नगराध्यक्ष पदाच्या निवडणुकीसाठी आरक्षण सोडत जाहीर झाल्यानंतर राजकीय वर्तुळात खळबळ माजली आहे. या सोडतीमुळे अनेक राजकीय पक्षांच्या आणि नेत्यांच्या भुवया उंचावल्या आहेत.
महाराष्ट्राच्या राजकीय पटलावर स्थानिक स्वराज्य संस्थांच्या निवडणुकीचा बिगुल वाजल्याने, सर्वत्र एक वेगळीच उत्सुकता सुरू झाली आहे. बुलढाणा येथील सिंदखेड राजा नगर परिषदेच्या प्रभाग रचनेची जाहीर झालेली आरक्षण सोडत यंदा विशेष चर्चेचा विषय ठरली आहे. एकूण 20 सदस्यांच्या या परिषदेत अनुसूचित जाती (एससी) साठी 3 जागा, ओबीसी साठी 5 जागा आणि खुल्या प्रवर्गासाठी 12 जागा ठेवण्यात आल्या आहेत. यात सर्वांत उल्लेखनीय बाब म्हणजे 10 जागा महिलांसाठी राखीव ठेवण्यात आल्या आहेत.
अनुसूचित जाती महिलांसाठी 2, ओबीसी महिलांसाठी 3 आणि सर्वसाधारण महिलांसाठी 5 अशा प्रकारे हे आरक्षण वाटप करण्यात आले आहे. हे आरक्षण महिलांच्या राजकीय सक्षमीकरणाच्या दिशेने एक मोठे पाऊल आहे. या आरक्षण सोडतीने अनेक पुरुष नेत्यांच्या महत्त्वाकांक्षांना धक्का बसला आहे. ज्या जागांवर ते वर्षानुवर्षे दावा करत होते, त्या आता महिलांच्या हाती जाणार आहेत. नगराध्यक्ष पदासाठीही खुल्या प्रवर्गात आरक्षण जाहीर झाले आहे. यामुळे राजकीय पक्षांमध्ये चुरस वाढली आहे. कारण महिला उमेदवारांना प्राधान्य देणे आता अपरिहार्य झाले आहे.
Prakash Ambedkar : मनुवादी मानसिकतेची पराकाष्ठा हल्ल्यावरून दिसते
उमेदवारांची धांदल
प्रभागनिहाय आरक्षण पाहता, प्रत्येक प्रभागात दोन सदस्य आहेत. प्रभाग 1 मध्ये अनुसूचित जाती महिला आणि सर्वसाधारण, प्रभाग 2 मध्ये ओबीसी आणि सर्वसाधारण महिला. प्रभाग 3 मध्ये ओबीसी आणि सर्वसाधारण महिला, प्रभाग 4 मध्ये सर्वसाधारण महिला आणि सर्वसाधारण, प्रभाग 5 मध्ये ओबीसी महिला आणि सर्वसाधारण, प्रभाग 6 मध्ये ओबीसी महिला आणि सर्वसाधारण, प्रभाग 7 मध्ये अनुसूचित जाती सर्वसाधारण आणि सर्वसाधारण महिला. प्रभाग 8 मध्ये सर्वसाधारण महिला आणि सर्वसाधारण. प्रभाग 9 मध्ये ओबीसी महिला आणि सर्वसाधारण. तर प्रभाग 10 मध्ये अनुसूचित जाती महिला आणि सर्वसाधारण.
हे वाटप इतके सर्जनशील आणि समतोल आहे की, प्रत्येक वर्गाला न्याय मिळेल आणि महिलांचा आवाज अधिक मजबूत होईल. राजकीयदृष्ट्या पाहता, हे आरक्षण महाविकास आघाडी आणि महायुती यांच्यातील स्पर्धेला आणखी तीव्र करेल, कारण दोन्ही गटांना महिला उमेदवार शोधण्यासाठी धडपड करावी लागेल. आरक्षण सोडत पार पडताच, इच्छुक उमेदवारांच्या तयारीला वेग आला आहे. अपक्ष उमेदवारांसह सर्व राजकीय पक्ष आता जोरदार मोर्चेबांधणी करत आहेत. शहरातील वॉर्ड कोणत्या पक्षासाठी अनुकूल राहील, याची चर्चा जोरात सुरू आहे. दिवाळी संपल्यानंतर राजकीय दिवाळी सुरू होणार, असे चित्र दिसत आहे.
Vijay Wadettiwar : दोन सप्टेंबरच्या काळ्या जीआरचा घालमेल थांबवा
