अकोला जिल्ह्यातील अनेक गावांवर अतिवृष्टीचा तडाखा बसला आहे. यामुळे शेतकऱ्यांचे पिकांचे आणि नागरिकांचे मोठे नुकसान झाले आहे.
अकोला जिल्ह्यातील पूर्व मतदारसंघावर निसर्गाने पुन्हा एकदा संकटाचा घाला घातला. सलग दोनदा झालेल्या अतिवृष्टीमुळे शेतकऱ्यांच्या कष्टाचे पीक वाहून गेले. नागरिकांच्या घरांचे नुकसान झाले. संपूर्ण परिसरात हतबलतेचे वातावरण पसरले. या गंभीर पार्श्वभूमीवर आमदार रणधीर सावरकर यांनी अतिवृष्टीग्रस्त शिवारात पाऊल ठेवत नुकसानीची प्रत्यक्ष पाहणी केली. शेतकऱ्यांचे हाल ऐकून घेण्याबरोबरच त्यांनी अधिकाऱ्यांना तातडीने उपाययोजना राबविण्याचे ठोस आदेश दिले.
निसर्गाच्या कोपानंतर धक्क्यात असलेल्या शेतकरी व नागरिकांच्या मनात आमदारांच्या या दौऱ्यामुळे एक प्रकारची दिलासा निर्माण झाला. त्यांनी सर्वांना न्याय मिळेल, कोणाचाही हक्क हिरावला जाणार नाही, असा ठाम निर्धार व्यक्त करत प्रशासनाला सजग राहण्याची ताकीद दिली. अकोट तालुक्यातील खापरवाडी, वरूर जवळका, सावरगाव, विटाळी, पुंडा या पंचक्रोशीतील गावांनी पुन्हा एकदा निसर्गाची झळ सोसली असून या सर्व ठिकाणी रणधीर सावरकर यांनी थेट शेतात, रस्त्यावर आणि गावोगावी जाऊन परिस्थितीचा आढावा घेतला.
NMC Election : देवाभाऊंच्या गृहनगरात कोण ठरेल खरा ‘विघ्नहर्ता’?
शिवारात आमदारांची पावले
अगदी शेतात साचलेले पाणी, पुरामुळे खरडून गेलेली शेती, नाल्यातून ओसंडून शेतात घुसलेले पाणी या सर्व गोष्टींचा आमदार सावरकरांनी बारकाईने अभ्यास केला. पिकांवरील बोंड अळी, हुमणी आळी यांसारख्या कीड-रोगांच्या प्रसारामुळे दुबार नुकसान झाले असल्याचे त्यांनी पाहणीदरम्यान स्पष्ट केले. तहसीलदार चव्हाण, कृषी अधिकारी, तलाठी, ग्रामसेवक या अधिकाऱ्यांना त्यांनी तातडीने पंचनामे करण्याचे आदेश देऊन कोणतीही ढिलाई न करण्याचे स्पष्ट निर्देश दिले. नदी-नाले उथळ झाल्यामुळे शेतात पाणी शिरून दरवर्षी नुकसान होत असल्याचे शेतकऱ्यांनी मांडल्यावर रणधीर सावरकरांनी या प्रश्नावर गंभीर दृष्टी टाकली. नाले व नद्यांचे खोलीकरण व रुंदीकरण करण्याचे प्रस्ताव तहसीलदारांनी तातडीने सादर करावेत, असा आदेश त्यांनी दिला. यामुळे पुढील काळात अशी परिस्थिती टाळता येईल, असा विश्वासही त्यांनी व्यक्त केला.
वरूर येथे आयोजित आढावा बैठकीत आमदार सावरकरांनी शेतकरी व नागरिकांच्या व्यथा जाणून घेतल्या. शेतकऱ्यांचे डोळे पाणावलेले पाहून ते स्वतः भावूक झाले. शासन सर्व नुकसानग्रस्तांच्या खांद्याला खांदा लावून उभे आहे. कोणालाही भरपाईपासून वंचित ठेवले जाणार नाही, असे त्यांनी सांगितले. या बैठकीत स्थानिक भाजपा महायुती पदाधिकारी, शेतकरी व नागरिक मोठ्या संख्येने उपस्थित होते. अकोट तालुक्यातील या दौऱ्याने रणधीर सावरकर यांनी पुन्हा एकदा आपली लोकाभिमुख प्रतिमा स्पष्ट केली. शेतकऱ्यांच्या चेहऱ्यावर उमटलेली चिंता त्यांनी पाहिली आणि त्यांच्या मनात दिलासा निर्माण होईल अशी ठोस पावले उचलली. अतिवृष्टीच्या या संकटसमयी प्रशासनाला सजग ठेवून शेतकऱ्यांच्या न्याय्य हक्कासाठी लढा देण्याचा निर्धार त्यांनी स्पष्ट केला.
