नागपूरमध्ये निवडणूक प्रक्रियेच्या पारदर्शकतेवर पुन्हा एकदा वादग्रस्त घडामोडी पाहायला मिळाल्या. संजयकुमार यांच्या ट्विट प्रकरणामुळे राजकीय वातावरण तापले असून आयोगावर विश्वासार्हतेचा प्रश्न उभा राहिला आहे.
नागपूरमध्ये पुन्हा एकदा निवडणूक प्रक्रियेच्या पारदर्शकतेवर राजकीय वादंग उसळले आहे. लोकनीती-सीएसडीएसचे समन्वयक संजयकुमार यांनी वादग्रस्त ट्विट करून नंतर माफी मागितली, परंतु त्यानंतर नागपूर आणि नाशिकमध्ये त्यांच्यावर गुन्हा दाखल झाला. चुकीची आकडेवारी प्रसारित केल्याच्या आरोपावरून त्यांच्यावर कारवाई झाली असली तरी या घटनेने मोठा राजकीय भूचाल निर्माण केला आहे.
संजयकुमार यांनी मांडलेल्या आकडेवारीनुसार रामटेक आणि देवळाली विधानसभा मतदारसंघांत मतदार संख्येत मोठी घट झाली होती. रामटेकमध्ये लोकसभा निवडणुकीदरम्यान 4 लाख 66 हजाराहून अधिक मतदार होते, तर विधानसभा निवडणुकीत ही संख्या 2 लाख 86 हजारांवर आली. देवळालीतही अशीच घट दिसून आली. याच आधारावर काँग्रेस नेते राहुल गांधी यांनी निवडणूक आयोगावर गंभीर आरोप केले होते.
Akola BJP : पक्षासाठी आयुष्य वेचणाऱ्याच्या मुलाला बंद घड्याळीचा ‘सेल’
संशयाचे सावट
घडलेल्या प्रकरणानंतर निवडणूक आयोगाची कार्यपद्धती आणि त्यावरील विश्वासार्हतेवर प्रश्नचिन्ह निर्माण झाले आहे. राहुल गांधी यांनी आधीपासूनच मतचोरीच्या आरोपांचा सूर लावला होता. आयोगाच्या कामकाजावर भाजपकडून प्रभावित होऊन वागण्याचा आरोप त्यांनी केला होता. त्यातच संजयकुमार यांच्यावर दाखल झालेल्या गुन्ह्यामुळे काँग्रेसला आपली भूमिका अधिक ठामपणे मांडण्याची संधी मिळाली. निवडणुकीत पारदर्शकता राहिली नसल्याचे आणि मतदार यादीतील फेरफारांचा संशय असल्याचे काँग्रेस सातत्याने स्पष्ट करत आहे. मतदानानंतर जाहीर होणाऱ्या टक्केवारीत झालेल्या बदलांबाबतही आक्षेप नोंदवले जात आहेत. तसेच संध्याकाळी मतदान संपल्यानंतरही टक्केवारीत झालेली अचानक वाढ आणि सीसीटीव्ही फुटेज न दिल्याने आयोगाच्या कारभारावरील अविश्वास अधिक वाढला आहे.
मतदानासारख्या मूलभूत लोकशाही प्रक्रियेत सातत्याने निर्माण होणारे वाद लोकांच्या विश्वासाला धक्का देत आहेत. निवडणुकीच्या आकडेवारीत मोठ्या प्रमाणात विसंगती आढळल्याचे सांगण्यात येत असून. यामुळे मतदार याद्यांची शुद्धता आणि मतदान प्रक्रियेची पारदर्शकता यावर संशय व्यक्त होत आहे. निवडणूक आयोगासारख्या स्वायत्त संस्थेने कोणत्याही पक्षीय दबावापासून मुक्त राहून काम करणे अपेक्षित आहे. मात्र, गेल्या काही काळात विविध पक्षांकडून आयोगावर केलेले आरोप पाहता निवडणूक प्रक्रियेवरील जनतेचा विश्वास डळमळीत होतो आहे. ही स्थिती कायम राहिल्यास लोकशाहीचे मूळ तत्त्व धोक्यात येऊ शकते.
Nagpur : मेट्रोच्या विस्ताराने शहराला मिळणार गतिमान जीवनशैली
वातावरण तापवणारे आरोप
काँग्रेसने उपस्थित केलेल्या मुद्द्यांमुळे महाराष्ट्रातील राजकीय वातावरण पुन्हा एकदा तापले आहे. निवडणूक आयोगावर झालेल्या कारवाईंची आणि आरोपांची मालिका फक्त एका व्यक्तीवर केंद्रित न राहता आता थेट आयोगाच्या विश्वासार्हतेवर येऊन ठेपली आहे. यामुळे येणाऱ्या निवडणुकांमध्ये मतदारांमध्ये अधिक संभ्रम निर्माण होण्याची भीती व्यक्त होत आहे. राजकारणातील या घडामोडींनी पुन्हा एकदा दाखवून दिले आहे की, लोकशाही टिकवायची असेल तर निवडणुकीची पद्धत पूर्णपणे पारदर्शक, विश्वासार्ह आणि सर्वसामान्यांना खात्री देणारी असली पाहिजे. आयोगावर सतत होणारे आरोप आणि आकडेवारीतील गोंधळ दूर न झाल्यास लोकशाही व्यवस्थेच्या पाया अधिकच दुर्बल होण्याची शक्यता आहे.
