रदेश काँग्रेस कमिटीचे अध्यक्ष हर्षवर्धन सपकाळ यांनी केला आहे. टिळक भवन येथील पत्रकार परिषदेत बोलताना सपकाळ यांनी भाजप सरकारवर जोरदार हल्ला चढवला. काँग्रेसच्या डॉ. मनमोहनसिंग सरकारने 2005 मध्ये आणलेल्या माहितीच्या अधिकार कायद्याने (आरटीआय) जनतेला सरकारच्या कारभारावर नजर ठेवण्याची ताकद दिली होती. भ्रष्टाचार उघडकीस आणणारा हा कायदा लोकशाहीचा कणा ठरला.
2014 पासून मात्र सत्तेत आलेल्या मोदी सरकारने यात बदल करून हा कायदा नखदंतहीन केला आहे, असा घणाघात सपकाळ यांनी केला. सपकाळ पुढे म्हणाले, माहितीचा अधिकार हा जनतेचा मूलभूत हक्क आहे. पण भाजप सरकारने विचारलेली माहिती न देणे, माहिती आयुक्तांची पदे रिक्त ठेवणे, वैयक्तिक माहितीचा बहाणा करून माहिती लपवणे, असे प्रकार सुरू केले आहेत. इतकेच नाही, तर रिझर्व्ह बँक, निवडणूक आयोगासारख्या महत्त्वाच्या संस्थांना आरटीआयच्या कक्षेतून बाहेर काढले आहे. मतदानाचे सीसीटीव्ही फुटेज न देणे, नोटबंदी आणि मतचोरीसारखे घोटाळे लपवण्यासाठीच हे सगळे सुरू आहे.
महिलांसाठी सन्मानाचा मुद्दा
काँग्रेस पक्ष हा कायदा पुन्हा सक्षम करण्यासाठी जनजागृती करेल आणि आवाज उठवेल, असेही त्यांनी ठणकावले. भाजपच्या तालिबानी मानसिकतेचा दाखला देताना सपकाळ यांनी तालिबानच्या परराष्ट्र मंत्र्याच्या दिल्लीतील पत्रकार परिषदेत महिला पत्रकारांना बंदी घालण्याच्या घटनेचा उल्लेख केला. हा तालिबानी फतवा भारतात लागू करणाऱ्या भाजपचा निषेध आहे. काँग्रेसच्या पत्रकार परिषदेत महिलांना सन्मानाने आमंत्रित केले जाते, अशी टिप्पणीही त्यांनी केली. यासोबतच, मुख्यमंत्री देवेंद्र फडणवीस यांच्यावरही त्यांनी टीकास्त्र सोडले. फडणवीस समाजात फूट पाडण्याचे षडयंत्र रचत आहेत.
इंग्रजांच्या ‘फोडा आणि राज्य करा’ धोरणाचा अवलंब करत ते थंड डोक्याने समाजात भांडणे लावत आहेत. नथुरामने ज्याप्रकारे थंड डोक्याने गांधींची हत्या केली, त्याच पद्धतीने फडणवीस काम करतात. यात त्यांची तुलना नाही, पण कार्यपद्धती एकच आहे, असे सपकाळ म्हणाले. राज आणि उद्धव ठाकरे यांच्या भेटीवर बोलताना सपकाळ यांनी सकारात्मक भूमिका मांडली. आम्ही भारत जोडणारे आहोत. दोन भावांनी एकत्र यावे, यात आम्हाला काहीच हरकत नाही. इंडिया आघाडीत कोणाला सामील करायचे, हा निर्णय आघाडीतील पक्ष घेतील, असे त्यांनी स्पष्ट केले. तसेच, अहिल्यानगर जिल्ह्यातील अलीकडच्या घटनांवरून राज्यात शांतता भंग करण्याचे षडयंत्र रचले जात असल्याचा आरोप त्यांनी केला. जातीय सलोखा बिघडवणारी विधाने करणाऱ्या संग्राम जगताप यांच्यासारख्या नेत्यांना त्यांच्या पक्षाने दम दिला आहे. पण तरीही दंगली घडवण्याचे प्रयत्न सुरू आहेत, असे सपकाळ म्हणाले.
