डॉ. संपदा मुंडे प्रकरणात आता काँग्रेस सरकारला घेरण्याच्या तयारीत आहे. माजी खासदाराच्या अटकेसाठी काँग्रेस ‘वर्षा’ला घेराव घालणार आहे.
डॉ. संपदा मुंडे प्रकरण दडपण्याचा प्रयत्न महायुती सरकार करत आहे. याप्रकरणाची निष्पक्ष व पारदर्शक चौकशी व्हावी. यासाठी हायकोर्टाच्या न्यायमूर्तींचा सहभाग असलेली एसआयटी स्थापन करावी. भाजपाचे माजी खासदार रणजितसिंह नाईक निंबाळकर यांना तत्काळ अटक करावी, अशी मागणी काँग्रेसने केली आहे. टिळक भवन येथे काँग्रेस प्रदेशाध्यक्ष हर्षवर्धन सपकाळ, युवक काँग्रेसचे राष्ट्रीय अध्यक्ष उदय भानू चिब यांनी ही मागणी केली.
सत्ताधारी पक्षाचा नेता या प्रकरणात सहभागी आहे. अशात मुख्यमंत्री देवेंद्र फडणवीस यांनीच चौकशी आधी रणजितसिंह नाईक निंबाळकरांना क्लिन चिट दिली आहे. त्यामुळे राज्य सरकारचे अधिकारी निष्पक्ष तपास कसा करणार? असा सवालही उपस्थित करण्यात आला. डॉ. संपदा मुंडे यांनी रणजितसिंह नाईक निंबाळकर व पोलीसांच्या छळाला कंटाळून आत्महत्या केली. हे प्रकरण काँग्रेसने गांभीर्याने घेतले आहे. देशपातळीवर यासाठी आंदोलन केले जात आहे. महायुती सरकारने याप्रकरणी एसआयटी स्थापन करावी. एसआयटी न नेमल्यास 10 नोव्हेंबला मुख्यमंत्र्यांच्या वर्षा बंगल्याला घेराव घालण्यात येईल. युवक काँग्रेस हे आंदोलन करेल, असे यावेळी स्पष्ट करण्यात आले.
मुंबईत बैठक
डॉ. संपदा मुंडे प्रकरणात काँग्रेसने मुंबईत बैठक घेतली. बैठकीत मुख्यमंत्र्याच्या निवासस्थानाला घेराव घालण्याचा निर्णय घेण्यात आला. आंदोलनात राज्यभरातील तरुणाई सहभागी होईल, असे युवक काँग्रेसचे प्रदेशाध्यक्ष शिवराज मोरे म्हणाले. महाराष्ट्र प्रदेश युवक काँग्रेसच्या कार्यकारिणीची बैठकही यावेळी टिळक भवन येथे पार पडली. बैठकीत आगामी स्थानिक स्वराज्य संस्था निवडणुकीच्या तयारीवर चर्चा करण्यात आली. युवक काँग्रेसचे संघटन मजबूत करण्यासाठी रोडमॅप तयार करण्यात आला. युवक काँग्रेसचे राष्ट्रीय प्रभारी मनीष शर्मा, प्रभारी अजय चिकारा, सरचिटणीस प्रविण बिरादार आदी पदाधिकारी बैठकीला उपस्थित होते.
बैठकीनंतर प्रदेशाध्यक्ष सपकाळ यांनी सरकारवर टीका केली. राज्यात व केंद्रातील भाजपाचे सरकार मतचोरी करून सत्तेत आले आहे. भाजपाने निवडणूक आयोगाच्या मदतीने मतचोरी केली आहे. मतचोरी कशी केली? हे लोकसभेतील विरोधी पक्षनेते राहुल गांधी यांनी पुराव्यासह उघड केले आहे. हा प्रकार लोकशाहीसाठी घातक आहे. परंतु भाजप यातही हिंदू- मुस्लीम शोधत आहे. यावरून त्यांच्या बुद्धीची कीव करावीशी वाटते, असे सपकाळ म्हणाले. मतचोरी मुद्दा सर्वांत आधी काँग्रेसने उघड केला. याचे संपूर्ण श्रेय राहुल गांधी यांना आहे. आता देशभरातील विरोधी पक्ष याप्रश्नी आवाज उठवत आहेत.
निवडणूक आयोगाच्या कारभारावर मोठे प्रश्नचिन्ह निर्माण झाले आहे. काँग्रेसने हा मुद्दा सातत्याने लावून धरला आहे. नागपूर जिल्ह्यातील कामठी येथे काँग्रेसने प्रचंड मोठे आंदोलनही केले. मुंबईत दोन दिवसांपूर्वी निघालेल्या मोर्चातही काँग्रेसने सहभाग घेतला. या मोर्चात काँग्रेसचे नेते, कार्यकर्ते व झेंडेही होते. पण भाजपा त्यावरही टीका करत आहे, ते चुकीचे आहे. आपण मोर्चात सहभागी होण्याचा मुद्दा गौण आहे. मतचोरी हा मुद्दा सर्वांत महत्वाचा आहे, असेही हर्षवर्धन सपकाळ यांनी स्पष्ट केले.
