प्रकाश आंबेडकर यांनी पंतप्रधान मोदींवर जोरदार टीका केली आहे. त्यांच्या मते, मोदींच्या धोरणांचा फायदा उद्योगपती मुकेश अंबानी आणि रिलायन्सला झाला आहे, तर जनतेला काही मिळाले नाही.
वंचित बहुजन आघाडीचे नेते प्रकाश आंबेडकर यांनी पंतप्रधान नरेंद्र मोदी यांच्यावर पुन्हा एकदा सणसणीत टीकास्त्र सोडले आहे. त्यांच्या शब्दांतून आक्रमकता आणि वैचारिक तीक्ष्णता दिसून येते. ज्यामुळे राजकीय वर्तुळात खळबळ उडाली आहे. आंबेडकर यांनी मोदींना ‘द्वेष, जातीयवाद आणि मृत्यूचा व्यापारी’ अशी उपमा देत, त्यांच्या धोरणांनी देशातील सामान्य जनतेपेक्षा केवळ मूठभर उद्योगपतींना लाभ झाल्याचा गंभीर आरोप केला आहे. यासोबतच, सनातन धर्माच्या नावाखाली दलित, आदिवासी, ओबीसी आणि महिलांना गुलाम बनवण्याचा डाव असल्याचा दावा त्यांनी केला, ज्याने त्यांच्या टीकेची धार आणखी तीव्र झाली आहे.
आंबेडकर यांचा हा हल्ला केवळ वैयक्तिक टीका नसून, केंद्र सरकारच्या परराष्ट्र आणि आर्थिक धोरणांच्या कथित अपयशावर आधारित आहे. त्यांनी मोदींच्या नेतृत्वाखाली भारताचे जागतिक संबंध बिघडल्याचा दावा करत, विशेषतः अमेरिका आणि रशियासोबतच्या नाजूक परिस्थितीवर बोट ठेवले आहे. या टीकेतून त्यांनी देशातील सामाजिक आणि आर्थिक विषमता, तसेच सत्तेच्या कथित दुरुपयोगावर प्रकाश टाकण्याचा प्रयत्न केला आहे.
Supreme Court : अखेर कोर्टाने ठरवली स्थानिक स्वराज्य निवडणुकीची शेवटची तारीख
परराष्ट्र धोरणाचा पंचनामा
प्रकाश आंबेडकर यांनी मोदी सरकारच्या परराष्ट्र धोरणाला अपयशी ठरवत, भारताचे पारंपरिक संतुलित धोरण डळमळीत झाल्याचा आरोप केला आहे. भारताने नेहमीच अमेरिका आणि रशियासोबत समतोल राखला, परंतु मोदींच्या धोरणांमुळे ही घडी बिघडली आहे. अमेरिकेचे माजी राष्ट्राध्यक्ष डोनाल्ड ट्रम्प यांनी भारतावर लादलेल्या 50 टक्के रेसिप्रोकल टॅरिफमुळे भारत-अमेरिका संबंध 1970च्या दशकातील तणावपूर्ण काळात फेकले गेले, असे आंबेडकर यांचे म्हणणे आहे. दुसरीकडे, रशियाचा चीनकडे वाढता कल आणि व्यापारात चिनी युआनची मागणी यामुळे भारतासमोर नवे संकट उभे राहिले आहे. या परिस्थितीने भारताच्या जागतिक प्रतिमेला आणि आर्थिक स्थैर्याला धक्का बसल्याचा दावा त्यांनी केला.
आंबेडकर यांनी मोदींना ‘सनातन धर्माचा राजा’ संबोधत, या धर्माच्या नावाखाली अस्पृश्यता आणि सामाजिक अन्यायाला खतपाणी घातल्याचा गंभीर आरोप केला आहे. त्यांच्या मते, सनातन धर्म हा दलित, आदिवासी, ओबीसी आणि महिलांना पुन्हा गुलामगिरीच्या खाईत ढकलणारा आहे. मोदींचे धोरण आणि विचारधारा या सामाजिक विषमतेला प्रोत्साहन देत असल्याचा त्यांचा ठाम दावा आहे. ही टीका केवळ राजकीय नसून, सामाजिक सुधारणांचा वारसा लाभलेल्या आंबेडकर यांच्या वैचारिक लढ्याचा एक भाग आहे. ज्यामुळे त्यांच्या वक्तव्याला विशेष वजन प्राप्त झाले आहे.
Cabinet Decision : द्रुतगती रस्त्यापासून संत्र्याच्या सुगंधापर्यंत, मुख्यमंत्र्यांचा मास्टरप्लॅन
आंबेडकर यांनी मोदींच्या धोरणांचा सर्वाधिक फायदा उद्योगपती मुकेश अंबानी आणि त्यांच्या रिलायन्स कंपनीला झाल्याचा दावा केला आहे. रशिया-युक्रेन युद्धादरम्यान भारताने रशियाकडून स्वस्त दरात युरल्स क्रूड तेल खरेदी केले. रिलायन्सने या तेलावर प्रक्रिया करून परदेशात विक्री केली. ज्यामुळे गेल्या तीन वर्षांत कंपनीला 50 हजार कोटींहून अधिक नफा मिळाला. परंतु, याचा सामान्य जनतेला काहीही लाभ झाला नाही, असे आंबेडकर यांनी ठणकावले. भारतात पेट्रोल 95 रुपये आणि डिझेल 88 रुपये प्रति लिटरच्या आसपास राहिले, तरीही या नफ्याचा थेंबही सर्वसामान्यांना मिळाला नाही, असा त्यांचा आरोप आहे.
