राज्यातील अतिवृष्टीमुळे शेतकऱ्यांना अभूतपूर्व नुकसान झाले असून मदतीसाठी सरकार उशीर करत आहे. काँग्रेसचे प्रदेशाध्यक्ष हर्षवर्धन सपकाळ यांनी ताबडतोब ओला दुष्काळ जाहीर करून शेतकऱ्यांना विशेष मदत देण्याची मागणी केली आहे.
महाराष्ट्राच्या मातीत शेतकऱ्यांचे अश्रू मिसळले असताना, अतिवृष्टीच्या संकटाने हाहाकार माजवला आहे. शेतकऱ्यांच्या नशिबी आलेल्या या आपत्तीवर काँग्रेसने राज्य सरकारला धारेवर धरले आहे. बांधावर केवळ छायाचित्रणाचे नाटक न करता, दिल्लीतून विशेष आर्थिक पॅकेज आणून शेतकऱ्यांना दिलासा द्यावा, अशी मागणी काँग्रेसचे प्रदेशाध्यक्ष हर्षवर्धन सपकाळ यांनी केली आहे. शक्तिपीठ महामार्गासारख्या प्रकल्पांना तात्पुरते थांबवून शेतकऱ्यांच्या मदतीला प्राधान्य देण्याची गरज त्यांनी स्पष्ट केली. सरकारने तातडीने ओला दुष्काळ जाहीर करून शेतकऱ्यांना हेक्टरी 50 हजार रुपये आणि खरडलेल्या जमिनीसाठी 5 लाख रुपयांची विशेष मदत द्यावी, अशी मागणी त्यांनी लावून धरली आहे.
राज्यातील शेतकरी संकटात सापडला असताना सरकारचे धोरण आणि कृती यांच्यावर काँग्रेसने तीव्र टीका केली आहे. शेतकऱ्यांचे कर्जमाफीचे आश्वासन पूर्ण करणे. सक्तीची कर्जवसुली थांबवणे. तसेच मोफत बियाणे आणि खते पुरवणे यासारख्या मागण्यांनी त्यांनी सरकारला जाब विचारला आहे. हा केवळ राजकारणाचा खेळ नसून, शेतकऱ्यांच्या जगण्याचा प्रश्न आहे, असे सपकाळ यांनी ठणकावले. दिल्लीतील सत्तेचा वापर करून विशेष पॅकेज मिळवण्याची आणि शेतकऱ्यांना आधार देण्याची जबाबदारी सरकारने स्वीकारावी, असे आवाहन त्यांनी केले.
तातडीच्या मदतीची गरज
अतिवृष्टीने शेतकऱ्यांचे कंबरडे मोडले असताना, सरकारने तातडीने ओला दुष्काळ जाहीर करणे अपरिहार्य आहे. हेक्टरी 50 हजार रुपये आणि खरडलेल्या जमिनीसाठी 5 लाखांची मदत ही शेतकऱ्यांच्या पुनर्वसनासाठी अत्यावश्यक आहे. याशिवाय, कर्जमाफी आणि मोफत बियाणे-खतांचा पुरवठा यामुळे शेतकऱ्यांना नव्याने उभे राहण्याची संधी मिळेल. काँग्रेसने सरकारला या मागण्यांसाठी तात्काळ कार्यवाही करण्याचे आवाहन केले आहे.
शक्तिपीठ महामार्गासारख्या प्रकल्पांना प्राधान्य देण्यापेक्षा शेतकऱ्यांच्या मदतीला प्राधान्य द्यावे, अशी मागणी काँग्रेसने लावून धरली आहे. नाशिक येथील कुंभमेळ्यासाठीच्या अतिरिक्त तरतुदी दुष्काळग्रस्त भागाकडे वळवाव्यात, असेही सपकाळ यांनी सुचवले. सरकारने बांधावर छायाचित्रणाचे नाटक थांबवून प्रत्यक्ष कृती करावी, अशी अपेक्षा त्यांनी व्यक्त केली.
Chandrashekhar Bawankule : ठाकरेंनी मीडियाला नव्हे तर सरकारला पत्र लिहावं
काँग्रेसने बांधावर जाऊन शेतकऱ्यांच्या व्यथा जाणून घेतल्या आहेत. केवळ छायाचित्रणासाठी नव्हे, तर प्रत्यक्ष मदतीसाठी पुढाकार घेतला आहे. विभागीय आयुक्त आणि जिल्हाधिकाऱ्यांकडे शिष्टमंडळ पाठवून सरकारच्या कारवाईवर लक्ष ठेवण्याची भूमिका काँग्रेसने घेतली आहे. सर्वांनी एकत्र येऊन शेतकऱ्यांसाठी काम करण्याची गरज असल्याचे सपकाळ यांनी स्पष्ट केले. शेतकऱ्यांच्या हितासाठी काँग्रेसचा हा लढा अखंड सुरू राहील, असे त्यांनी ठामपणे सांगितले.
