उपमुख्यमंत्री एकनाथ शिंदे यांनी स्पष्ट केले की, विधानसभेत मिळालेल्या महायुतीच्या विजयाचा उत्साह स्थानिक स्वराज्य संस्थांच्या निवडणुकींमध्येही उमटणार आहे.
महाराष्ट्राच्या राजकीय क्षितिजावर स्थानिक स्वराज्य संस्थांच्या निवडणुकींचा टप्पा जवळ येत आहे. या पार्श्वभूमीवर सर्वच राजकीय पक्षांनी आपली रणनीती आखण्यास सुरुवात केली आहे. कार्यकर्त्यांना सज्ज राहण्याच्या सूचना देत पक्षसंघटना मजबूत करण्याचे प्रयत्न जोमाने सुरू आहेत. या संदर्भात शिवसेना शिंदे गटाचे प्रमुख आणि राज्याचे उपमुख्यमंत्री एकनाथ शिंदे यांनी महायुतीच्या तयारीचा आणि विजयाचा दृढ विश्वास व्यक्त केला आहे. त्यांच्या नेतृत्वाखालील महायुतीने विधानसभेत मिळवलेल्या अभूतपूर्व यशानंतर आता स्थानिक स्वराज्य संस्थांच्या निवडणुकीतही जनतेच्या विश्वासाला पात्र ठरण्याचा निर्धार केला आहे.
शिंदे यांनी निवडणूक आयोगाच्या तयारीवर आणि सुप्रीम कोर्टाच्या निर्देशांवर प्रकाश टाकला. निवडणूक प्रक्रिया शिस्तबद्ध आणि पारदर्शक व्हावी, यासाठी 31 जानेवारी 2026 पर्यंत निवडणूक घेण्याचे आदेश सर्वोच्च न्यायालयाने दिले आहेत. महायुतीने या आव्हानाला सामोरे जाण्यासाठी पूर्ण तयारी केली आहे. शिंदे यांनी महायुतीच्या गत अडीच वर्षांच्या कारकीर्दीतील विकासकामांचा दाखला देत, जनतेने विधानसभेत दिलेल्या कौलाला लोकशाहीचा विजय संबोधला. या यशाच्या जोरावर स्थानिक स्वराज्य संस्थांच्या निवडणुकीतही महायुती जनतेच्या आकांक्षांना साकार करेल, असा ठाम विश्वास त्यांनी व्यक्त केला.
Devendra Fadnavis : चहा विकणाऱ्या ब्रँडसमोर ठाकरे बंधूंचा ब्रँड झिरो
तयारीत महायुतीची आघाडी
महायुतीने स्थानिक स्वराज्य संस्थांच्या निवडणुकीसाठी आपली रणनीती सज्ज ठेवली आहे. शिंदे यांनी स्पष्ट केले की, निवडणूक आयोगच निवडणूक कार्यक्रम निश्चित करेल. त्यासाठी लागणारी सर्व यंत्रणा कार्यान्वित करण्यात येईल. महायुतीच्या कार्यकर्त्यांचा उत्साह आणि सरकारच्या विकासकामांवरील जनतेचा विश्वास हेच यशाचे मूळ आधारस्तंभ आहेत. लाडकी बहीण, लाडका भाऊ आणि लाडके शेतकरी यांसारख्या योजनांनी जनसामान्यांच्या जीवनात सकारात्मक बदल घडवले. ज्याची पावती विधानसभेत जनतेने दिली. हीच ऊर्जा आता स्थानिक स्वराज्य संस्थांच्या निवडणुकीतही महायुतीला यश मिळवून देईल, असा दावा शिंदे यांनी केला.
शिवसेनेची कार्यशैली निवडणूककेंद्रित नसून, जनसेवेला प्राधान्य देणारी आहे, असे शिंदे यांनी ठामपणे नमूद केले. शिवसेनेचे कार्य 24 तास आणि वर्षभर अव्याहत सुरू असते. निवडणूक कधीही जाहीर झाली, तरी महायुती पूर्णपणे सज्ज आहे, असा विश्वास त्यांनी व्यक्त केला. शिंदे यांनी शिवसेनेच्या कार्यकर्त्यांच्या कष्टाळू वृत्ती आणि जनतेशी असलेल्या थेट संनादाचे कौतुक केले. त्यामुळे स्थानिक स्वराज्य संस्थांच्या निवडणुकीतही महायुतीला जनतेचा पाठिंबा मिळेल, याची खात्री त्यांनी व्यक्त केली. विकास आणि जनकल्याणाच्या मार्गावर महायुती अविचलपणे कार्यरत राहील, असेही त्यांनी स्पष्ट केले.
Randhir Sawarkar : शेतकऱ्यांच्या आशेची निळकंठ सूतगिरणी पुन्हा कार्यान्वित
शिंदे यांनी पंतप्रधान नरेंद्र मोदी यांच्या नेतृत्वाचे तोंडभरून कौतुक केले. मोदी यांनी 32 कोटी लोकांना दारिद्र्यरेषेच्या वर आणण्याचे कार्य केले आहे, असे सांगितले. शिंदे यांनी त्यांच्या अविश्रांत कष्टांचा आणि विकासाभिमुख दृष्टिकोनाचा गौरव केला. विद्यार्थ्यांपासून ते गरिबांपर्यंत सर्व स्तरांवर मोदी यांनी कार्य केल्याचे शिंदे यांनी नमूद केले. काँग्रेसच्या गरीबी हटावच्या घोषणेमुळे गरीबच हटले, परंतु मोदी यांनी खऱ्या अर्थाने गरिबांना सक्षम केल्याचे शिंदे यांनी ठासून सांगितले. या राष्ट्रीय नेतृत्वाच्या प्रेरणेतून महायुती स्थानिक स्वराज्य संस्थांच्या निवडणुकीतही यशस्वी होण्यास उत्सुक आहे.
