राहुल गांधींनी राजुरा मतदारसंघात मतचोरीचे गंभीर आरोप करत पुरावे सादर केले आहेत. या दाव्यामुळे भाजपच्या अल्प मताधिक्याने मिळालेल्या विजयावर संशयाचे सावट पडले आहे.
महाराष्ट्राच्या राजकीय पटलावर चंद्रपूर जिल्ह्यातील राजुरा विधानसभा मतदारसंघ नेहमीच एका रहस्यमय चित्रासारखा उभा राहिला आहे. अनुसूचित जमातींसाठी आरक्षित असलेल्या या भूमीवर शेतकरी-मजूरांच्या आकांक्षा आणि नेत्यांच्या महत्वाकांक्षांचा संघर्ष नेहमीच चुरशीचा ठरतो. 2024 मध्ये झालेल्या विधानसभा निवडणुकीने या मतदारसंघाला पुन्हा एकदा राष्ट्रव्यापी चर्चेच्या केंद्रस्थानी नेले. जिथे विजयाच्या उत्सवात संशयाच्या सावल्या मिसळल्या गेल्या. लोकसभेतील विरोधी पक्षनेते राहुल गांधी यांच्या तीक्ष्ण डोळ्यांनी या राजकीय नाट्याला नवे वळण दिले. ज्यामुळे राजुराच्या मातीतील धागे अधिकच गुंतागुंतीचे झाले.
राजुरा क्षेत्राची राजकीय ओळख केवळ निकालांपुरती नसून, ती स्थानिक संघर्ष आणि राष्ट्रीय राजकारणाच्या जुळणीची साक्ष आहे. भाजप आणि काँग्रेस यांच्या परस्परांतील टक्करीतून उद्भवलेल्या घडामोडींनी नेहमीच वादग्रस्त वळण घेतले. पण यंदा मात्र अनियमिततेच्या ढगांनी आकाश व्यापले आहे. निवडणूक प्रक्रियेच्या पारदर्शकतेवर उमटलेल्या प्रश्नांनी राजुराला एक राजकीय रहस्यमय किल्ल्यात रूपांतरित केले.
Sanjay Deshmukh : बळीराजाच्या आत्महत्यांना आमंत्रण देतंय सरकारचं दुर्लक्ष
संशयाच्या जाळ्यातील राजकारण
भारतीय जनता पक्षाचे देवराव विठोबा भोंगळे यांनी 2024 मधील महाराष्ट्र विधानसभा निवडणुकीत राजुरा मतदारसंघात धडक मारली. त्यांना 72 हजार 882 मते मिळाली, तर काँग्रेसचे ज्येष्ठ योद्धा सुभाष रामचंद्रराव धोटे यांना 69 हजार 828 मते मिळाली. त्यांना 3 हजार 54 मतांच्या अरुंद फरकाने धूळी खावी लागली. हा निकाल राजकीय विश्लेषकांसाठी एक सुपीक भूमी ठरला. कारण 2019 मध्ये धोटे यांनी 60 हजार 228 मते घेऊन विजय साकारला होता, तर 2014 मध्ये भाजपचे संजय धोटे 66 हजार 223 मते मिळवत धडकले होते. राजुरा मतदारसंघात नोंदणीकृत मतदारांची संख्या 3 लाख 15 हजार 73 इतकी प्रचंड आहे. ज्यात पुरुष मतदार 1 लाख 59 हजार 821 आणि महिला मतदार 1 लाख 55 हजार 252 यांचा समतोल राखला गेला. एकूण 344 मतदान केंद्रांद्वारे ही राजकीय लढाई सजगतेने लढली गेली. चंद्रपूर जिल्ह्यातील हा महत्त्वाचा भाग ग्रामीण आणि शहरी मतदारांच्या मिश्रणाने राजकीय समीकरणे नेहमीच हलवून टाकतो.
Sharad Pawar : कर्जाचा गळफास ते बेड्यांचा झटका; राष्ट्रवादीला विदर्भात शॉक
राहुल गांधी यांनी पत्रकार परिषदेत राजुरा मतदारसंघातील अनियमिततेचा पर्दाफाश केला. हजारो मतदारांची नावे वगळली गेल्याचा आणि 6 हजार 850 नवीन नावे भरली गेल्याचा दावा करत, त्यांनी निवडणूक प्रक्रियेच्या पारदर्शकतेवर संशय निर्माण केला. हा प्रकार महाराष्ट्रासह इतर राज्यांमध्येही घडल्याचा उल्लेख करत, पुराव्यांसह सादरीकरण केले. पराभूत उमेदवार सुभाष धोटे यांनीही निवडणुकीपूर्वी बोगस नोंदणीची तक्रार नोंदवली होती. ज्यात 6 हजार 853 नावे कमी करण्यात आली, तरीही अवशेष संशय कायम आहे. विजयी योद्धा देवराव भोंगळे हे भाजप नेते सुधीर मुनगंटीवार यांचे निकटवर्तीय आहेत. माजी जिल्हाध्यक्ष आणि जिल्हा परिषदेचे माजी अध्यक्ष म्हणून त्यांची ओळख आहे. निवडणुकीत त्यांनी तरुण आणि ऊर्जावान चेहऱ्याची छाप पाडली. ज्याने पारंपरिक राजकीय किल्ल्यांना आव्हान दिले. राजुराच्या विकासासाठी त्यांच्या योजनांनी स्थानिक राजकारणाला नवे वळण दिले.
