नागपुरात एआयच्या मदतीने एका भयंकर ट्रक अपघाताचा तपास करून आरोपीला पकडले. ज्यात एका महिलेचा मृत्यू झाला होता.
उपराजधानी नागपूरने नुकतीच एका अनोख्या तपासाची साक्ष दिली. जिथे कृत्रिम बुद्धिमत्तेच्या (AI) चमत्काराने एका क्रूर अपघाताचा गुन्हेगार शोधून काढला गेला. सध्या देशभरात एआयचा बोलबाला आहे. तरुणाई सोशल मीडियावर एआयच्या मदतीने नवनवीन प्रयोग करत आहे. पण या तंत्रज्ञानाचा उपयोग फक्त मनोरंजनापुरता मर्यादित नाही. नागपूरच्या ग्रामीण पोलिसांनी एआयच्या ‘मार्व्हल टूल’चा वापर करून एका बेजबाबदार ट्रक चालकाला उत्तर प्रदेशातून गजाआड केले. ही घटना म्हणजे तंत्रज्ञान आणि पोलिसी खाक्याचा अद्भुत संगम. नागपूर देवलापार येथे सहा दिवसांपूर्वी घडलेली एक हृदयद्रावक घटना नागपूरकरांच्या मनात अजूनही ताजी आहे.
एका ट्रकने दुचाकीस्वार जोडप्याला जोरदार धडक दिली. या अपघातात ग्यारसी नावाच्या महिलेचा जागीच मृत्यू झाला. पण त्यानंतर जे घडले, ते पाहून संपूर्ण शहर हादरले. रक्ताच्या थारोळ्यात पडलेल्या पत्नीला उचलण्यासाठी कोणीही पुढे आले नाही. अखेर तिच्या पतीला, तिचा मृतदेह दुचाकीला बांधून घरी न्यावा लागला. हा व्हिडीओ सोशल मीडियावर व्हायरल झाला आणि पोलिसांना तपासाची आग लागली. पोलिसांनी तपासाला सुरुवात केली तेव्हा त्यांच्याकडे फारशी माहिती नव्हती. फक्त एक लाल रंगाचा ट्रक आणि पीडितेच्या पतीची धूसर आठवण. पण येथेच एआयचे ‘मार्व्हल टूल’ पोलिसांच्या मदतीला धावले. हे टूल म्हणजे गुन्हेगारांचा माग काढण्याचे एक डिजिटल जादूगार.
Sameer Shinde : डिलिव्हरी बॉयच्या मूक वेदनांना शहर प्रमुख फोडणार वाचा
हायटेक तपासाचे पहिले उदाहरण
पोलिसांनी ट्रकच्या चाकांची संख्या, ताडपत्री आहे की नाही, अशी किरकोळ माहिती गोळा केली. यावरून एआयने ट्रकचे एक अचूक चित्र तयार केले. मग काय, लाखो तासांच्या सीसीटीव्ही फुटेजमधून आणि महामार्गावरील फास्ट टॅग पावत्यांमधून पोलिसांनी हा ट्रक शोधला. जणू संगणकावर एखादी फाइल शोधावी, तसा हा शोध होता. पोलिसांना या मार्गावर पाच लाल ट्रक सापडले. त्यानंतर प्रत्येक ट्रकची कसून चौकशी झाली. ई-वे बिल, फास्ट टॅग डेटा आणि इंटरनेटवरील माहिती यांचा मेळ घालत पोलिसांनी अखेर एका ट्रकवर लक्ष केंद्रित केले. हा ट्रक ग्वाल्हेरजवळ सापडला आणि आरोपी चालक सत्यपाल राजेंद्र याला उत्तर प्रदेशातील फरुखाबाद येथून ताब्यात घेण्यात आले.
तब्बल 700 किलो मीटरचा पाठलाग करून पोलिसांनी ट्रकसह (यूपी 14 एमटी 2190) आरोपीला अटक केली. मार्व्हल टूल हे क्राइम अँड क्रिमिनल ट्रॅकिंग नेटवर्क सिस्टीमचा (CCTNS) एक भाग आहे. एआयच्या माध्यमातून गुन्हेगाराला शोधणारे नागपूर हे प्रथम शहर ठरले आहे. तंत्रज्ञानाच्या युगात नागपूरची ही पहिली आणि वेगळी झेप आहे. ही राष्ट्रव्यापी प्रणाली पोलिस स्टेशनला डिजिटल जोडते आणि गुन्हेगारी डेटाचे संकलन, विश्लेषण आणि सामायिकरण सुलभ करते. मार्व्हल टूल एका प्रतिमेतून गुन्ह्याचा माग काढते आणि इंटरनेटच्या विशाल विश्वातून माहितीचा सुगावा लावते. या प्रकरणात पोलिसांनी सीसीटीव्ही फुटेज, फास्ट टॅग आणि ई-वे बिल यांचा वापर करून ट्रकचा मार्ग निश्चित केला. जणू एखाद्या सिनेमातील थरारक पाठलागाची कथा, पण येथे नायक होता एआय.
Parinay Fuke : खेळ जिंकला खास, पण श्रेय महायुतीच्या नावावर पास
