नागपूर महानगरपालिकेच्या निवडणुकीत भाजपकडे अनुभव आणि निधीच्या जोरावर मजबूत स्थिती आहे. तर काँग्रेसमध्ये ठोस नेतृत्वाचा अभाव दिसतो. यंदा नवीन चेहरे आणि बदलती रणनीती शहराचे राजकारण रंगवणार आहेत.
संत्र्यांचे शहर म्हणून ओळखल्या जाणाऱ्या नागपूरात सध्या राजकीय रणधुमाळीने रंग उधळले आहेत. सहा वर्षांच्या प्रदीर्घ प्रतीक्षेनंतर होणाऱ्या नागपूर महानगरपालिकेच्या निवडणुकीने राजकीय नेत्यांची धावपळ वाढली आहे. नुकत्याच जाहीर झालेल्या नवीन प्रभाग रचनेने या निवडणुकीला आणखी रंगत आणली आहे. प्रत्येक पक्षाने कंबर कसली असून, सत्तेच्या सिंहासनावर विराजमान होण्यासाठी जोरदार तयारी सुरू आहे. या निवडणुकीत कोण बाजी मारणार, याकडे संपूर्ण शहराचे लक्ष लागले आहे. भाजपसाठी ही निवडणूक म्हणजे सुवर्णसंधीच आहे. मुख्यमंत्री देवेंद्र फडणवीस यांच्या नेतृत्वाखाली पक्षाने नागपूरात आपला दबदबा कायम राखला आहे. देवेंद्र फडणवीस यांच्या जोडीला केंद्रीय मंत्री नितीन गडकरी यांचा विकासाचा मंत्र आणि त्यांनी नागपूरसाठी खेचून आणलेला प्रचंड निधी यामुळे भाजपचा मार्ग प्रशस्त झालेला दिसतो.
गडकरींच्या विकासकामांचा झंझावात आणि फडणवीस यांचे राजकीय कौशल्य यामुळे नागपूरकरांचा विश्वास भाजपवर दृढ झाला आहे. यंदाच्या निवडणुकीतही हा विश्वास कायम राहील, अशी आशा पक्षाला आहे. देवेंद्र फडणवीस मुख्यमंत्री झाल्यामुळे नागपूर महापालिकेसाठी भाजपचा रस्ता प्रशस्त झालेला आहे. कारण नितीन गडकरी यांनी देवेंद्र फडणवीस ज्या ज्या वेळी सत्तेत असतात किंवा त्यांच्याकडे महत्त्वाचे पद असते त्यावेळी ते मोठ्या प्रमाणावरती विकास निधी नागपुर साठी देतात. त्यामुळे काँग्रेसला यंदा नागपूरच्या महापालिकेत स्वतःचे अस्तित्व टिकवून ठेवण्यासाठी मोठा संघर्ष करावा लागणार आहे. देवेंद्र फडणवीस हे मुख्यमंत्री आहेत. यांच्या सोबतीला माजी महापौर आणि देवेंद्र फडणवीस यांचे निकटवर्तीय मानले जाणारे संदीप जोशी हे देखील आता आमदार झाले आहेत.
नेत्यांची सक्रिय हालचाल
महानगरपालिकेमध्ये आपला ठसा उमटवणारे माजी नागरसेवक तथा आमदार प्रवीण दटके हे देखील आमदार आहेत. त्यामुळे महानगरपालिकेपासून राज्याच्या विधिमंडळापर्यंत तीन महत्त्वाचे नेते नागपुरात आहेत. हे तिन्ही नेते विधान परिषदेत सध्या आपला ठसा उमटवत आहेत. शिवाय भाजपचे माजी मंत्री आमदार डॉ. परिणय फुके जरी भंडारा गोंदिया जिल्ह्याच्या राजकारणात सक्रिय असले, तरी त्यांचे घर नागपुरात आहेत. त्यामुळे एकूण चार असे दिग्गज नेते आहेत, जे नागपूर शहरांमध्ये सक्षमपणे निधी खेचून आणू शकतात. याची जाणीवही लोकांना आहे. दुसरीकडे काँग्रेसमध्ये अजूनही एक वाक्यता दिसत नाही. विजय वडेट्टीवार हे शहरात काँग्रेसचे प्रमुख नेते असले तरी, फारसे कुणी काँग्रेसचे नेते ताकदवान नाहीत. जे सत्ताधाऱ्यांच्या तिजोरीतून थेट निधी खेचून आणू शकतात.
आमदार विकास ठाकरे हे शहराध्यक्ष आहेत. नाना पटोले सुद्धा नागपूर मध्ये राहतात. पण नाना पटोले यांना बऱ्यापैकी विरोध असल्यामुळे नागपूर महानगरपालिकेची निवडणूक कदाचित विकास ठाकरे यांच्याच नेतृत्वात लढवली जाईल, असे सांगितले जात आहेत. बंटी शेळकेही या निवडणुकीत उतरणार का अशी चर्चा रंगत आहे. काँग्रेसचे आमदार होण्याचे स्वप्न अर्धवट राहिल्यामुळे, ते पुन्हा महानगरपालिकेच्या इलेक्शन मध्ये कमबॅक करतात का हा देखील एक पाहण्यासारखा विषय ठरणार आहे. याशिवाय अनेक नवीन चेहरे महानगरपालिकेच्या इलेक्शन मध्ये दिसू शकतात. कारण महानगरपालिकेच्या रणधुमाळीत जे काही नेते सक्रिय होते, त्यातील काहींना आयोगांवर पाठवण्यात आले आहे. तर काहींना महामंडळावर पाठवण्यात आले आहे. त्यामुळे भाजप, काँग्रेस, राष्ट्रवादी काँग्रेस आणि शिवसेना हे सर्व पक्ष महापालिका निवडणुकीत खेळी करतांना दिसणार आहे.
Political Drama : ठरलं तर मग! महायुतीच्या गाडीला नव्या प्रवाशाची गरज नाहीच
