महाराष्ट्रातील स्थानिक स्वराज्य संस्थांच्या निवडणुकीच्या पार्श्वभूमीवर नागपूरमध्ये शिवसेना एकनाथ शिंदे गटातील अंतर्गत वाद पुन्हा उफाळून आले आहेत.
महाराष्ट्रात स्थानिक स्वराज्य संस्थांच्या निवडणुकीचे वारे जोरात वाहू लागले आहेत. सहा वर्षांच्या प्रतीक्षेनंतर सुप्रीम कोर्टाच्या आदेशाने निवडणुकीचा मार्ग मोकळा झाला आहे. ज्यामुळे आता प्रत्येक राजकीय पक्षाने कंबर कसली आहे. महापालिकेने नुकतीच प्रभाग रचना जाहीर केल्याने या निवडणुकीच्या तयारीला आणखी वेग आला आहे. पण, या सगळ्या उत्साहाच्या पार्श्वभूमीवर शिवसेना एकनाथ शिंदे गटामध्ये अंतर्गत वाद पुन्हा एकदा उफाळून आले आहेत. विशेषतः महाराष्ट्राची उपराजधानी असलेल्या नागपुरात हा वाद चांगलाच पेटल्याचे दिसत आहे. नागपुरातील एकनाथ शिंदे गटातील गटबाजी आता थेट मुंबईपर्यंत पोहोचली आहे.
काही दिवसांपूर्वी नागपुरात शिंदे गटाची एक महत्त्वाची बैठक पार पडली. या बैठकीत गटबाजीचा मुद्दा इतका तापला की, तो थेट उपमुख्यमंत्री तथा शिवसेना पक्षप्रमुख एकनाथ शिंदे आणि डॉ. श्रीकांत शिंदे यांच्यापर्यंत गेला आहे. या गोंधळाला कारण ठरली ती संजय मोरे यांनी आयोजित केलेली बैठक. संजय मोरे यांनी नागपुरात शिवसैनिकांना एकत्र आणण्याचा प्रयत्न केला. पण काही कार्यकर्त्यांनी बैठकीत प्रचंड गोंधळ घालत त्यांचे भाषणच बंद पडले. हा प्रकार आता शिवसेनेच्या वरिष्ठ नेत्यांच्या कानावर गेला आहे. वरिष्ठ पातळीवर याची गंभीर दखल घेण्यात आली आहे.
नाराज कार्यकर्त्यांचा रोष
नागपुरात शिंदे गटातील अंतर्गत कलहाचे मुख्य कारण आहे जिल्हाप्रमुख नेमणुकीचा रखडलेला निर्णय. एकनाथ शिंदे आणि त्यांचे पुत्र डॉ. श्रीकांत शिंदे यांनी यापूर्वी सर्वेक्षण करून आणि कार्यकर्त्यांच्या पसंतीनुसार जिल्हाप्रमुख नेमण्याचे आश्वासन दिले होते. पण, अद्यापही याबाबत कोणतीही ठोस पावले उचलली गेली नाहीत. कार्यकर्त्यांमध्ये असलेली नाराजी आणि गटबाजी यामुळे पक्षाची एकजूट दाखवण्याचे आव्हान शिंदे गटासमोर आहे. विशेषतः आगामी नागपूर महानगरपालिकेच्या निवडणुकीपूर्वी हे आव्हान अधिकच कठीण बनले आहे. निवडणुकीच्या या रणधुमाळीत शिंदे गटाला पक्षाची कार्यकारिणी आणि जिल्हाप्रमुख नेमणुकीचा प्रश्न तातडीने सोडवावा लागणार आहे.
नागपुरात शिवसेनेची ताकद पुन्हा एकदा सिद्ध करण्यासाठी एकनाथ शिंदे आणि त्यांच्या सहकाऱ्यांना कार्यकर्त्यांचा विश्वास जिंकणे गरजेचे आहे. गटबाजीचा हा वणवा विझवून पक्षाला एकसंध ठेवण्यात शिंदे यशस्वी होणार का, हे पाहणे औत्सुक्याचे ठरेल. या सगळ्या घडामोडींमधून एक गोष्ट स्पष्ट आहे, महाराष्ट्रातील स्थानिक स्वराज्य संस्थांच्या निवडणूक केवळ राजकीय पक्षांमधील लढाई नसून, पक्षांतर्गत एकजुटीचीही कसोटी आहे. शिंदे गटाला जर या निवडणुकीत यश मिळवायचे असेल, तर त्यांना आधी घरातील भांडणे मिटवावी लागतील. नागपुरातून सुरू झालेला हा वाद मुंबईपर्यंत पोहोचला असला, तरी तो सोडवण्याची जबाबदारी आता थेट एकनाथ शिंदे यांच्यावर आहे. निवडणुकीच्या रणसंग्रामात शिंदे गट कशी कामगिरी करतो, याकडे सगळ्यांचे लक्ष लागले आहे.
Jayashree Shelke : बुलढाण्यातील मतदारसंघाचा निकाल न्यायालयीन कक्षात
