स्थानिक स्वराज्य संस्था निवडणुकीसाठी राष्ट्रवादी काँग्रेसने जोरदार तयारी सुरू केली आहे.
राज्यात होत असलेल्या निवडणुकीसाठी राष्ट्रवादी काँग्रेस पूर्ण तयारीने मैदानात उतरली आहे. अलीकडेच उपमुख्यमंत्री अजित पवार यांनी पक्षांमध्ये बदल केले. प्रवक्ता पदावर नवीन चेहऱ्याची नियुक्ती करण्यात आली आहे. त्यानंतर आता नगरपरिषद, नगरपंचायत निवडणुकीसाठी स्टार प्रचारकांची यादी जाहीर करण्यात आली आहे. यामध्ये विदर्भातील नेत्यांचा समावेश आहे.
राज्यमंत्री इंद्रनील नाईक यांच्यावर निवडणुकीमध्ये पक्षाच्या प्रचाराची जबाबदारी देण्यात आली आहे. याशिवाय माजी मंत्री धर्मराव बाबा आत्राम हे देखील घड्याळाची टिकटिक मतदारांपर्यंत पोहोचतील. नुकतेच आमदार अमोल मिटकरी यांना पक्षाच्या प्रवक्ता पदावरून काढण्यात आले. सातत्याने वादग्रस्त विधान केल्यामुळे त्यांना पदावरून काढण्यात आल्याची टीका त्यानंतर झाली. मिटकरी यांच्यावरही अजित पवारांनी प्रचाराची जबाबदारी दिली आहे.
सत्तेसाठी सगळेकाही
माजी मंत्री धनंजय मुंडे यांच्याकडे देखील प्रचार धुरा असेल. महिला आयोगाच्या अध्यक्षा रुपाली चाकणकर देखील स्टार प्रचारक म्हणून मैदानात उतरणार आहेत. अभिनेते सयाजी शिंदे, माजी खासदार समीर भुजबळ, मुंबई कार्याध्यक्ष सिद्धार्थ कांबळे, नवाब मलिक यांना देखील प्रचारासाठी दिवसरात्र एक करावा लागेल. राष्ट्रीय कार्याध्यक्ष खासदार प्रफुल पटेल, प्रदेशाध्यक्ष खासदार सुनिल तटकरे, वैद्यकीय शिक्षणमंत्री हसन मुश्रीफ हे पहिल्या फळीचे स्टार प्रचारक असतील. अजित पवार हे स्वतः वेगवेगळ्या ठिकाणी सभा घेतील, हे वेगळ्याने सांगण्याची गरज नाही.
अल्पसंख्याक महामंडळाचे अध्यक्ष मुश्ताक अंतुले यांच्याकडे त्या भागातील नगरपरिषद, नगरपंचायत निवडणूक प्रचाराचे काम असेल. आमदार सना मलिक – शेख, महिला प्रदेशाध्यक्षा रुपालीताई चाकणकर, आमदार इद्रीस नायकवडी, माजी आमदार अनिकेत तटकरे यांच्यावरही अजित पवार यांनी विश्वास दाखवला आहे. राज्यातील अनेक नगरपरिषद, नगरपंचायत मध्ये राष्ट्रवादी काँग्रेस महायुतीमध्ये लढणार आहे. असे असले तरी या निवडणुकीतून पक्षसंघटन मजबूत करण्याची संधी पुन्हा एकदा अजित पवार यांना चालून आली आहे.
मोठा विश्वास
स्थानिक स्वराज्य संस्था निवडणुकीत राष्ट्रवादी काँग्रेस अजितदादांनी केलेल्या आतापर्यंतच्या कामाचा लेखाजोखा मांडणार आहे. लाडकी बहीण योजना आणि राज्यासाठी केलेल्या प्रत्येक विकास कामाकडे राष्ट्रवादी काँग्रेसचे नेते मतदारांचे लक्ष वेधणार आहेत. पक्षाने नेमलेल्या स्टार प्रचारकांपैकी काहींना आपल्या जिल्ह्यामध्ये ग्रामपंचायत निवडणुकीत स्वतःचे पॅनल वाचवता आले नव्हते. त्यांच्यावरही अजित पवार यांनी विश्वास दाखवला आहे. हा विश्वास हे प्रचारक किती सार्थ ठरवतात हे लवकरच दिसणार आहे.
पक्षातील जवळपास सर्वच महत्त्वाच्या नेत्यांना निवडणुकीची जबाबदारी देण्यात आली आहे. त्यामुळे एखाद्या विशिष्ट व्यक्तीवर अजित दादांनी खूप प्रेम दाखवलं असं म्हणता येणार नाही. कोणतीही निवडणूक लढणं हे प्रत्येक राजकीय पक्षासाठी एखाद्या टीमवर्क प्रमाणे असते. सामूहिक प्रयत्नातून प्रत्येकाला यश आणि सत्ता मिळवावी लागते. राष्ट्रवादी काँग्रेसमध्ये सध्या कोणतेही मतभेद नाहीत. त्यामुळे ही निवडणूक पक्षासाठी सोपी होणार आहे.
