अतिवृष्टीमुळे आणि कर्जमाफी न मिळाल्याने महाराष्ट्रातील शेतकरी निराश झाले आहेत. तरीही केंद्र आणि राज्य सरकार त्यांच्या दुर्दशेकडे दुर्लक्ष करत असल्याचा आरोप सातत्याने होत आहे.
महाराष्ट्रातील शेतकरी आजही कर्जमाफीच्या प्रतीक्षेत आहेत. गेल्या काही महिन्यांपासून हा मुद्दा प्रलंबित आहे. या काळात शेतकरी आत्महत्यांच्या घटनाही थांबलेल्या नाहीत. अतिवृष्टीने झालेल्या नुकसानीमुळे शेतकरी पुन्हा हतबल झाले आहेत. या पार्श्वभूमीवर केंद्रीय गृहमंत्री अमित शहा यांनी 5 ऑक्टोबर रोजी अहिल्यानगरचा दौरा केला. मात्र, या दौऱ्यावर शेतकरी संघटनेचे नेते रविकांत तुपकर यांनी तीव्र शब्दांत टीका केली आहे. तुपकरांच्या मते, शहांच्या दौऱ्यात शेतकऱ्यांच्या समस्या सोडवण्याऐवजी राजकीय भाषणे झाली. ज्याने शेतकऱ्यांच्या जखमांवर मीठ चोळण्यासारखे वाटते.
तुपकर म्हणतात, राज्य सरकारने पूरग्रस्तांसाठी कुठलाही प्रस्ताव पाठवलेला नाही, असा सुतोवाच अमित शहांनी सभेत केला. यामुळे राज्य सरकार पूरग्रस्तांच्या बाबतीत गंभीर नसल्याचे स्पष्ट झाले आहे. पूरग्रस्त शेतकरी आजही मदतीच्या प्रतीक्षेत आहेत. त्यांच्या मनात सरकारने त्यांना वाऱ्यावर सोडल्याची भावना दृढ झाली आहे. एवढ्या मोठ्या प्रमाणात नुकसान झाल्यानंतरही राज्य सरकार संवेदनशील नसेल, तर या सरकारचा कडेलोट लावणे हाच एकमेव पर्याय उरतो, असेही तुपकर म्हणाले. केंद्र सरकारचे नेते, मग ते अमित शहा असोत की पंतप्रधान मोदी, त्यांनी पूरग्रस्त भागांना भेट देणे आवश्यक होते.
कर्जमाफीची मागणी कायम
शेतकऱ्यांच्या व्यथा प्रत्यक्ष ऐकणे गरजेचे होते. पण दुर्दैवाने, सरकार शेतकऱ्यांच्या बाबतीत अजिबात गंभीर दिसत नाहीत. शेतकरी आत्महत्यांच्या वाढत्या घटना असूनही सरकारला काही फरक पडत नाही. हे सरकार मुजोर आणि मनाने कठोर आहे, असा आरोपही रविकांत तुपकर यांनी केला. तुपकरांनी सरकारला इशारा देत म्हटले आहे की, पूरग्रस्तांना कोल्हापूर आणि सांगलीच्या धरतीवर एनडीआरएफच्या चारपट मोबदला मिळावा. जर हा मोबदला दिला नाही, तर महाराष्ट्रात प्रचंड मोठे आंदोलन उभे राहील. शेतकऱ्यांच्या असंतोषाला सरकारला सामोरे जावे लागेल. हे आंदोलन इतके तीव्र असेल की, सरकारच्या नीतींना धक्का बसू शकतो. तुपकरांच्या या हल्ल्याने शेतकरी संघटनांमध्ये नवे चैतन्य आले आहे.
शेतकरी आजही अतिवृष्टीच्या तडाख्यातून सावरलेले नाहीत. कर्जमाफीच्या अभावाने त्यांची अवस्था अधिकच बिकट झाली आहे. राज्यातील शेतकरी आत्महत्यांच्या आकडेवारीकडे पाहता, सरकारच्या निष्क्रियतेचे गांभीर्य लक्षात येते. अमित शहांच्या दौऱ्याचे कारणही लक्षवेधी आहे. पद्मश्री डॉ. विखे पाटील सहकारी साखर कारखान्याचे नूतनीकरण आणि लोणी येथील पद्मश्री डॉ. विठ्ठलराव विखे पाटील तसेच पद्मभूषण डॉ. बाळासाहेब विखे पाटील यांच्या संयुक्त पुतळ्याचे अनावरण त्यांच्या हस्ते झाले. कारखान्याचे अध्यक्ष डॉ. सुजय विखे यांनी याबाबत माहिती दिली. काही दिवसांपूर्वीच शहा प्रवारानगर येथे सहकार परिषदेच्या उद्घाटनासाठी आले होते. आता अल्पावधीतच ते पुन्हा महाराष्ट्रात आले. हे दौरे राजकीयदृष्ट्या महत्त्वाचे असले तरी, शेतकऱ्यांच्या दृष्टिकोनातून ते अपुरे ठरतात.
Harshwardhan Sapkal : अकरा वर्षांचा वनवास संपवून एहेतेश्याम परतले काँग्रेसमध्ये
