अतिवृष्टी व पुराच्या तडाख्याने राज्य हादरले असताना, काँग्रेस प्रदेशाध्यक्ष हर्षवर्धन सपकाळ सरकारवर रोखठोक तुटून पडले आहेत. शेतकऱ्यांकडे दुर्लक्ष करणाऱ्या महायुतीमुळे महाराष्ट्रात बंडाळीचे सावट असल्याचा त्यांनी इशारा दिला.
महाराष्ट्राच्या मातीत सध्या अस्वस्थतेचे वादळ घोंघावत आहे. अतिवृष्टी आणि पुराच्या तडाख्याने शेतकऱ्यांचे कंबरडे मोडले असताना, राज्य सरकार मात्र बेफिकीरपणे दिल्लीच्या वाऱ्या करत आहे, असा गंभीर आरोप काँग्रेस प्रदेशाध्यक्ष हर्षवर्धन सपकाळ यांनी केला आहे. बुलढाणा जिल्ह्यातील मोताळा तालुक्यातील पूरग्रस्त भागाची पाहणी करताना त्यांनी सरकारच्या नाकर्तेपणावर बोट ठेवले. शेतकऱ्यांच्या दुरवस्थेकडे दुर्लक्ष करणाऱ्या सत्ताधाऱ्यांमुळे राज्यात बंडाळीची परिस्थिती उद्भवली आहे, असे त्यांनी ठणकावले. या संकटकाळात शेतकऱ्यांच्या पाठीशी खंबीरपणे उभे राहण्याचा निर्धार काँग्रेसने व्यक्त केला आहे.
राज्यातील शेतकरी हवालदिल झाला आहे. खरीप हंगामातील पिके पाण्याखाली गेली, शेतजमीन खरडली गेली. आता सरकारकडून मदतीचा एकही किरण दिसत नाही. सपकाळ यांनी सरकारच्या या उदासीनतेवर तीव्र शब्दांत टीका केली. शेतकऱ्यांना तातडीने हेक्टरी 50 हजार रुपयांचे अर्थसहाय्य आणि कर्जमाफीची गरज असल्याचे त्यांनी स्पष्ट केले. मात्र, सरकार केवळ राजकीय खेळ खेळण्यात मग्न आहे, असा आरोप त्यांनी केला. येत्या 2 ऑक्टोबरला काँग्रेस शेतकऱ्यांच्या हक्कासाठी रस्त्यावर उतरणार असल्याची घोषणा त्यांनी केली.
Devendra Fadnavis : वीज, रोजगार अन् नैसर्गिक शेतीला प्रोत्साहन
सरकारची बेफिकिरी
अतिवृष्टीने बुलढाण्यासह राज्यातील अनेक भाग उद्ध्वस्त झाले आहेत. शेतकऱ्यांचे हात रिकामे झाले, तरी सरकारची संवेदनशीलता हरवली आहे. सपकाळ यांनी मुख्यमंत्र्यांच्या दिल्ली दौऱ्यावर टीका करताना, ते सामाजिक तेढ निर्माण करून शेतकऱ्यांचे प्रश्न झाकण्याचा प्रयत्न करत असल्याचा दावा केला. सरकारला शेतकऱ्यांच्या दुखण्याची पर्वा नाही, असे सांगत त्यांनी जनतेच्या संतापाला वाचा फोडली.
काँग्रेसने शेतकऱ्यांसाठी आंदोलनाची हाक दिली आहे. सपकाळ यांनी सरकारच्या निष्क्रियतेवर ताशेरे ओढताना, काँग्रेस कार्यकर्त्यांवरील अन्यायाचाही जाहीर निषेध केला. कल्याण येथील एका कार्यकर्त्याला साडी नेसवून अपमानित करण्याच्या घटनेची गंभीर दखल काँग्रेस नेते राहुल गांधी यांनी घेतली आहे. लवकरच या कार्यकर्त्याचा सन्मान केला जाईल, असे सपकाळ यांनी जाहीर केले.
Vijay Wadettiwar : पूरग्रस्तांची वेदना अनावर, अधिकारी मात्र नाचाच्या तालावर
सपकाळ यांनी मुख्यमंत्र्यांवर खोटेपणाचा आरोप करताना, त्यांच्या जुन्या वक्तव्यांचा दाखला दिला. शेतकऱ्यांना मदत करण्याची सरकारची नियतच नसल्याचा दावा त्यांनी केला. तसेच, काही नेत्यांच्या वादग्रस्त विधानांमुळे शेतकऱ्यांचे प्रश्न बाजूला पडत असल्याची टीका त्यांनी केली. अशा परिस्थितीत काँग्रेस शेतकऱ्यांचा आवाज बुलंद करण्यासाठी कटिबद्ध आहे, असे त्यांनी ठामपणे सांगितले.
