महाराष्ट्र विधानसभा निवडणुकीचा वाद अद्यापही संपलेला दिसून येत नाही. आधी मतचोरी पासून सुरू झालेला वाद, आता महायुतीच्या मित्रपक्षांमध्येच गुंडाळला गेला आहे. त्यांच्याच मित्रपक्षातील नेते एकमेकांवर आरोप करताना दिसत आहेत.
गडचिरोलीच्या राजकीय रंगमंचावर सध्या नाट्यमय घडामोडी घडत आहेत. स्थानिक स्वराज्य संस्थेची निवडणूक जवळ येत असताना, महायुतीतील मित्रपक्ष असलेल्या भारतीय जनता पक्षावर (BJP) राष्ट्रवादी काँग्रेस अजित पवार गटाच्या (NCP) आमदाराने खळबळजनक आरोप केला आहे. अहेरी मतदारसंघाचे आमदार धर्मराव बाबा आत्राम यांनी थेट भाजपवर हल्ला चढवला आहे. त्यांचा दावा आहे की, भाजपने त्यांना पराभूत करण्यासाठी तब्बल पाच कोटी रुपये देऊन त्यांच्या पुतण्याला डमी उमेदवार म्हणून मैदानात उतरवलं. इतकंच नव्हे, तर आगामी निवडणुकीत आपल्या क्षेत्रात एकही जागा भाजपला देणार नसल्याचा इशारा त्यांनी दिला आहे.
आरोपांमुळे गडचिरोलीच्या राजकीय वर्तुळात तणाव निर्माण झाला असून, महायुतीतील अंतर्गत संघर्ष चव्हाट्यावर आला आहे. धर्मराव बाबा आत्राम यांनी आपल्या खणखणीत शैलीत सांगितलं, माझ्या मतदारसंघात कोण किती जागा लढवायच्या, कोणाला किती जागा मिळायच्या, हे मीच ठरवणार. माझ्या विरोधात भाजपने माझ्या पुतण्याला डमी उमेदवार बनवलं. मला हरवण्यासाठी त्याला पाच कोटी रुपये दिले गेले. पण मी स्पष्ट सांगतो, मी त्यांना एक इंचही जागा देणार नाही. येणाऱ्या निवडणुकीत अहेरीत फक्त घड्याळच चालेल. त्यांच्या या वक्तव्याने राजकीय वातावरण ढवळून निघालं आहे.
अहेरीतील राजकीय रंगभूमी
अहेरीत आता महायुतीतील दोन मित्रपक्ष एकमेकांविरुद्ध उभे ठाकण्याची शक्यता दिसत आहे. गेल्या वर्षी झालेल्या विधानसभा निवडणुकीत अहेरी मतदारसंघात कौटुंबिक लढाई रंगली होती. अजित पवार यांच्या नेतृत्वाखालील राष्ट्रवादी काँग्रेस पक्षाकडून धर्मराव बाबा आत्राम यांनी निवडणूक लढवली. त्यांच्यासमोर त्यांच्या मुलीचे आव्हान होते, जी शरद पवार गटाकडून मैदानात उतरली होती. याशिवाय, धर्मराव बाबांचे पुतणे राजे अंबरीशराव आत्राम यांनी अपक्ष उमेदवार म्हणून निवडणूक लढवली. या तिरंगी लढतीत धर्मराव बाबांनी बाजी मारली. त्यांना 53 हजार 978 मते मिळाली. तर त्यांच्या मुलीला, भाग्यश्री आत्राम यांना 35 हजार 569 मते मिळाली.
अपक्ष उमेदवार राजे अंबरीशराव यांनी 37 हजार 121 मते मिळवली. या विजयाने धर्मराव बाबांनी आपलं वर्चस्व पुन्हा एकदा सिद्ध केलं. 2019 विधानसभा निवडणुकीतही धर्मराव बाबा आत्राम यांनी अहेरीतून विजय मिळवला होता. तेव्हा त्यांनी भाजपच्या उमेदवाराला, म्हणजेच त्यांच्याच पुतण्याला, पराभूत केलं होतं. त्यांना 60 हजार 13 मते मिळाली होती. आता पुन्हा एकदा त्यांनी भाजपवर गंभीर आरोप करत आपल्या मतदारसंघात ‘घड्याळ’चाच बोलबाला राहील, असा निर्धार व्यक्त केला आहे. त्यांच्या या आक्रमक पवित्र्यामुळे स्थानिक स्वराज्य संस्थांच्या निवडणुकीत काय घडणार, याकडे सर्वांचं लक्ष लागलं आहे.
धर्मराव बाबांचा हा आरोप महायुतीच्या एकजुटीला मोठा धक्का देणारा ठरू शकतो. एकीकडे महायुती म्हणून एकत्र लढण्याचा दावा केला जात असताना, दुसरीकडे मित्रपक्षांमधील हा वाद गडचिरोलीच्या राजकारणाला नवी दिशा देऊ शकतो. आगामी निवडणुकीत अहेरीत ‘घड्याळ’ खरोखरच चालेल का, की भाजप आपली रणनीती बदलून नवं आव्हान उभं करेल, हे पाहणं औत्सुक्याचं ठरणार आहे.
