यवतमाळमध्ये उपमुख्यमंत्री एकनाथ शिंदे यांच्या आभार दौऱ्यासाठी मोठी तयारी सुरू आहे. संजय राठोड यांच्या नेतृत्वाखाली शिवसैनिकांमध्ये उत्साहाचे वातावरण आहे.
यवतमाळमध्ये राजकीय उत्साह शिगेला पोहोचला आहे. नुकत्याच झालेल्या विधानसभा निवडणुकीत राज्यातील जनतेने महायुतीला भरभरून मतदान करून सत्तेवर विराजमान केले. या विजयाबद्दल कृतज्ञता व्यक्त करण्यासाठी शिवसेनेचे मुख्य नेते तथा राज्याचे उपमुख्यमंत्री एकनाथ शिंदे संपूर्ण महाराष्ट्रभर आभार दौऱ्यावर आहेत. याच दौऱ्याचा एक भाग म्हणून येत्या गुरुवारी, 3 एप्रिल रोजी ते यवतमाळ येथे येणार आहेत. राज्याचे मृद व जलसंधारण मंत्री तसेच जिल्ह्याचे पालकमंत्री संजय राठोड यांनी ही माहिती दिली.
दौऱ्याच्या निमित्ताने यवतमाळच्या समता मैदान (पोस्टल ग्राउंड) येथे दुपारी 4 वाजता भव्य जाहीर सभा होणार आहे. या सभेत एकनाथ शिंदे जिल्हाभरातील नागरिकांशी संवाद साधतील. संजय राठोड यांच्या नेतृत्वाखाली या सभेच्या भव्य तयारीला वेग आला आहे. हजारो शिवसैनिक आणि कार्यकर्ते या सभेसाठी उत्सुक आहेत. या कार्यक्रमाला महायुतीतील सर्व मंत्री आणि प्रमुख नेते उपस्थित राहणार असून, ही सभा शिवसेनेच्या भविष्यासाठी दिशादर्शक ठरणार आहे.
MMC Elections : मुनगंटीवारांचे निकटवर्तीय उतरले मेडिकल निवडणुकीत
नव्या नेतृत्वाचा प्रवेश
मुख्यमंत्रीपदावर विराजमान झाल्यानंतर एकनाथ शिंदे यांनी राज्यहिताच्या दृष्टीने अनेक महत्वपूर्ण निर्णय घेतले. त्यांच्या कार्यकाळात पाचशेहून अधिक शासन निर्णय घेतले गेले. जवळपास अठरा नवीन महामंडळांची स्थापना करण्यात आली. ज्यामुळे विविध क्षेत्रांमध्ये विकासाला चालना मिळाली. महायुती सरकार स्थापन झाल्यानंतर त्यांनी जनतेला दिलेली आश्वासने पूर्ण करण्यासाठी मोठ्या प्रमाणावर प्रयत्न केले. मतदारांशी थेट संवाद साधत त्यांच्या विकासासाठी काम करण्याची त्यांची वृत्ती राज्याच्या राजकारणात एक नवीन उदाहरण निर्माण करत आहे.
संजय राठोड यांनी या दौऱ्याच्या पार्श्वभूमीवर मोठी घोषणा केली आहे. या सभेत अनेक महत्त्वाच्या राजकीय नेत्यांचा शिवसेनेत प्रवेश होणार आहे. त्यामुळे पक्षसंघटना अधिक मजबूत होईल. आगामी स्थानिक स्वराज्य संस्थांच्या निवडणुकीच्या तयारीसाठी एक नवा ऊर्जा संचारेल. महायुतीतील तीनही पक्षांनी संघटनात्मक बांधणीवर भर दिला असला तरी, त्याचा अर्थ ते स्वतंत्र निवडणूक लढतील असा होत नाही, असेही संजय राठोड यांनी स्पष्ट केले.
शेतकऱ्यांसाठी ठोस धोरणे
शेतकऱ्यांचे कल्याण हे महायुती सरकारच्या केंद्रस्थानी आहे. शेतकऱ्यांसाठी सरकारने अल्पकालीन आणि दीर्घकालीन उपाययोजना आखल्या आहेत. कर्जमाफीसाठीही सरकार सकारात्मक आहे. वचननाम्यात दिलेली प्रत्येक बाब सरकार पूर्ण करेल, असे संजय राठोड यांनी ठामपणे सांगितले.
मागील वर्षी मुख्यमंत्री एकनाथ शिंदे यांनी रामटेक येथे आशिष जयस्वाल यांच्या उमेदवारीची घोषणा केली होती. त्यानंतर आता यवतमाळमध्ये त्यांचा आभार दौरा होणार आहे. यामुळे जिल्ह्यात उत्साहाचे वातावरण निर्माण झाले आहे. संजय राठोड यांच्या नेतृत्वाखाली शिवसेनेचे सर्व पदाधिकारी आणि कार्यकर्ते या सभेसाठी सज्ज झाले आहेत. हा दौरा शिवसेनेच्या कार्यकर्त्यांसाठी आत्मविश्वास निर्माण करणारा ठरेल, तसेच आगामी राजकीय समीकरणांवरही मोठा प्रभाव टाकेल.
