नागपूरात काँग्रेस आमदार अभिजीत वंजारी यांच्या कार्यालयावर शाईफेक झाल्याच्या घटनेवर युवा काँग्रेसने जोरदार विरोध केला.
संत्र्याची नगरी आता आता राजकीय तणावाचे केंद्रबिंदू म्हणून ओळखली जाऊ लागली आहे. गणेशोत्सवाच्या रंगात रंगलेल्या या शहरात भक्तीच्या लाटांबरोबरच आता राजकीय रंग देखील उधळले जात आहेत. गणपती बाप्पाच्या स्वागतात मश्गूल असलेल्या नागपूरकरांना आता राजकीय नाट्याचा तडकाही अनुभवायला मिळत आहे. काँग्रेस आमदार अभिजीत वंजारी यांच्या कार्यालयावर झालेल्या शाईफेकीच्या घटनेने शहरातील वातावरण चांगलेच तापले आहे. याच मुद्द्यावरून काँग्रेस आणि भाजप कार्यकर्ते एकमेकांविरुद्ध तावातावाने भिडले आहेत. काही महिन्यांपूर्वीच नागपूरने औरंगजेबाच्या मुद्द्यावरून धार्मिक तणावाची आग अनुभवली होती. ती आग विसून काहीच वेळ उलटला असला तरीही, आता राजकीय आग पेटली आहे.
काँग्रेसचे विधान परिषदेचे आमदार अभिजीत वंजारी यांच्या सेंट्रल एवेन्यूवरील आंबेडकर चौकाजवळच्या कार्यालयातील नामफलकावर अज्ञातांनी काळी शाई फेकली. ही शाई केवळ फलकावरच नाही, तर नागपूरच्या राजकीय मैदानातही पसरली आहे. वंजारी यांनी आपल्या कार्यालयाच्या फलकावर ‘आमदार, पूर्व नागपूर’ असा उल्लेख केला होता. ज्यावर स्थानिक भाजप कार्यकर्त्यांनी आक्षेप घेतला. यातूनच ही शाईफेकीची घटना घडल्याचा आरोप आहे. या प्रकरणी वंजारी यांनी पोलिसांत तक्रार दाखल केली असून, भाजप आमदार कृष्णा खोपडे यांच्या कार्यकर्त्यांवर हा हल्ला केल्याचा संशय काँग्रेसने व्यक्त केला आहे. या शाईफेकीच्या नाट्याला प्रत्युत्तर म्हणून काँग्रेसच्या युवा मोर्चाने नागपूरच्या रस्त्यावर उतरत जोरदार आंदोलन केले.
Prashant Padole : पंचायत निवडणुकीसाठी खासदाराने रचला रणनीतीचा गड
भाजप-काँग्रेसमध्ये तणाव
मंगळवारी, 2 सप्टेंबर 2025 रोजी, राहुल गांधी यांच्या देशव्यापी आंदोलनाच्या हाकेला प्रतिसाद देत काँग्रेसच्या कार्यकर्त्यांनी संविधान चौकात ‘भाजप-निवडणूक आयोग’ जोडीवर मत चोरीचा आरोप करत घोषणाबाजी केली. भाजपने सत्ता हस्तगत करण्यासाठी निवडणूक आयोगाशी हातमिळवणी केली, असा घणाघात काँग्रेसच्या नेत्यांनी केला. लोकशाहीचा गळा घोटणाऱ्या या जोडीला आता रस्त्यावर आणू, असा इशारा देत आंदोलकांनी आपला रोष व्यक्त केला. वोट चोर, गद्दी सोडच्या गगनभेदी घोषणांनी संपूर्ण चौक दणाणला. दुसरीकडे, काँग्रेस कार्यकर्त्यांनी थेट भाजप आमदार कृष्णा खोपडे यांच्या घरासमोर आंदोलनाचा मोर्चा वळवला. यावेळी काँग्रेस आणि भाजप कार्यकर्ते समोरासमोर आले. या सगळ्या नाट्यात भाजप आमदार कृष्णा खोपडे यांनी आपल्या कार्यकर्त्यांच्या कृत्याचे समर्थन करत आणखी खळबळ उडवून दिली.
अभिजीत वंजारी हे विधान परिषदेचे आमदार असताना त्यांनी आपल्या कार्यालयाच्या फलकावर ‘पूर्व नागपूर विधानसभा क्षेत्र’ असा उल्लेख केला, ज्याला भाजप कार्यकर्त्यांनी आक्षेप घेतला. हा उल्लेख चुकीचा आहे. आमच्या कार्यकर्त्यांनी आपला रोष व्यक्त केला, असे खोपडे यांनी ठामपणे सांगितले. दुसरीकडे, वंजारी यांनी या शाईफेकीला ‘राजकीय सूडबुद्धी’ ठरवत तात्काळ कारवाईची मागणी केली आहे. भाजपच्या कार्यकर्त्यांनी हे कृत्य केले आहे. त्यांना तात्काळ अटक झालीच पाहिजे, असे वंजारी यांनी म्हटले.\गणेशोत्सवाच्या उत्साहात नागपूर आता राजकीय रणधुमाळीत रंगले आहे. काँग्रेस आणि भाजप यांच्यातील हा वाद आता रस्त्यावरून थेट जनतेच्या मनात पोहोचला आहे. एकीकडे काँग्रेस लोकशाहीच्या रक्षणासाठी लढण्याचा दावा करत आहे, तर दुसरीकडे भाजप आपल्या कार्यकर्त्यांच्या कृतीला पाठिंबा देत आहे.
Parinay Fuke : गणरायाच्या आशीर्वादाने भाजपला मिळाले खरे ‘विघ्नहर्ता’
