सत्तेच्या सिंहासनावर बसलेल्यांना जबाबदारीचं भान हरवलंय, अधिवेशनाच्या पवित्र सभागृहात मोबाईलवर रमी खेळणारे कृषिमंत्री आणि जाब विचारला तर कार्यकर्त्यांकडून मारहाण! हे सरकार आहे की, गुंडांचे टोळके? असा थेट सवाल काँग्रेसचे नेते विजय वडेट्टीवार यांनी उपस्थित केला आहे.
राज्याचे कृषिमंत्री माणिकराव कोकाटे यांचा विधानसभेच्या सभागृहातील व्हिडिओ व्हायरल झाला आहे. या व्हिडिओमध्ये कोकाटे मोबाईलवर रमी खेळताना दिसतात. या प्रकारामुळे राज्यातील शेतकऱ्यांच्या व्यथा पुन्हा एकदा राजकारणाच्या केंद्रस्थानी आल्या आहेत. शेतकरी आत्महत्या करत असताना कृषिमंत्री अधिवेशनात पत्ते खेळतात? ही कोणत्या राजकारणाची थोर परंपरा आहे? असा संतप्त सवाल आता विरोधकांनी विचारला आहे.
या घटनेमुळे राजकीय वातावरण तापले असतानाच लातूरमध्ये अजून एक वादळ उसळलं. राष्ट्रवादी काँग्रेस अजित पवार गटाचे प्रदेशाध्यक्ष सुनील तटकरे लातूरमध्ये पत्रकार परिषद घेत होते. मात्र, तिथे अचानक छावा संघटनेचे कार्यकर्ते पोहोचले. त्यांनी थेट तटकरे यांना कृषिमंत्री कोकाटे यांच्याविरोधात कारवाई करण्याची आणि त्यांना पदावरून हटवण्याची मागणी केली. यानंतर झालेला प्रकार लाजीरवाणा होता. तिथेच राष्ट्रवादी आणि छावा संघटनेच्या कार्यकर्त्यांमध्ये तुंबळ हाणामारी झाली. एकमेकांना लाथा-बुक्क्यांनी बेदम मारहाण करण्यात आली. विशेष म्हणजे 17 जुलै रोजी देखील विधान भवनात दोन आमदारांचे कार्यकर्त्यांमध्ये बेदम मारहाण झाली होती.
NCP : ‘रमी’ राड्याचा स्फोट, राष्ट्रवादीच्या पत्रकार परिषदेत घुसून मारहाण
गंभीर आरोप
या पार्श्वभूमीवर आता काँग्रेसचे नेते विजय वडेट्टीवार यांनी सत्ताधाऱ्यांना चांगलेच धारेवर धरले आहे. त्यांनी सत्ताधाऱ्यांवर घणाघात करत महायुती सरकारवर एकामागून एक प्रश्नांचे बाण सोडले. हे सरकार हुकूमशाहीकडे वाटचाल करतंय का?, असा गंभीर आरोप वडेट्टीवारांनी केला. विजय वडेट्टीवार म्हणाले, सत्ताधारी माजले आहेत. मंत्री अधिवेशनात पत्ते खेळतात, आणि जाब विचारला की त्यांचे कार्यकर्ते पत्रकार परिषदेत मारहाण करतात. हे सरकार आहे की गुंडांचा जमाव? कायद्याचा धाक फक्त सामान्य जनतेसाठी आहे का? मंत्र्यांसाठी, त्यांच्या संघटनांसाठी वेगळा कायदा आहे का?, असा घणाघाती सवाल त्यांनी विचारला.
वडेट्टीवार यांचा रोष इथेच थांबला नाही. त्यांनी सरकारच्या तथाकथित युवा धोरणावरही सवाल उचलला. युवा धोरण समितीतला सदस्य आणि युवक राष्ट्रवादीचा अध्यक्ष, याला इतका राग का यावा? प्रश्न विचारायचा हक्क लोकशाहीत नाही का? की आता मंत्री चुकीचं वागले तरी त्यांच्या कार्यकर्त्यांना लाथा-बुक्क्यांचा परवाना मिळतो? वडेट्टीवारांच्या आक्रमक विधानांमुळे महायुती सरकार मोठ्या अडचणीत आले आहे. विरोधकांनी एकत्र येऊन आता कृषिमंत्री कोकाटे यांच्या राजीनाम्याची मागणी सुरू केली आहे. शेतकऱ्यांचे प्रश्न बाजूला टाकून मंत्र्यांच्या “मोबाईलवरील करमणुकीला” प्राधान्य देणाऱ्या सरकारला कधी अक्कल येणार, हाच प्रश्न आता जनतेच्याही मनात घर करत आहे.
