रक्षाबंधनाच्या सणावर महिलांना विकासाची राखी बांधत मुख्यमंत्री देवेंद्र फडणवीसांनी ‘लाडकी बहीण’ योजनेला पाच वर्षांची हमी दिली. मानधनात वाढीचं गिफ्ट देतानाच गैरप्रवेशकर्त्यांवर कारवाईचा इशाराही त्यांनी स्पष्टपणे दिला.
रक्षाबंधनाच्या पावन सणात ‘विकासाची राखी’ बांधत मुख्यमंत्री देवेंद्र फडणवीस यांनी महाराष्ट्रातील लाखो महिलांना मोठं गिफ्ट दिलं. मुलुंड येथे झालेल्या रक्षाबंधन सोहळ्यात त्यांनी जाहीर केलं की, मुख्यमंत्री लाडकी बहीण योजना पुढील पाच वर्षे अविरत सुरू राहणार असून, सध्याच्या मानधनातही लक्षणीय वाढ होईल. उपस्थित बहिणींमध्ये टाळ्यांचा गजर उसळला, तर फडणवीसांनी आपल्या खास टोलेबाज शैलीत विरोधकांवरही प्रहार केला.
फडणवीसांनी आठवलं की, योजना सुरू होताना काहींनी कोर्टाची पायरी गाठून या उपक्रमाला अडवण्याचा प्रयत्न केला. पण, लाडक्या बहिणींनी अनेक सावत्र भावांचे मनसुबे उधळून लावले, अशा शब्दांत त्यांनी विरोधकांच्या प्रयत्नांवर टोलाही लगावला. आज या योजनेचा लाभ तब्बल अडीच कोटी महिलांपर्यंत पोहोचला आहे. काही ठिकाणी मात्र गैरव्यवहारही उघडकीस आले की, कुठे पुरुषांनी बहिणींच्या नावाने पैसे घेतले, तर कुणी ओळख लपवण्यासाठी मोटारसायकलचा फोटोही जोडला. अशा सर्व ‘घुसखोरां’ना ओळखून त्यांच्या पैशांची थेट थांबवणी करण्यात आली आहे. पात्र महिलांना हक्काचा लाभ द्या, पण गैरप्रवेशकर्त्यांना बाहेर काढा, असा स्पष्ट आदेश मुख्यमंत्र्यांनी जिल्हाधिकाऱ्यांना दिला.
लखपती दीदीचा निर्धार
आपल्या भाषणात फडणवीसांनी पंतप्रधान नरेंद्र मोदींच्या महिला सक्षमीकरण धोरणाचं कौतुक केलं. त्यांनी सांगितलं, बेटी बचाओ, बेटी पढाओ पासून सुरू झालेला प्रवास आज “लखपती दीदी”पर्यंत पोहोचला आहे. महाराष्ट्रात सध्या 25 लाख ‘लखपती दीदी’ कार्यरत आहेत. लवकरच एक कोटी महिलांना लखपती बनवण्याचं उद्दिष्ट पूर्ण केलं जाईल. महिलांना त्यांच्या उत्पादनांना बाजारपेठ मिळावी यासाठी राज्यात ‘उमेद मॉल’ उभारण्याचा निर्णय घेण्यात आला आहे. पहिल्या टप्प्यात 10 मॉल्स सुरू होणार आहेत.
महिला बचत गटांची प्रामाणिकता आणि आर्थिक शिस्त अधोरेखित करताना फडणवीस म्हणाले की, महिलांनी घेतलेल्या कर्जाची परतफेड शंभर टक्के होते, हे जगासाठी आदर्श आहे. यामुळे बँका आणि वित्तीय संस्था महिलांवर अधिक विश्वास ठेवू लागल्या आहेत. महायुती सरकारने राज्यात केजी ते पीजी पर्यंतचं शिक्षण मोफत केल्याचंही फडणवीसांनी सांगितलं.
दृढ संकल्प
महिला थांबणार नाहीत, तर राज्याचा विकासही थांबणार नाही, असा विश्वास त्यांनी व्यक्त केला. ‘लाडकी बहीण’ योजनेत लाभार्थींच्या बँक खात्यात थेट रक्कम जमा केल्याने भ्रष्टाचाराला वाव नाही, असंही त्यांनी स्पष्ट केलं. तरीही विरोधकांकडून आरोप होत असतात, पण सत्याचं बळ हेच आमचं उत्तर आहे, असं म्हणत त्यांनी भाषणाचा शेवट केला. या घोषणेनंतर सभागृहात उपस्थित महिलांचा उत्साह ओसंडून वाहत होता. एकीकडे सणाचा गोडवा आणि दुसरीकडे उज्ज्वल भविष्याचं आश्वासन, रक्षाबंधनाचा धागा यंदा महिलांच्या मनगटावर फक्त भावाचा प्रेमबंधन नसून, विकासाचा दृढ संकल्पही घेऊन आला.
