नागपूर शहर हे मुख्यमंत्री देवेंद्र फडणवीस यांचे गृहनगर असले, तरी त्याच शहरात सुरक्षा रक्षकांची टंचाई जाणवू लागली असल्याचे चित्र समोर आले आहे.
नागपूर, हे शहर विकासाच्या वेगवान रथावर स्वार होत आहे. केंद्रीय मंत्री नितीन गडकरी आणि मुख्यमंत्री देवेंद्र फडणवीस यांचे गृहनगर म्हणून ओळखले जाणारे हे शहर प्रत्येक क्षेत्रात आघाडी घेण्याच्या दिशेने वाटचाल करत आहे. परंतु जेव्हा शहराच्या सुरक्षेची चर्चा येते, तेव्हा पोलिस विभागाची भूमिका महत्त्वाची ठरते. विशेषतः नागपूर येथे अनेक नेत्यांचे निवासस्थान आहे. खुद्द मुख्यमंत्री फडणवीस आणि केंद्रीय मंत्री नितीन गडकरी यांचे घर या शहरातच आहे. त्यामुळे व्हीआयपी मुव्हमेंट्सची गर्दी नेहमीच असते. हे सगळं सांभाळण्यासाठी पोलिसांची पुरेशी संख्या हवी, पण वास्तव काय? नागपूरच्या झोन क्रमांक चारमध्ये पोलिसांची संख्या इतकी कमी आहे की, ते पाहून आश्चर्य वाटते. आयपीएस अधिकारी रश्मिता राव यांच्या हद्दीतील हा झोन सध्या केवळ आठ (8) अधिकाऱ्यांवर चालतो आहे. हे शहराच्या सुरक्षेसाठी एक मोठे आव्हान आहे.
कमतरतेचा सर्वाधिक फटका अजनी पोलिस स्टेशनला बसतो आहे. या स्टेशनच्या हद्दीत सरकारी वैद्यकीय महाविद्यालय (जीएमसी) सारखा अत्यंत महत्त्वाचा भाग येतो. हा भाग म्हणजे रुग्णांच्या गर्दीचा केंद्रबिंदू. मध्यप्रदेश, छत्तीसगढसह विविध राज्यांतून येणारे रुग्ण इथे दाखल होतात. त्यामुळे पोलिसांना येथे सतत गुंतून राहावे लागते. दुसरीकडे, रामटेके नगर सारखा संवेदनशील भागही याच हद्दीत आहे. येथील गुन्हेगार वेगवेगळ्या राज्यांत जाऊन गुन्हे करतात आणि मग नागपूरमध्ये लपून बसतात. परराज्यातील पोलिस येथे येऊन तपास करतात आणि अजनी पोलिसांची मदत घेतात. पण आधीच मनुष्यबळ कमी असल्याने, हे पोलिस इतर राज्यांच्या कामात अडकले की स्थानिक समस्या दुर्लक्षित होतात. हे जणू काही एका छोट्या सैन्याने विशाल साम्राज्य सांभाळण्याचा प्रयत्न आहे. जिथे प्रत्येक सैनिकाला अनेक भूमिका पार पाडाव्या लागतात.
पालकमंत्र्यांचे दुर्लक्ष का?
अजनी पोलिस स्टेशन हा भाग खुद्द देवेंद्र फडणवीस यांच्या दक्षिण पश्चिम विधानसभा मतदारसंघात येतो. इथे अनेक सराफा दुकाने, हॉस्पिटल्स आणि व्यावसायिक संकुले आहेत. जर इथेच पोलिसांची संख्या कमी असेल, तर हे भाग गुन्हेगारीसाठी सोपे लक्ष्य ठरू शकतात. ही बाब अत्यंत चिंताजनक आहे. कारण शहराच्या सुरक्षेची जबाबदारी स्वतः गृहमंत्री देवेंद्र फडणवीस आणि पालकमंत्री चंद्रशेखर बावनकुळे यांच्यावर आहे. नागपूर हे फडणवीस, गडकरी आणि बावनकुळे यांचे गृहनगर म्हणून ओळखले जाते. त्यांच्याच मतदारसंघात पोलिसांची कमतरता असणे हा एक मोठा प्रश्नचिन्ह आहे. पालकमंत्री बावनकुळे हे याकडे कसे दुर्लक्ष करू शकतात? हे शहर विकासाच्या शिखरावर जाण्याच्या स्वप्नात मग्न आहे, पण सुरक्षेच्या पायाभूत सुविधा कमकुवत असतील तर हे स्वप्न कसे पूर्ण होईल? असा प्रश्न उपस्थित होत आहे.
पोलिसांची कमतरता असल्याने सध्या इथे आठच अधिकारी कार्यरत आहेत. एक निरीक्षकही आहे. ज्यामुळे येथील पोलिसांची संख्या वाढविणे अत्यंत गरजेचे झाले आहे. आधीच या भागात गुन्हे घडत असतात. त्यामुळे जर महिलांबाबत जर कोणता केस असेल त्यावर ऍक्शन घ्यायला देखील महिला पोलीस असणे गरजेचे आहे. रामटेके नगर, रामेश्वरी, GMC हे अत्यंत संवेदनशील भाग आहेत. त्यामुळे याकडे लक्ष देणे सध्या गरजेचे झाले आहे. अजनी स्टेशन आणखी महत्त्वाचे ठरते कारण इथे महिलांशी संबंधित गुन्हे आणि रामटेके नगरसारख्या भागात अनेक हत्या घडल्या आहेत. हे भाग संवेदनशील आहेत, जिथे गुन्हेगारीचे जाळे पसरले आहे. पोलिस स्टाफ इतर स्टेशनच्या तुलनेत जास्त संतुलित आणि पुरेशा संख्येत असणे गरजेचे आहे. पण मनुष्यबळाची कमतरता असल्याने, पोलिसांना प्राधान्यक्रम ठरवावा लागतो. ज्यामुळे काही समस्या मागे पडतात.
लवकरच स्थानिक स्वराज्य संस्थेची निवडणूक होणार आहे. निवडणुकीच्या रणधुमाळीत पोलीस नेत्यांच्या सुरक्षेत, गर्दी नियंत्रणात आणि कायदा-सुव्यवस्थेच्या देखरेखीत गुंतलेले असतात. अशा वेळी मनुष्यबळाची टंचाई असल्यास पोलिसांसमोर मोठा प्रश्न उभा राहतो. ते निवडणूक सुरळीत पार पाडणार की स्थानिक नागरिकांच्या समस्या सोडवणार? त्यामुळे सध्या तरी या पोलिस स्टेशनमध्ये अतिरिक्त मनुष्यबळ वाढवणे अत्यावश्यक झाले आहे.
