भंडारा जिल्ह्यातील एका नगरपरिषदेत सुरू असलेला भ्रष्टाचार आता थांबणार आहे. या नगरपरिषदेतील एका प्रमुखावर लवकरच कारवाईची वीज कोसळणार आहे.
ज्योतिष शास्त्रात आणि सामान्य लोकांमध्ये शनीला खूप महत्व आहे. शनी महाराज आपल्यावर रुसावे असे कुणालाही वाटत नाही. सध्या जून महिन्यापासून शनी महाराज मीन राशीतून उलट प्रवास करत कुंभ राशीकडे जात आहेत. त्यामुळे चुकीची कामे करणाऱ्यांना जे सुटलो एकदाचे असे वाटत होते, त्यांच्यावर पुन्हा शिक्षेची कुऱ्हाड कोसळणार आहे. भंडारा जिल्ह्यातील एका नगरपरिषदेत प्रमुख असलेल्या अधिकाऱ्याला शनीचा असाच फटका बसणार आहे. त्याच्या कर्माची फळं देण्यासाठी मंत्रालयात वेगाने प्रक्रिया सुरू झाली आहे.
भाजप नेते माजी मंत्री आमदार डॉ. परिणय फुके यांनी अलीकडेच या नगरपरिषद मधील कामाबद्दल तीव्र नाराजी व्यक्त केली होती. महसूल मंत्री चंद्रशेखर बावनकुळे यांच्या उपस्थितीत अलीकडेच दिवाळी मिलन कार्यक्रम पार पडला. या कार्यक्रमात सगळ्यांचे तोंड गोड झाले. अशात डॉ. फुके यांनी भंडारा जिल्ह्यातील एका नगरपरिषदेतील भ्रष्टाचारावर प्रहार केला. काही दिवसांपूर्वी फुके यांनी या नेत्याचा पाणउतारा देखील केला होता. आता फुके यांनी तक्रार केली म्हटल्यावर मुख्यमंत्री काय किंवा महसूल मंत्री काय? कुणीही हलक्यात घेतले नाही.
मोठा फटका
डॉ. फुके यांनी ज्या अधिकाऱ्याबाबत तक्रार केली तो 20 टक्के कमिशनमध्ये पटाईत आहे. आपल्या कामातील 20 टक्के हिस्सा तो भंडारातील एका नेत्याला चढवत असतो. अधिकाऱ्याच्या मदतीने या नेत्यालाही नियमित आर्थिक सप्लाय सुरू होता. मात्र आता हा ‘करंट’ पूर्णपणे कापला जाणार आहे. दिवाळी आटोपताच मंत्रालयातून मोठा फटाका या अधिकाऱ्याच्या खुर्चीखाली फुटणार आहे. नायक चित्रपटातील मुख्यमंत्र्याची भूमिका साकारताना अनिल कपूर फटाफट काही भ्रष्ट अधिकाऱ्यांना ‘यू आर सस्पेंडेड’ हे सांगताना दिसतो. तसाच काहीसा सीन आता भंडारा जिल्ह्यात दिसणार आहे.
राज्यातील नगर परिषदेमध्ये सध्या प्रशासन राज आहे. प्रशासनातील अधिकाऱ्यांनी जनतेच्या हिताची कामे करणे अपेक्षित आहे. परंतु भंडारा जिल्ह्यातील एका नगर परिषदेत कमिशन खोरीचा खेळ गेल्या अनेक दिवसांपासून सुरू होता. त्यामुळे जनतेची कामे थांबली होती. या संदर्भात सर्वसामान्य नागरिकांकडून मोठ्या प्रमाणावर तक्रारी केल्या जात होत्या. या सर्व गंभीर तक्रारींची दखल घेत आमदार डॉ. परिणय फुके यांनी दिवाळी स्नेहलनामध्ये भ्रष्टाचाराच्या फटाक्याची वात लावली. ही वात लवकरच मोठा बॉम्ब फोडेल, यात दुमत नाही. संबंधित भ्रष्ट अधिकारी घरी गेल्यानंतर, त्याच्याकडून एका नेत्याला येणारा चढावा मात्र बंद होणार आहे.
