राष्ट्रवादी काँग्रेससाठी डोकेदुखी ठरणाऱ्या काहींना प्रवक्ता पदावरून दूर करण्यात आले आहे. खुद्द अजितदादांच्या कार्यालयातून ही माहिती देण्यात आली.
स्थानिक स्वराज्य संस्था निवडणुकीपूर्वी राष्ट्रवादी काँग्रेसमध्ये फेरबदल झाले आहेत. संघटनात्मक असे हे बदल आहेत. त्यानुसार पक्ष आणि दादांसाठी सतत डोकेदुखी ठरणाऱ्यांचं प्रवक्तापद काढण्यात आलं आहे. खुद्द उपमुख्यमंत्री अजित पवार यांच्या कार्यालयातून ही माहिती ‘द लोकहित लाइव्ह’ला देण्यात आली. पक्षाचे कार्याध्यक्ष तथा प्रदेशाध्यक्ष पातळीवरूनही ‘द लोकहित लाइव्ह’ने या विषयाची खात्री करून घेतली.
अजित पवारांनी सूरज चव्हाण यांना प्रवक्ता पदावर नियुक्त केले आहे. अनिल पाटील यांनाही पक्षाने महत्वाची जबाबदारी दिली आहे. रुपाली चाकणकर या देखील पक्षाच्या प्रवक्ता असतील. चाकणकर सध्या राज्य महिला आयोगाच्या अध्यक्ष आहेत. त्यांच्यावर टीका करणाऱ्या रुपाली ठोंबरे यांना प्रवक्ता पदावरून काढण्यात आले आहे. चेतन तुपे हे देखील पक्षाच्या नव्या यादीनुसार प्रवक्ता असतील. आनंद परांजपे आणि अविनाश आदिक यांनाही प्रवक्ता करण्यात आले आहे. सना मलिक, राजलक्ष्मी भोसले या देखील पक्षासाठी वक्तव्य करू शकतील.
हेमलता पाटील, प्रतिभा शिंदे, विकास पासलकर, राजीव साबळे, प्रशांत पवार यांनाही प्रवक्ता करण्यात आले आहे. प्रशांत पवार हे उपराजधानी नागपुरातील आहेत. नागपुरातील दादांच्या समर्थक आभा पांडे यांच्यानंतर पवार यांना आता पक्षात मोठं पद देण्यात आलं आहे. श्याम सनेर, सायली दळवी, शशिकांत तरंगे यांच्या नावाचाही प्रवक्ता यादीत समावेश करण्यात आला आहे. प्रदेशाध्यक्ष सुनील तटकरे यांनी ही नियुक्ती जाहीर केली आहे.
दोघांना शिक्षा
पक्षातील या बदलांबद्दल दादांच्या कार्यालयातून ‘द लोकहित लाइव्ह’ला महत्वाची माहिती देण्यात आली. गेल्या काही दिवसांपासून आमदार अमोल मिटकरी यांच्यासंदर्भात अनेकांची तक्रार होती. मित्र पक्ष, समविचारी पक्षाकडूनही त्यांना समज द्यावी असे सांगण्यात येत होते. अकोल्यातून त्यांनी मनसे प्रमुख राज ठाकरे यांच्यावर टीका केली होती. त्यानंतर मनसेच्या कार्यकर्त्यांनर राडा घातला. यात मनसेच्या एका पदाधिकाऱ्याचा मृत्यू झाला. ही बाब अजितदादांना सर्वाधिक खटकली होती, अशी माहिती पक्षाचे कार्याध्यक्ष आणि प्रदेशाध्यक्ष कार्यालयातून देण्यात आली.
दुसरे म्हणजे डिझाइन बॉक्स कंपनीचे प्रमुख नरेश अरोरा यांच्यावर सोशल माध्यमांवर ताशेरे ओढणे देखील दादांना आवडले नव्हते. त्यावेळी पार्थ पवार यांच्या माध्यमातून दादांनी मिटकरी यांना योग्य तो ‘मेसेज’ दिला होता. आता मिटकरी यांना हा तिसरा आणि अंतिम मेसेज असल्याचे कार्याध्यक्षांच्या कार्यालयातून स्पष्ट करण्यात आले. मिटकरी यांच्या आमदारकीची टर्मही लवकरच संपत आहे, याकडे अजितदादांच्या अत्यंत जवळ असलेल्या नेत्यांनी ‘द लोकहित लाइव्ह’शी बोलताना स्पष्ट केले.
दादांना उगाच डोकेदुखी नको असते. विनाकारण का वाद ओढवून घेता, असे दादांचे म्हणणे असते. दादांवर टीका करणाऱ्या राज्य आणि राष्ट्रीयस्तरावरील नेत्यांना उत्तर देण्यासाठी पक्षाचे कार्याध्यक्ष, प्रदेशाध्यक्ष आहेत. मात्र कोणालाही विश्वासात न घेता उगाच कोणताही प्रकार केलेला दादांना आवडत नाही. दादा योग्य वेळेची प्रतिक्षा करीत असतात. अनेक संधी देत असतात, असेही ‘द लोकहित लाइव्ह’शी बोलताना पक्षातील तीन अत्यंत वरिष्ठ नेत्यांनी स्पष्ट केले.
ठोंबरेंचा अतिरेक
रुपाली पाटील ठोंबरे यांनी राज्य महिला आयोगाच्या अध्यक्ष रुपाली चाकणकर यांच्यावर टीका केलेलीही दादांना रुचली नाही. तिखट आणि शेलक्या भाषेत बोलणे योग्य दिसत नाही. आपल्याच पक्षाच्या व्यक्तीला सार्वजनिकपणे कसे काय बोलता? मिटकरी यांनी नरेश अरोरा यांच्याबाबत सोशल मीडियावर पोस्ट टाकून चूक केली. मात्र ठोंबरे यांनी जास्त आक्रमक भाषा वापरली, असे नेत्यांनी सांगितले. पाटील यांना कारणे दाखवा नोटीसही पाठवण्यात आली. त्यानंतर त्या दादांना भेटल्या. पण दादांनी योग्य काय ती समज त्यांना दिली आहे.
मिटकरी आणि ठोंबरे यांच्यासोबत वैशाली नागवडे आणि संजय तटकरे यांना देखील हटविण्यात आल्याचे नेत्यांनी सांगितले. सर्वच बदल पक्षहिताचे आहेत. काहींना डोकेदुखी होत असल्याचे हटविले आहे. काहींना पक्षांतर्गत फेरबदल म्हणून, असे स्पष्ट करण्यात आले. कोणत्याही पक्षात वाचाळवीरांची चलती फार काळ नसते. टीआरपीसाठी उगाच काहीही करता येत नाही. सतत दादांच्या पुढेपुढे कोण करतात, हे दादा ओळखून आहे. दादांच्या आसपास अनेक जण भुंग्यासारखे फिरत असतात. दादांच्या आसपास दिसतात म्हणून त्यांच्या प्रत्येक गोष्टीशी दादा सहमतच आहेत, असे नाही. आता तरी यापैकी अनेकांनी योग्य तो बोध घ्यावा.
प्रसार माध्यमांनीही कोणाला महत्व द्यायचे आणि किती द्यायचे याचा विचार करावा, असा सल्ला राष्ट्रवादी काँग्रेसमधील नेत्यांनी दिला. पक्षातील काही जण सतत ‘लाइमलाइट’मध्ये राहण्यासाठी प्रसार माध्यमातील काही प्रतिनिधींना ‘ट्रिप’वर नेतात. यासगळ्याची माहिती दादांजवळ आहे. डोक्यावरून पाणी गेलेच तर संबंधित मीडिया हाऊसशी देखील बोलण्याइतकी ताकद दादांमध्ये आहे, असेही कार्याध्यक्ष आणि प्रदेश पातळीवरून स्पष्ट करण्यात आले.
