मनोज जरांगे पाटील मराठा आरक्षणासाठी मुंबईत आंदोलनाची हाक देत आहेत. तर माजी खासदार नवनीत राणांनी हिंदू सणात व्यत्यय टाळण्याचे आणि न्यायालयाचे पालन करण्याचे आवाहन केले आहे.
27 ऑगस्ट 2025 पासून महाराष्ट्रात गणेशोत्सवाचा जल्लोष सुरू झाला आहे. प्रत्येक गल्ली-बोळात, प्रत्येक घरात बाप्पांचे आगमन होत आहे. लालबागच्या राजापासून ते गावखेड्यातील गणरायापर्यंत, सर्वत्र भक्ती आणि उत्साहाचा रंग पसरला आहे. पण या सणाच्या आनंदात राजकीय तणावाचे सावटही पसरले आहे. मराठा आरक्षणाच्या मुद्द्यावरून मनोज जरांगे पाटील यांनी पुन्हा एकदा आंदोलनाची हाक दिली आहे. यावर भाजपच्या माजी खासदार नवनीत राणा यांनी तीव्र प्रतिक्रिया देत जरांगेंना खडसावले आहे.
मनोज जरांगे पाटील यांनी 29 ऑगस्टपासून मुंबईच्या आझाद मैदानात उपोषणाची घोषणा केली आहे. लाखो मराठा बांधवांसह ते अंतरवाली सराटीतून मुंबईकडे निघाले आहेत. त्यांच्या या आंदोलनाने राज्यात नव्या वादळाला तोंड फोडले आहे. दुसरीकडे, नवनीत राणा यांनी गणेशोत्सवाच्या पवित्र वातावरणात कोणताही व्यत्यय नको, असे स्पष्टपणे बजावले आहे. हिंदू सणांना त्रास देऊ नका. गणेशोत्सव हा महाराष्ट्राचा आत्मा आहे. अकरा दिवसांचा हा उत्सव शांततेत साजरा होऊ द्या, असे राणा म्हणाल्या. त्यांनी जरांगेंना सल्ला दिला की, आरक्षणाची मागणी अकरा दिवसांनंतरही मांडता येईल, पण सणाच्या काळात शांतता राखावी.
Prakash Ambedkar : मोदींच्या सत्तेत सर्वसमावेशकता कुठे हरवली?
न्यायालयाचे पालन आवश्यक
नवनीत राणा यांनी आपल्या खास शैलीत जरांगेंवर निशाणा साधला. हिंदुत्व कोणाचे आहे, हे कोणी ठरवू शकत नाही. गणेशोत्सवात व्यत्यय आणणे म्हणजे महाराष्ट्राच्या सांस्कृतिक वारशाला धक्का लावण्यासारखे आहे, असे त्या म्हणाल्या. राणा यांनी न्यायालयाच्या आदेशांचे पालन करण्याचे आवाहन करताना सांगितले की, सर्वांनी न्यायव्यवस्थेवर विश्वास ठेवावा. लालबागच्या राजाला भेटण्यासाठी देशभरातून भक्त मुंबईत येतात. या उत्साहाला बाधा नको, असे त्यांनी ठणकावले. दरम्यान, मनोज जरांगे पाटील यांनी आपली बाजू मांडताना भावनिक आवाहन केले. मी कोणालाही शिवी दिली नाही.
देवेंद्र फडणवीस यांच्या मातोश्रींबद्दल काही चुकीचे बोललो असेल, तर मी माझे शब्द मागे घेतो, असे ते म्हणाले. त्यांनी मराठा समाजाच्या कष्ट आणि मुलांच्या आत्महत्यांचा मुद्दा उपस्थित करत सांगितले, आमच्या माय-बहीणींनाही सन्मान मिळायला हवा. पण त्यांच्या आंदोलनाच्या शैलीवर टीकेची झोड कायम आहे. विशेषतः, गणेशोत्सवाच्या काळात आंदोलनाची घोषणा केल्याने अनेकांनी नाराजी व्यक्त केली आहे. महाराष्ट्राच्या राजकारणात मराठा आरक्षणाचा मुद्दा गेल्या अनेक वर्षांपासून चर्चेत आहे. मत चोरीच्या आरोपांनंतर आता शेतकऱ्यांच्या कर्जमाफी आणि मराठा आरक्षणावरून वातावरण तापले आहे. जरांगे यांच्या आंदोलनाने हा तणाव अधिकच वाढला आहे. दुसरीकडे, नवनीत राणा यांनी आपल्या बेधडक शैलीत हिंदुत्व आणि सांस्कृतिक वारशाचा मुद्दा उपस्थित करत जरांगेंना लक्ष्य केले आहे.
