महाराष्ट्रातील महामार्ग आता विकासाचे नव्हे तर मृत्यूचे प्रतीक बनले आहेत, असा टोला काँग्रेस नेत्या यशोमती ठाकूर यांनी लगावला. नागपूर-जबलपूर हायवेवरील हृदयद्रावक अपघातानंतर त्यांनी सरकारच्या रस्ते सुरक्षा धोरणावर थेट सवाल उभा केला.
महाराष्ट्रातल्या रस्त्यांवर मृत्यूचा विळखा दिवसेंदिवस घट्ट होत असतानाही, सत्ताधाऱ्यांच्या निष्क्रियतेवर काँग्रेस नेत्या यशोमती ठाकूर यांनी टोकदार हल्ला चढवला. नागपूर-जबलपूर राष्ट्रीय महामार्गावर घडलेल्या हृदय पिळवटून टाकणाऱ्या अपघाताच्या पार्श्वभूमीवर ठाकूर यांनी सरकारला आरोपांच्या चौकटीत उभं केलं.
रक्षाबंधनसाठी मूळगावी निघालेल्या पती-पत्नीच्या दुचाकीला मागून भरधाव ट्रकने धडक दिली. पत्नीचा जागीच मृत्यू झाला आणि पतीला पावसाच्या तडाख्यात महामार्गावरून वाहनांना हात करुन मदतीची आर्त याचना करावी लागली. कोणीही थांबले नाही… शेवटी त्याला स्वतःच्या दुचाकीवर पत्नीचा मृतदेह बांधून न्यावं लागलं. ही घटना ठाकूर यांनी उपस्थित करत महाराष्ट्रातील रस्ते सुरक्षेच्या भयानक चित्राकडे लक्ष वेधलं.
Yashomati Thakur : मत चोरीच्या भीतीने सरकार पोलिसांच्या मागे लपलंय
घणाघाती सवाल
मरण इतकं स्वस्त कधी झालं होतं का? मागील तीन वर्षांत तब्बल 45 हजार नागरिकांचा रस्ते अपघातात मृत्यू झाल्याचं विधानसभेत परिवहन मंत्री प्रताप सरनाईक यांनीच सांगितलं आहे. विकासाच्या नावाखाली कोट्यवधींचे रस्ते प्रकल्प होत असले, तरी सर्वसामान्यांच्या जिवाची किंमत या सरकारला आहे का? असा सवाल ठाकूर यांनी केला.
ठाकूर यांनी पुढे सरकारवर रोखठोक प्रहार करत विचारलं की, रस्ते सुरक्षा परिषद ही फक्त फलकापुरतीच आहे का? तिच्या बैठका कधी झाल्या? धोरणं आखली की नाही? उपाययोजना कुठे आहेत? सर्वात महत्त्वाचं म्हणजे नागरिकांच्या जिवाबद्दल या सरकारच्या अजेंड्यावर काही आहे का?
सुरक्षित पोचणं कठीण
यशोमती ठाकूर यांच्या या हल्ल्याने रस्ते अपघातांच्या भीषण वास्तवावर पुन्हा एकदा प्रकाशझोत पडला आहे. त्यांचा आरोप स्पष्ट आहे की, सरकारला रस्ते बांधणं महत्त्वाचं, पण त्या रस्त्यांवरून सुरक्षित पोचणं मात्र नागरिकांचं नशिबावर अवलंबून आहे.
विरोधकांनीही ठाकूर यांच्या या भूमिकेला पाठिंबा देत सरकारवर ताशेरे ओढले. महायुती सरकारसाठी नागरिकांचे प्राण हे फक्त आकड्यांमध्ये मोजायचं साधन झाले आहेत. त्यांच्या सभागृहातील भाषणात केवळ आकडे वाचले जातात, पण प्रत्यक्षात एकही ठोस पाऊल दिसत नाही. महाराष्ट्रातील महामार्ग हे विकासाचे नाही तर मृत्यूचे हायवे झाले आहेत, असा आरोप विरोधकांनी केला.
Sanjay Gaikwad : ‘बाप’ म्हणत भडकले, आता गोडगोड बोलून यू-टर्न घेतले
याच पार्श्वभूमीवर काही विरोधी नेत्यांनी उपरोधिक भाषेत सरकारला सल्ला दिला. जर जीव वाचवायचा विचारच नाही, तर किमान महामार्गांच्या पाट्यांवर ‘सावधान. पुढे मृत्यू महामार्ग’ अशी सूचना तरी लावा. कदाचित लोक थोडं सावध होतील, अशा टोमण्यांनी राजकीय वातावरण आणखी तापलं आहे.
