अजित पवारांच्या वादग्रस्त वक्तव्यांमुळे त्यांच्यावर टीकेचा भडका उडाला आहे. यावर राष्ट्रवादी काँग्रेसचे आमदार अमोल मिटकरी यांनी महिला IPS अधिकारी अंजली कृष्णा यांच्या जात प्रमाणपत्राची पडताळणी करण्याची मागणी केली आहे.
महाराष्ट्राच्या राजकीय रणभूमीवर उपमुख्यमंत्री तथा राष्ट्रवादी काँग्रेसचे सर्वेसर्वा अजित पवार यांच्याभोवती वादाचे वादळ पुन्हा एकदा घोंघावत आहेत. त्यांची सडेतोड आणि आक्रमक बोलण्याची शैली, जी कधीकाळी त्यांच्या समर्थकांसाठी ‘दादा’चा दबदबा दाखवणारी ठरायची, तीच आता त्यांच्यासाठी डोकेदुखी ठरत आहे. एका महिला IPS अधिकाऱ्यावर फोनवरून संवाद करतानाचा व्हिडीओ व्हायरल झाला. त्यानंतर अजितदादांवर टीकेची झोड उठली आहे. पण, हा वाद इथेच थांबला नाही. आता त्यांच्याच पक्षातील आमदार अमोल मिटकरी यांच्या एका पत्राने नव्या वादाला तोंड फोडले आहे. या पत्रात त्यांनी थेट UPSC पत्र लिहून IPS अधिकारी अंजना कृष्णा यांच्या जातीच्या प्रमाणपत्राची चौकशी करण्याची मागणी केली आहे.
सगळ्या नाट्यमय घडामोडींनी राजकीय वर्तुळात खळबळ उडाली आहे. मिटकरींच्या या पत्राने काँग्रेसच्या नेत्या यशोमती ठाकूर यांना चांगलाच राग अनावर झाला आहे. त्यांनी मिटकरींच्या या कृतीवर तीव्र शब्दांत टीका केली आहे. शिव-शाहू-फुले-आंबेडकर यांच्या विचारांवर चालणारा पक्ष असे सांगणाऱ्या राष्ट्रवादीच्या नेत्यांना आता IPS अधिकाऱ्याच्या जातीवर बोलायची वेळ आली आहे? मिटकरींना अंजना कृष्णा यांच्या कागदपत्रांची आता कशी काय आठवण झाली? असा सवाल यशोमती ठाकूर यांनी उपस्थित केला आहे. त्यांच्या या तिखट प्रतिक्रियेमुळे हा वाद आणखी चिघळण्याची शक्यता आहे. अमोल मिटकरी यांनी UPSC ला लिहिलेलं पत्र म्हणजे जणू राजकीय रणभूमीवर फेकलेला दगड.
उपमुख्यमंत्र्यांची वाढती अडचण
पत्रात त्यांनी लिहिले आहे, महाराष्ट्र विधान परिषदेचा सदस्य म्हणून मी आपले लक्ष अंजना कृष्णा (IPS) यांच्या शैक्षणिक आणि जातीच्या प्रमाणपत्रांकडे वेधतो. त्यांनी सादर केलेल्या कागदपत्रांची सखोल चौकशी करणे गरजेचे आहे. याची सत्यता तपासून संबंधित विभागांना माहिती द्यावी. विशेष म्हणजे, हे पत्र ५ सप्टेंबर २०२५ रोजीच लिहिल्याचे दिसते, म्हणजेच हा सगळा प्रकार ताजाच आहे. मिटकरींच्या या पत्राने अंजना कृष्णा यांच्या नियुक्ती प्रक्रियेवर प्रश्नचिन्ह उपस्थित झाले आहे. त्यांनी थेट पूजा खेडकर प्रकरणाशी तुलना करत अंजना यांच्या नियुक्तीतही घोळ असल्याचा संशय व्यक्त केला आहे. या पत्रावर यशोमती ठाकूर यांनी जोरदार हल्ला चढवला आहे. मिटकरींचे हे पत्र म्हणजे केवळ राजकीय डावपेच आहे.
जातीच्या मुद्द्यावरून एखाद्या सक्षम महिला अधिकाऱ्याला लक्ष्य करणे हे निंदनीय आहे, असं ठाकूर यांनी ठणकावले. यशोमती ठाकूर, यांनी या प्रकरणात राष्ट्रवादीच्या दुटप्पी धोरणावर बोट ठेवले आहे. एकिकडे समतेचा आणि सामाजिक न्यायाचा गवगवा करायचा आणि दुसरीकडे जातीच्या आधारे अधिकाऱ्यांना टार्गेट करायचे, हा कसला विचार? असा सवाल त्यांनी उपस्थित केला. अजित पवार यांच्या पक्षातील नेत्याच्या या कृतीमुळे त्यांची अडचण वाढली आहे. मिटकरींच्या या पत्राने अंजना कृष्णा यांच्या नियुक्तीवर प्रश्नचिन्ह निर्माण झाले असले, तरी यामुळे राष्ट्रवादीच्या अंतर्गत गटबाजीही उघड झाली आहे. अकोल्यात बोलताना मिटकरी म्हणाले, राज्याच्या उपमुख्यमंत्र्यांचे नाव माहीत नसणाऱ्या अधिकाऱ्याची नियुक्ती संशयास्पद आहे. याची चौकशी व्हायलाच हवी. त्यांच्या या वक्तव्याने वादाला आणखी तेल ओतले आहे. हा वाद आता कुठे थांबणार, हे सांगणे कठीण आहे.
