राज्यात वाढत्या उन्हाच्या तीव्रतेमुळे विद्यार्थ्यांच्या आरोग्यावर परिणाम होऊ नये म्हणून शिक्षण विभागाने महत्त्वपूर्ण निर्णय घेतला आहे. प्राथमिक आणि माध्यमिक शाळांच्या वेळांमध्ये बदल करून विद्यार्थ्यांचे आरोग्य व शिक्षण यांचे संतुलन राखण्याचा प्रयत्न करण्यात आला आहे.
राज्यात वाढत्या उन्हाच्या तीव्रतेमुळे विद्यार्थ्यांच्या आरोग्यावर होणाऱ्या संभाव्य परिणामांना लक्षात घेता शिक्षण विभागाने महत्त्वपूर्ण निर्णय घेतला आहे. प्राथमिक आणि माध्यमिक शाळांच्या वेळांमध्ये बदल करण्याचा आदेश प्राथमिक विभागाचे शिक्षण संचालक शरद गोसावी आणि माध्यमिक व उच्च माध्यमिक शिक्षण विभागाचे संचालक संपत सूर्यवंशी यांनी दिला आहे. या निर्णयामुळे उन्हाळ्याच्या झळांपासून विद्यार्थ्यांचे संरक्षण होणार व विद्यार्थ्यांचे आरोग्य सुरक्षित राहील.
राज्यातील सर्व प्राथमिक शाळा सकाळी 7 वाजता सुरू होऊन 11.15 वाजता सुटतील, तर माध्यमिक शाळांचे वेळापत्रक सकाळी 7 वाजल्यापासून 11.45 वाजेपर्यंत निश्चित करण्यात आले आहे. शिक्षण विभागाच्या आदेशानुसार, उन्हाळ्यातील शाळा व्यवस्थापनाचे नियम स्पष्ट करण्यात आले आहेत. शाळांमध्ये विद्यार्थ्यांना आवश्यक सुविधा उपलब्ध करून देण्याच्या सूचना देण्यात आल्या आहेत. यामध्ये पंखे सुस्थितीत असणे, थंड पाण्याची सोय आणि विद्यार्थ्यांना उन्हापासून बचाव करण्यासंबंधी मार्गदर्शन करणे यासह विविध उपाययोजना करण्यात आल्या आहेत.
अध्यापनाचे नियोजन
उष्णतेच्या तीव्रतेमुळे शारीरिक हालचालींवर मर्यादा आणण्यासाठी आणि विद्यार्थ्यांचे आरोग्य सुरक्षित राखण्यासाठी शाळांना काही महत्त्वपूर्ण सूचना देण्यात आल्या आहेत. शाळांमध्ये मैदानी खेळ टाळण्याचे निर्देश देण्यात आले आहेत. उष्णतेपासून बचाव करण्यासाठी विद्यार्थी आणि शिक्षकांना हलक्या रंगाचे, सुती आणि आरामदायी कपडे परिधान करण्याचा सल्ला देण्यात आला आहे.
विद्यार्थ्यांना उन्हापासून बचाव करण्यासाठी टोप्या, उपरणे, टॉवेल किंवा छत्री वापरण्यास सांगण्यात आले आहे. याशिवाय, त्यांना टरबूज, संत्री, खरबूज, द्राक्षे, अननस, काकडी यांसारखी हंगामी फळे आणि भाज्यांचे सेवन करण्यास प्रोत्साहित केले जात आहे.
प्रशासनाची तातडीची पावले
शाळेतील वर्ग खोल्यांमध्ये वायुवीजन योग्यरित्या कार्यरत आहे की नाही, याची खातरजमा करण्याचे आदेश मुख्याध्यापकांना देण्यात आले आहेत. उन्हाळ्याच्या काळात विद्यार्थ्यांना थंड पाणी पुरवले जावे, तसेच मैदानी वर्ग आयोजित करणे टाळावे, असेही निर्देश देण्यात आले आहेत.
शाळा प्रशासनाने विद्यार्थ्यांच्या सुरक्षिततेसाठी उपाययोजना तातडीने लागू कराव्यात आणि उन्हाच्या झळांपासून त्यांचे संरक्षण करावे, असा आदेश शिक्षण संचालकांनी दिला आहे. राज्यातील सर्वच शाळांनी या नवीन वेळापत्रकाचे पालन करावे, तसेच विद्यार्थ्यांच्या आरोग्यासाठी आवश्यक त्या उपाययोजना कराव्यात, यासाठी शिक्षण विभागाने संपूर्ण राज्यभर तपासणी मोहिम हाती घेतली आहे.
