महिलांच्या सशक्तीकरणाचे गाजावाजाने दिलेले आश्वासन फोल ठरले, तर महिलादिनाच्याच दिवशी लाडक्या बहिणींना सरकारकडून फसवणुकीचा मोठा धक्का बसला. महायुती सरकारच्या निवडणूकपूर्वीच्या गोंडस वचनांचा आता भांडाफोड झाला आहे.
राज्यातील महिलांसाठी संजीवनी ठरणारी मुख्यमंत्री लाडकी बहिण योजना आता महिलांच्या रोषाचा केंद्रबिंदू ठरली आहे. महायुती सरकारने निवडणुकीपूर्वी दिलेल्या मोठमोठ्या आश्वासनांचे फोलपण समोर आले असून, महिलादिनीच लाखो लाभार्थींना सरकारने फसवल्याची भावना समाजात प्रबळ झाली आहे. निवडणुकीच्या तोंडावर गाजावाजा करत सुरू केलेली ही योजना आता निव्वळ दिखावा ठरत आहे.
महिला दिनानिमित्त 8 मार्च रोजी फेब्रुवारी आणि मार्च महिन्याचा एकत्रित हप्ता म्हणून तीन हजार रुपये थेट खात्यात जमा होतील, अशी घोषणा करण्यात आली होती. मात्र, वास्तवात केवळ पंधराशे रुपयेच जमा झाले. यामुळे लाभार्थींमध्ये मोठ्या प्रमाणावर नाराजी पसरली आहे. सरकारकडून महिलांची फसवणूक होत असल्याची भावना महिलांमध्ये निर्माण झाली आहे.सरकारने दोन महिन्यांचे एकत्रित पैसे देण्याचे जाहीर करून मोठी गाजावाजा केला. मात्र, पैसे देताना अर्धाच हप्ता देण्यात आला. सरकारने महिलादिनीच महिलांची फसवणूक केली आहे, असे स्पष्ट झाले आहे. योजनेबाबत अनेक तक्रारी येत असून, हजारो महिलांना लाभ मिळालेलाच नाही.
खोटी आश्वासनं
महायुती सरकारने निवडणुकीच्या आधी महिलांना दरमहा एकविसशे रुपये देण्याचे आश्वासन दिले होते. मात्र, सत्ता स्थापन झाल्यानंतर हे आश्वासन पूर्ण करणे तर दूरच, पंधराशे रुपये मिळायलाही विलंब होत आहे. अर्थसंकल्पीय अधिवेशनात महिला व बालविकास मंत्री आदिती तटकरे यांनी एकविसशे रुपये देण्याची कोणतीही घोषणा केली नाही. यामुळे महायुती सरकारचा महिलांविषयी असलेला असंवेदनशील चेहरा समोर आला आहे. विरोधकांनी सरकारवर जोरदार टीका करत हा महिलांचा अपमान असल्याचे म्हटले आहे. लाडकी बहिणींसाठी मोठ्या गाजावाजाने सुरू करण्यात आलेली योजना फसवी असल्याचे आता स्पष्ट झाले आहे. हजारो महिलांना अपात्र ठरवून त्यांना लाभापासून वंचित ठेवले जात आहे.
सशक्तीकरणाचा केवळ दिखावा
महिलांचे आर्थिक सशक्तीकरण करण्यासाठी सुरू करण्यात आलेल्या या योजनेला आता अपयश आले आहे. योजना सुरू करताना मोठे दावे करण्यात आले, मात्र, प्रत्यक्षात योजना महिलांच्या स्वाभिमानाचा खेळ बनली आहे. महिलांचे स्वप्न दाखवून सरकारने त्यांचा विश्वासघात केला आहे.लाडकी बहिण योजना महिलांसाठी वरदान ठरणार होती, मात्र, तीच आता निवडणुकीपूर्वीचा दिखाऊ कार्यक्रम ठरली आहे. महिलांनी सरकारवर विश्वास ठेवला, मात्र सरकारने त्यांचा अनादरच केला. महायुती सरकारने महिलांना फसवले असून, महिलांचे हक्क डावलण्याचे गंभीर पाऊल उचलले आहे.
सरकारवर तीव्र रोष
महिला दिनाच्या पार्श्वभूमीवर महिलांच्या खात्यात पूर्ण पैसे जमा न होणे हे सरकारच्या असंवेदनशीलतेचे आणखी एक उदाहरण आहे. महिलांनी सरकारकडून मोठ्या अपेक्षा ठेवल्या होत्या, मात्र त्या पूर्ण झाल्या नाहीत. सरकारच्या चुकीच्या धोरणांमुळे महिलांची मोठ्या प्रमाणावर फसवणूक झाली असून, सरकारने महिलांचा विश्वास गमावल्याचे चित्र आहे. महायुती सरकारने महिलांना फसवण्याचे काम केले असून, या योजनेच्या नावाखाली मोठा निवडणूक प्रचार केला गेला. मात्र, प्रत्यक्षात महिलांना दिलासा मिळण्याऐवजी फसवणुकीची जाणीव होत आहे.
