विधानसभा निवडणुकीत काँग्रेसचा ताकद पुरविणारे राष्ट्रवादी काँग्रेसचे नेते गुलाबराव गावंडे आणि अकोला पश्चिमचे आमदार साजिद खान पठाण यांनी गणेश विसर्जन मिरवणुकीत अनेकांचे लक्ष वेधून घेतले.
सगळं काही ‘फेव्हरेबल’ आहे अशा ओव्हर ‘कॉफिडन्स’मध्ये असलेल्या अकोला भाजपला कौलखेड भागातून जोरदार धक्का बसला. भाजप नेत्याच्या मुलानं कौलखेड भागात दाखविलेल्या मुजोरीमुळं एका रात्रीतून वातावरण पलटलं. याचा फायदा राष्ट्रवादी काँग्रेसचे गुलाबराव गावंडे यांनी घेतला. त्यानंतर कौलखेड भागातून काँग्रेसचे साजिद खान पठाण यांना मताधिक्य मिळालं. हेच साजिद खान पठाण आणि गुलाबराव गावंडे गणेश विसर्जन मिरवणुकीत लक्षवेधी ठरले.
एकेकाळी कट्टर शिवसैनिक असलेले राज्याचे माजी क्रीडामंत्री गुलाबराव गावंडे आता राष्ट्रवादी काँग्रेसमध्ये आहेत. सध्या ते पवारांची पावर वाढवत आहेत. शनिवारी (6 सप्टेंबर) अकोल्यात गणेश विसर्जन शोभायात्रा निघाली. मानाच्या तीन गणपतींचे पूजन करण्यासाठी अकोल्यातील सर्व राजकीय नेते जय हिंद चौकात उपस्थित होते. अकोलेकरांना पहिल्यांदान लालाजी अर्थात गोवर्धन शर्मा यांच्या जागेवर दुसरा आमदार दिसत होते. हा आमदार भाजपचा नव्हता. काँग्रेसचा होता.
Akola Politics : बाप्पा निघाले गावाला, राजकीय पक्ष लागले शक्ती प्रदर्शनाला
अंगावर गुलाल
काँग्रेसने ‘विजय’ मिळविल्यानं यंदा अकोला पश्चिमचे लोकप्रतिनिधी म्हणून साजिद खान पठाण गणेश विसर्जन मिरवणुकीतील स्वागताच्या व्यासपीठावर होते. एक एक करीत मानाचे गणपती जय हिंद चौकात येत होते. मान्यवरांच्या हस्ते प्रत्येक गणपतीचे स्वागत व पूजन करण्यात येत होतं. परंतु या सगळ्यात लक्षवेधी ठरत होतं ते गुलाबराव गावंडे आणि साजिद खान पठाण यांचं ‘कॉम्बीनेशन’. दोन्ही नेते व्यासपीठावर पूर्णवेळ एकमेकांशी संवाद साधत होते. गुलाबराव गावंडे पूर्णवेळ साजिद खान पठाण यांना कानात काही ना काही सांगताना दिसले. शेजारीच कामगार मंत्री तथा अकोल्याचे पालकमंत्री आकाश फुंडकर, आमदार अमोल मिटकरी आणि भाजपचे काही पदाधिकारीही होते. मात्र या साऱ्यांमध्ये गुलाबराव हे साजिद खान पठाण यांना कानमंत्र देत होते.
लवकरच राज्यात स्थानिक स्वराज्य संस्थेची निवडणूक होणार आहे. जिल्हा परिषदेत वंचित बहुजन आघाडी विरुद्ध शिवसेना उद्धव बाळासाहेब ठाकरे अशी थेट लढत होणार आहे. अकोला महापालिकेवर सत्ता मिळविण्यासाठी काँग्रेसचे आमदार साजिद खान पठाण हे सध्या प्रचंड ताकद पणाला लावत आहे. भाजपमध्ये प्रचंड अंतर्गत धुसफूस आहे. दोन नेते म्हणजेच भाजप असे समिकरण अकोल्यात आहे. शिवसेना एकनाथ शिंदे गटही विखुरलेला आहे. राष्ट्रवादी काँग्रेस अजित पवार गटाची फारशी ताकद अकोल्यात नाही. अशा परिस्थितीत साजिद खान हे लोकांचं मन जिंकण्यासाठी वेगवेगळ्या प्रकारांचा अवलंब करत आहेत. एकदा महापालिका जिंकली की, शहरात अबाधित वर्चस्व प्रस्थापित होऊ शकते. ही बाब साजिद खान यांना ठाऊक आहे. अशात त्यांना महापालिका निवडणूक जिंकण्यासाठी तर गुलाबराव गावंडे यांनी कानमंत्र दिला नसावा ना? अशी चर्चा आहे.
