पहलगाममधील दहशतवादी हल्ल्यावर काँग्रेसने तीव्र प्रतिक्रिया दिली आहे. हर्षवर्धन सपकाळ यांच्या नेतृत्वाखाली दादरमध्ये निषेध मोर्चा काढण्यात आला.
जम्मू काश्मीरमधील पहलगाममध्ये झालेल्या भ्याड अतिरेकी हल्ल्यानंतर संपूर्ण देशभर संतापाची लाट उसळली आहे. या हल्ल्यात निरपराध पर्यटकांचा बळी गेला आहे. महाराष्ट्रात देखील या घटनेचा तीव्र निषेध होत आहे. काँग्रेस पक्षाने दादर येथून जोरदार निषेध मोर्चा काढत पाकिस्तान प्रायोजित अतिरेक्यांविरोधात तीव्र संताप व्यक्त केला. महाराष्ट्र प्रदेश काँग्रेस कमिटीचे अध्यक्ष हर्षवर्धन सपकाळ यांनी या हल्ल्याचा निषेध करत, अशा भ्याड अतिरेकी हल्ल्यांचा कायमचा बिमोड केला पाहिजे, अशी ठाम भूमिका मांडली.
मोर्चाची सुरुवात काँग्रेसच्या टिळक भवन या मुख्यालयातून झाली. पहलगाम हल्ल्यात बळी पडलेल्यांना दोन मिनिटांचे मौन पाळून श्रद्धांजली वाहण्यात आली. त्यानंतर काँग्रेसच्या शेकडो कार्यकर्त्यांनी घोषणांचा वर्षाव करत दादरच्या रस्त्यांवर मोर्चा काढला. पाकिस्तान मुर्दाबाद, भारत माता की जय, या घोषणांनी परिसर दणाणून गेला. कार्यकर्त्यांच्या चेहऱ्यावर संताप स्पष्टपणे झळकत होता. या वेळी अतिरेकी कारवायांविरोधात कठोर भूमिका घेण्याची गरज असल्याचे स्पष्टपणे नमूद करण्यात आले.
Prakash Ambedkar : शरद पवारांचं विसरलेलं पत्र बनलं चर्चेचा केंद्रबिंदू
सुरक्षाव्यवस्थेवर सवाल
हर्षवर्धन सपकाळ यांनी पत्रकारांशी बोलताना सांगितले की, देशातील नागरिकांच्या सुरक्षेसाठी सरकारने सर्व पक्षांना एकत्र आणून एकमुखी निर्णय घ्यावा. कोणताही दहशतवादी हल्ला खपवून घेतला जाणार नाही, असा ठाम संदेश या मोर्चातून गेला पाहिजे. सपकाळ यांनी सांगितले की, हा हल्ला केवळ पर्यटकांवर नव्हे, तर संपूर्ण भारतीयत्वावर आघात आहे. अशा हल्ल्यांचा पूर्णपणे नायनाट करण्यासाठी देश एकवटणे आवश्यक आहे.
काँग्रेस विधिमंडळ पक्षनेते विजय वडेट्टीवार यांनीही या वेळी संतप्त प्रतिक्रिया दिली. पहलगाम हल्ल्यात 26 पर्यटकांचा मृत्यू झाला आहे. त्यापैकी तिघे महाराष्ट्रातील आहेत. हे अत्यंत दुःखद आहे. एवढा मोठा हल्ला होऊनही गुप्तचर विभागाला पूर्वकल्पना नव्हती, ही बाब गंभीर असून सुरक्षा यंत्रणांचे अपयश दर्शवते. वडेट्टीवार यांनी म्हटले की, पर्यटकांच्या संरक्षणाची जबाबदारी सरकारची असून ती पूर्णपणे फसली आहे. आता अतिरेक्यांचा कायमस्वरूपी बिमोड करण्याशिवाय पर्याय नाही.
कार्यकर्त्यांची भव्य उपस्थिती
मोर्चात हर्षवर्धन सपकाळ, विजय वडेट्टीवार यांच्यासह माजी खासदार हुसेन दलवाई, ओबीसी विभागाचे प्रदेशाध्यक्ष भानुदास माळी, प्रदेश सरचिटणीस रमेश शेट्टी, श्रीरंग बरगे, प्रदेश सचिव झिशान अहमद, आनंद सिंह, धनराज राठोड यांची प्रमुख उपस्थिती होती. काँग्रेसचे असंख्य कार्यकर्ते हातात झेंडे आणि निषेधाचे फलक घेऊन सहभागी झाले होते. मोर्चात शिस्तबद्धपणे आणि ठामपणे आपला संताप व्यक्त करण्यात आला.
दहशतवाद्यांच्या हिंसाचारास विरोध करताना काँग्रेसने दिलेला एकतेचा संदेश देशवासीयांसाठी महत्त्वपूर्ण आहे. प्रत्येक नागरिकाच्या सुरक्षेसाठी राजकीय मतभेद बाजूला ठेवून देश प्रथम ठेवण्याची गरज या मोर्चातून अधोरेखित झाली. आता केवळ निषेध नव्हे, तर कारवाईची वेळ आली आहे, असा निर्धार या संतप्त आंदोलकांमध्ये दिसून आला.
Girish Mahajan : काश्मीरमधून परतीच्या वाटेवर भंडाऱ्याचे पर्यटक
